ରତନ ଟାଟାଙ୍କ ପରଲୋକକୁ ନେଇ ସାରା ଦେଶରେ ଶୋକର ଲହରୀ ଖେଳିଯାଇଛି। ସେ 86 ବର୍ଷ ବୟସରେ ମୁମ୍ବାଇର ବ୍ରେକ୍ କ୍ୟାଣ୍ଡି ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଥିଲେ। ଟାଟାଙ୍କ ଦେହାନ୍ତରେ ଟାଟା ସନ୍ସ ଚେୟାରମ୍ୟାନ୍ ଏନ ଚନ୍ଦ୍ରଶେଖରନ୍ ପଦ୍ମଭୂଷଣ ରତନ ଟାଟାଙ୍କ ଅବଦାନକୁ ଅବିଶ୍ୱସନୀୟ ବୋଲି ବର୍ଣ୍ଣନା କରିଛନ୍ତି। ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି ଯେ ଟାଟାଙ୍କ ଶେଷକୃତ୍ୟ ରୀତିନୀତି ସମ୍ପୂର୍ଣ୍ଣ ରାଜ୍ୟ ସମ୍ମାନ ସହ ପାଳନ କରାଯିବ। ମହାରାଷ୍ଟ୍ର ସରକାର ଦିନକ ପାଇଁ ଶୋକ ଦିବସ ପାଳନ କରୁଛନ୍ତି, ଝାଡ଼ଖଣ୍ଡ ସରକାର ମଧ୍ୟ ଏକଦିନ ପାଇଁ ଶୋକଦିବସ ଘୋଷଣା କରିଛନ୍ତି । ଆମେରିକା ସହ ଅନ୍ୟାନ୍ୟ ଦେଶ ଶୋକ ପ୍ରକାଶ କରିଛନ୍ତି । ରାଷ୍ଟ୍ରପତି ଦ୍ରୈାପଦୀ ମୁର୍ମୁ, ପ୍ରଧାନମନ୍ତ୍ରୀ ମୋଦି, ରାହୁଲ ଗାନ୍ଧୀ, ମୁକେଶ ଅମ୍ବାନୀ, ଗୈାତମ ଆଦାନୀ , ଆନନ୍ଦ ମହିନ୍ଦ୍ରା ଶୋକ ପ୍ରକାଶ କରିଛନ୍ତି ।
ଟାଟାଙ୍କ ମରଶରୀର ଗୁରୁବାର ଦିନ ସକାଳ ୧୦.୩୦ ରୁ ୪ଟା ପର୍ଯ୍ୟନ୍ତ ଦକ୍ଷିଣ ମୁମ୍ବାଇର ନରିମାନ ପଏଣ୍ଟରେ ଥିବା ନ୍ୟାସନାଲ ସେଣ୍ଟର୍ ଫର୍ ପର୍ଫମିଂ ଆର୍ଟ (ଏନସିପିଏ) ରେ ରଖାଯିବ। ଅନ୍ତିମ ଦର୍ଶନ ପାଇଁ ଏଠାରେ ସମସ୍ତ ପ୍ରସ୍ତୁତି ହୋଇଛି । ଶେଷକୃତ୍ୟ କାର୍ଯ୍ୟକ୍ରମରେ ଗୃହମନ୍ତ୍ରୀ ଅମିତ ଶାହ ଯୋଗଦେବେ । ଅପରାହ୍ନ ୩.୩୦ ସମୟରେ ତାଙ୍କ ମୃତଦେହକୁ ଶେଷ ରୀତିନୀତି ପାଇଁ ୱର୍ଲି ଶ୍ମସାନକୁ ନିଆଯିବ। କେନ୍ଦ୍ର ତରଫରୁ ରତନ ଟାଟାଙ୍କ ଶେଷ ରୀତିନୀତିରେ ଯୋଗଦେବେ ଗୃହମନ୍ତ୍ରୀ ଅମିତ ଶାହା। ଜନସାଧାରଣ ପାଇଁ ରତନ ଟାଟାଙ୍କ ମୃତଦେହକୁ ଗୁରୁବାର ଦିନ ସକାଳ ୧୦.୩୦ ସମୟରେ ମୁମ୍ବାଇର ଏନସିପିଏ ଲନ୍ସ, ନରିମାନ ପଏଣ୍ଟରେ ଦର୍ଶନ କରିପାରିବେ ।
ରତନ ଟାଟାଙ୍କ ଦେହାନ୍ତ ସହିତ ଏକ ଯୁଗର ଅବସାନ ହୋଇଛି। ଟାଟା ଗ୍ରୁପ୍କୁ ବିଶ୍ବରେ ପରିଚିତ କରିଥିଲେ ଶ୍ରୀ ଟାଟା । ବ୍ୟବସାୟରେ ବିଚକ୍ଷଣ ଗୋଟିଚାଳନାରେ ସେ ଥିଲେ ସିଦ୍ଧହସ୍ତ। ସାରା ଜୀବନ ଅବିବାହିତ ରହିଥିବା ରତନ ଟାଟା ସର୍ବଦା ଦେଶର ମଂଗଳ କାମନା କରୁଥିଲେ । ତାଙ୍କ ଭଳି ଜଣେ ଶିଳ୍ପପତିଙ୍କୁ ହରାଇବା ଭାରତ ଲାଗି ଅପୂରଣୀୟ କ୍ଷତି ହୋଇଛି।
ଶିଳ୍ପପତି ରତନ ଟାଟାଙ୍କ ଶେଷକୃତ୍ୟ ମହାରାଷ୍ଟ୍ର ସରକାର ରାଷ୍ଟ୍ରୀୟ ମର୍ଯ୍ୟାଦାର ସହ କରିବାକୁ ଘୋଷଣା କରିଛନ୍ତି। ରତନ ଟାଟାକୁ ନୈତିକତା ଏବଂ ଉଦ୍ୟୋଗର ଏକ ନିଆରା ମିଶ୍ରଣ ବୋଲି କହିଥିବା ମୁଖ୍ୟମନ୍ତ୍ରୀ ଏକନାଥ ସିନ୍ଦେ ମଧ୍ୟ ଶିଳ୍ପପତିଙ୍କୁ ଶ୍ରଦ୍ଧାଞ୍ଜଳି ଜଣାଇବା ପାଇଁ ଗୁରୁବାର ଦିନ ରାଜ୍ୟରେ ଶୋକ ଦିବସ ଘୋଷଣା କରିଛନ୍ତି।
