ରେସଲର ବଜରଙ୍ଗ ପୁନିଆ ଏବଂ ଭିନେଶ ଫୋଗାଟ କଂଗ୍ରେସ ଟିକେଟରେ ନିର୍ବାଚନ ଲଢ଼ିବେ

ରେସଲର ବଜରଙ୍ଗ ପୁନିଆ ଏବଂ ଭିନେଶ ଫୋଗାଟ କଂଗ୍ରେସ ଟିକେଟରେ ନିର୍ବାଚନ ଲଢ଼ିବେ । ହରିୟାଣାରେ ବିଧାନସଭା ନିର୍ବାଚନରେ ଏହି ଦୁଇ ରେସଲର ପ୍ରତିଦ୍ବନ୍ଦ୍ବିତା କରିବେ । କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଭେଟିବା ପରେ ଏଭଳି ନିଷ୍ପତ୍ତି ନିଆଯାଇଛି। ଉଭୟ ଆସନରେ କଂଗ୍ରେସ ଜିତିବାକୁ ଚାହୁଁଛି । ଦିଲ୍ଲୀରେ ରାହୁଲ ଗାନ୍ଧୀଙ୍କୁ ଭେଟିବା ପରେ ବଜରଙ୍ଗ ପୁନିଆଙ୍କୁ ବାଦଲି ଆସନରୁ ଟିକେଟ ଦିଆଯିବ ବୋଲି ନିଷ୍ପତ୍ତି ହୋଇଛି । ଜୁଲାନା ଆସନରୁ ଭିନେଶ ଫୋଗାଟଙ୍କୁ ଟିକେଟ ଦିଆଯିବ। ଏଠାରେ କଂଗ୍ରେସ ସ୍ଥିତି ଭଲ ନାହିଁ । ତୃତୀୟ ସ୍ଥାନରେ ରହିଛି କଂଗ୍ରେସ । ଏହାକୁ ଆନୁଷ୍ଠାନିକ ଭାବେ ଘୋଷଣା କରାଯାଇ ନାହିଁ। କିନ୍ତୁ ଦିଲ୍ଲୀ ରାଜନୀତି ମହଲରେ ଏହା ହିଁ ଚର୍ଚା ହେଉଛି ।
ଭିନେଶଙ୍କ ଶାଶୁ ଘର ଆସନରୁ ଲଢ଼ିବେ । କଂଗ୍ରେସ ଜିତିବା ପାଇଁ ଜାଟ ଭୋଟର ଉପରେ ନିର୍ଭର କରିବ । ବାଦଲି ଆସନ ବଜରଙ୍ଗ ପୁନିଆଙ୍କ ଗୃହ ଜିଲ୍ଲା | ବର୍ତ୍ତମାନ କଂଗ୍ରେସ ବାଦଲି ଆସନକୁ ନିଜ ହାତରେ ରଖିଛି । ଜେଜେପି ଜୁଲାନା ଆସନକୁ ନିଜ ହାତରେ ରଖିଛି । ଏଭଳି ପରିସ୍ଥିତିରେ ବାଦଲି ଆସନରେ ଟିକେଟ୍ ପାଇବା ପାଇଁ କଂଗ୍ରେସକୁ ଏହି ସିଟ୍ ଖାଲି କରିବାକୁ ପଡିବ। ତେବେ ଏହି ଦୁଇ ଆସନରେ ବିଜେପି ସହ ଲଢ଼େଇ ହେବ କୁହାଯାଉଛି ।
ଫୋଗାଟ ଏବଂ ବଜରଙ୍ଗ ପୁନିଆ କ୍ରମାଗତ ଭାବରେ କେନ୍ଦ୍ର ସରକାରଙ୍କୁ ବିରୋଧ କରୁଛନ୍ତି। ପୂର୍ବତନ କୁସ୍ତି ସଙ୍ଗଠନର ସଭାପତି ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ଉଭୟ କୁସ୍ତିଯୋଦ୍ଧା ବିରୋଧ ପ୍ରଦର୍ଶନ କରିଛନ୍ତି। ଉଭୟଙ୍କ ପ୍ରଦର୍ଶନ ଏବଂ ଆଭିମୁଖ୍ୟକୁ କଂଗ୍ରେସ ନେତା ଭୁପିନ୍ଦର ସିଂ ହୁଡା ଖୋଲାଖୋଲି ସମର୍ଥନ କରିଛନ୍ତି।