ରାଜ୍ୟରେ ବାଂଲାଦେଶୀ ଅନୁପ୍ରବେଶକାରୀ ଚିହ୍ନଟ ହେବେ । କିନ୍ତୁ ତାପରେ କଣ ହେବ ସରକାର କିଛି ସ୍ପଷ୍ଟ କରିନାହାଁନ୍ତି । ବର୍ଷ ବର୍ଷ ଧରି ବାଂଲାଦେଶୀ ଅନୁପ୍ରବେଶ କରି ବେନିୟମ ଭାବେ ରହୁଛନ୍ତି । ଖାଲି ରହୁନାହାଁନ୍ତି ଆଧାର କାର୍ଡ ସହ ସରକାରୀ ଯୋଜନାର ଲାଭ ମଧ୍ୟ ପାଉଛନ୍ତି । ରାଜ୍ୟ ସରକାର ସମସ୍ତ ଜିଲ୍ଲାପାଳ ଓ ଏସପିଙ୍କୁ ନିର୍ଦ୍ଦେଶ ଦେଇଛନ୍ତି ବାଂଲାଦେଶୀ ଚିହ୍ନଟ କରିବାକୁ । କିନ୍ତୁ ଏହା କେତେଦୂର କାର୍ଯ୍ୟାକାରୀ ହେଉଛି ତାହା ଦେଖିବାର କଥା । କାରଣ ଭୋଟ ପଲିଟିକ୍ସରେ ବାଂଲାଦେଶୀଙ୍କୁ କିଏ ଚିହ୍ନଟ କରିବ ତାହା କାଠିକର ପାଠ । ନିର୍ଦ୍ଦେଶନାମା ଅନୁସାରେ ତହସିଲ, ବ୍ଳକ ଓ ଥାନାସ୍ତରରେ ଅଧିକାରୀମାନଙ୍କୁ ନେଇ ଏକ ଟିମ୍ ଗଠନ କରି ରାଜ୍ୟର ଅନ୍ୟାନ୍ୟ ଅଂଚଳ ସମେତ କେନ୍ଦ୍ରାପଡ଼ା ଓ ପୁରୀ ଜିଲ୍ଲା ସମେତ ଭୁବନେଶ୍ୱରରେ ରହୁଥିବା ଅନୁପ୍ରବେଶକାରୀମାନଙ୍କୁ ଚିହ୍ନଟ କରିବାକୁ ନିର୍ଦ୍ଦେଶ ଦିଆଯାଇଛି ସତ । ତେବେ ଏହାର କାର୍ଯ୍ୟକାରିତାକୁ ନେଇ ଏବେ ବି ଅନେକ ପ୍ରଶ୍ନ ରହିଛି ।
୨୦୨୧ ମସିହା ସୁଦ୍ଧ ରାଜ୍ୟରେ ମୋଟ ୩୭୪୦ଜଣ ବାଂଲାଦେଶୀ ଅନୁପ୍ରବେଶକାରୀ ବେଆଇନ ଭାବେ ବିଭିନ୍ନ ଜିଲ୍ଲା ଯଥା- ବରଗଡ଼-୨, ଭଦ୍ରକ-୧୯୯, କେନ୍ଦ୍ରାପଡ଼ା-୧୬୪୯, ଭୁବନେଶ୍ୱର-୧୨, ଜଗତସିଂହପୁର-୧୧୧୨, ମାଲକାନଗିରି ୬୫୫, ନବରଙ୍ଗପୁର-୧୦୬ ଓ ଭୁବନେଶ୍ୱରରେ ୧୭ଜଣ ବସବାସ କରୁଥିବା ରେକର୍ଡରେ ରହିଛି । ତେବେ ଏହି ସଂଖ୍ୟା ଲକ୍ଷ ଗୁଣ ହୋଇପାରେ । ବାଂଲାଦେଶୀ ଅନୁପ୍ରବେଶକାରୀଙ୍କ ଦ୍ୱାରା ଅପରାଧିକ କାର୍ଯ୍ୟକଳାପ ବୃଦ୍ଧି ପାଉଥିବା ବିଷୟ ଅନେକ ସମୟରେ ଅଭିଯୋଗ ହୋଇଆସୁଛି । କିନ୍ତୁ ତାହାର ପ୍ରମାଣ ମିଳିପାରିନାହିଁ ।
ରାଜ୍ୟରେ ବାଂଲାଦେଶୀ ଅନୁପ୍ରବେଶକାରୀଙ୍କୁ ଚିହ୍ନଟ ପାଇଁ ରାଜ୍ୟ ସରକାର ସମସ୍ତ ଜିଲ୍ଲାପାଳ ଓ ଏସପିଙ୍କୁ ନିର୍ଦ୍ଦେଶନାମା ଜାରି କରିଛନ୍ତି । ୨୦୨୧ ମସିହା ସୁଦ୍ଧା ରାଜ୍ୟରେ ଚିହ୍ନଟ ହୋଇଥିବା ମୋଟ ୩୭୪୦ଜଣ ବାଂଲାଦେଶୀ ଅନୁପ୍ରବେଶକାରୀଙ୍କୁ ସେମାନଙ୍କ ଦେଶକୁ ଫେରାଇବା ନିଷ୍ପତ୍ତି ଏବେ ସରକାରୀସ୍ତରରେ ବିଚରାଧୀନ ରହିଛି ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୂଚନା ଦେଇଛନ୍ତି ।
ବିଧାୟକ ଅମର କୁମାର ନାୟକ, ଭାସ୍କର ମଢ଼େଇ, ବିଭୂତିଭୂଷଣ ବଳବନ୍ତରାୟ, ମାନସ କୁମାର ଦତ୍ତଙ୍କ ଭିନ୍ନ ଭିନ୍ନ ପ୍ରଶ୍ନର ଲିଖିତ ଉତ୍ତର ଦେଇ ମୁଖ୍ୟମନ୍ତ୍ରୀ ଶ୍ରୀ ମାଝୀ କହିଛନ୍ତି ଯେ, ବାଂଲାଦେଶରେ ସମ୍ପ୍ରତି ଘଟିଥିବା ରାଜନୀତିକ ଘଟଣାବଳୀ ପରିପ୍ରେକ୍ଷୀରେ ବାଂଲାଦେଶୀ ଅନୁପ୍ରବେଶକାରୀଙ୍କୁ ରୋକିବା ପାଇଁ ନିମୟିତ ଭାବେ ସାମୁଦ୍ରିକ ସୀମାରେ ପାଟ୍ରୋଲିଂ କରାଯାଇ ଅନୁପ୍ରବେଶ ରୋକିବା ଉପରେ ତୀକ୍ଷ୍ଣ ନଜର ରଖାଯାଉଛି । ଏନପିଆର କାର୍ଡ ରିଡର ମେସିନ ଦ୍ୱାରା ମାଛ ମାରିବାକୁ ଆସୁଥିବା ଓ ଯାଉଥିବା ଲୋକମାନଙ୍କ ପରିଚୟ ପତ୍ର ଯାଂଚ କରାଯାଉଛି । ବାଂଲାଦେଶରୁ ଅନୁପ୍ରବେଶକାରୀଙ୍କୁ ରୋକିବା ପାଇଁ ଓଡ଼ିଶାର ସମସ୍ତ ଉପକୂଳ ଜିଲ୍ଲାର ଏସପିମାନଙ୍କୁ ସଜାଗ ରହି ଜଳପଥରେ ପାଟ୍ରୋଲିଂ କରିବା ପାଇଁ ନିର୍ଦ୍ଦେଶ ଦିଆଯାଇଛି ।
