ବାଲେଶ୍ବର ଜିଲ୍ଲା ରେମୁଣା ଅଧୀନ ଥାନା ବାଲଗୋପାଲପୁର ଶିଳ୍ପାଞ୍ଚଳରେ ଚାଞ୍ଚଲ୍ୟକର ଘଟଣା ଘଟିଛି । ସ୍ଥାନୀୟ ଏକ ତିନି ମହଲା ପରିତ୍ୟକ୍ତ କୋଠାରୁ ଗତକାଲି ସଂଧ୍ୟାରେ ନାବାଳିକାଙ୍କ ମୃତଦେହ ଉଦ୍ଧାର ହୋଇଛି । ଯାହା ଅନୁମାନ କରାଯାଉଛି ତାଙ୍କର ଦୁଷ୍କର୍ମ ପରେ ହତ୍ୟା ହୋଇଛି ।
ମିଳିଥିବା ସୂଚନା ମୁତାବକ ସ୍ଥାନୀୟ ଜଣେ ନାବାଳିକା ଗତ ମଙ୍ଗଳବାର ଦିନ ସକାଳୁ ସ୍ଥାନୀୟ ନୂଆପାଢୀ ପଞ୍ଚାୟତର ଜଣେ ଯୁବକଙ୍କ ଦ୍ବାରା ଅପହରଣ ହୋଇଥିଲେ । ଯୁବକ ଜଣକ ପୁରୀ ତରକାରୀ ଖାଇବାକୁ ଦେବା ବାହାନାରେ ଅପହରଣ କରିନେଇଥିବା ଅଭିଯୋଗ ହୋଇଥିଲା । ଏନେଇ ନାବାଳିକାଙ୍କ ବାପା ସେହିଦିନ ସଂଧ୍ୟାରେ ରେମୁଣା ଥାନାରେ ଏତଲା ଦେଇଥିଲେ ଫଳରେ ପୁଲିସ ତଦନ୍ତ ଜାରି ରଖିଥିଲା ।
କୌଣସି ସୂତ୍ରରୁ ଶିଳ୍ପାଞ୍ଚଳସ୍ଥିତ ତିନି ମହଲା କୋଠାରେ ଅପହୃତା ନାବାଳିକାଙ୍କ ଶବ ପଡ଼ିଥିବା ଜାଣିବାକୁ ପାଇଥିଲା ପୁଲିସ । ରାତି ପ୍ରାୟ 8 ଟା ବେଳେ ସେଠାକୁ ଯାଇ ଯାଞ୍ଚ କରିବାରୁ ନାବାଳିକାଙ୍କ ମୃତଦେହ ମିଳିଥିବା ଅନ୍ୟପଟେ ଖବର ପାଇ ଏସପି ସାଗରିବା ନାଥ ମଧ୍ୟ ସେଠାରେ ରାତି ପ୍ରାୟ 9 ଟା ବେଳେ ପହଞ୍ଚିଥିଲେ ଏବଂ ଘଟଣାର ଅନୁଧ୍ୟାନ କରୁଥିବା ଜଣାପଡ଼ିଛି । ଏକ ପୁଲିସ ଟିମ ଓ ଶିଳ୍ପାଞ୍ଚଳ ସୁରକ୍ଷା କର୍ମୀ ଉକ୍ତ କୋଠା ସହ ଶବକୁ ଜଗି ରହିଛନ୍ତି । ଆଜି ସକାଳେ ସାଇଣ୍ଟିଫିକ ଟିମ ପହଞ୍ଚି ତଦନ୍ତ କରିବା ବୋଲି କୁହାଯାଇଛି ।
