ଭୁବନେଶ୍ବର: ରାଜନେତା ହୋଇ ଧମକ ଦେଇଛନ୍ତି ମମତା ବାନାର୍ଜୀ । ପଶ୍ଚିମବଂଗରେ ଯେଉଁ ହିଂସା ହେଉଛି ସେଥିପାଇଁ ବିଜେପି ଦାୟୀ ବୋଲି କହିଥିଲେ ମମତା । ମୋଦିଙ୍କୁ ଏଥିପାଇଁ ଦାୟୀ କରିଥିଲେ । ଏହାର ଜବାବ ଦିଆଯିବ ଏବଂ ସବୁସ୍ଥାନରେ ନିଆଁ ଜଳିବ ବୋଲି କହିଥିଲେ ମମତା । ଏହାକୁ ନେଇ ଓଡ଼ିଶା, ଆସାମ, ମଣିପୁର ମୁଖ୍ୟମନ୍ତ୍ରୀ ବିରୋଧ କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସିଧା ଚେତାବନୀ ଦେଇଥିଲେ ମମତା ବାନାର୍ଜୀ । ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଏଭଳି ମନ୍ତବ୍ୟକୁ ନେଇ ଏବେ ସାରା ଦେଶରେ ପ୍ରତିବାଦ ଉଠିଛି । । ବିଜେପି ନେତାଙ୍କ ସହ ତିନି ରାଜ୍ୟର ମୁଖ୍ୟମନ୍ତ୍ରୀ ଏହାକୁ ତୀବ୍ର ସମାଲୋଚନା କରିଛନ୍ତି।
ରାଜନୈତିକ ଫାଇଦା ଉଦ୍ଦେଶ୍ୟରେ ବିଜେପି ଏପରି କରୁଥିବା କହି ମମତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଗତକାଲି ଖୋଲା ଧମକ ଦେଇଛନ୍ତି। ଯଦି ପଶ୍ଚିମବଙ୍ଗ ଜଳିବ ତେବେ ଆସାମ, ନର୍ଥ ଇଷ୍ଟ, ଉତ୍ତରପ୍ରଦେଶ, ବିହାର, ଝାଡଖଣ୍ଡ, ଓଡ଼ିଶା, ଦିଲ୍ଲୀ ମଧ୍ୟ ଜଳିବ। କାହାକୁ ଛାଡ଼ିବୁ ନାହିଁ। ଆପଣଙ୍କ ଚେୟାର ଟଳମଳ କରିଦେବୁ ବୋଲି ସେ ଚେତାବନୀ ଦେଇଛନ୍ତି।
ଓଡ଼ିଶାର ନାମ ନେଇଥିବାରୁ ମମତାଙ୍କ ମନ୍ତବ୍ୟକୁ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସମାଲୋଚନା କରିଛନ୍ତି । ଓଡ଼ିଶା ହେଉଛି ଶାନ୍ତିପ୍ରିୟ ରାଜ୍ୟ । ଓଡ଼ିଶା ସଂପର୍କରେ ଏଭଳି ହିଂସାତ୍ମକ ଟିପ୍ପଣୀ ଦେବା ଲାଗି ଆପଣଙ୍କୁ ଏ ଅଧିକାର ଦେଲା କିଏ ବୋଲି ମମତାଙ୍କୁ ପ୍ରଶ୍ନ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।
ମୁଖ୍ୟମନ୍ତ୍ରୀ କହିଛନ୍ତି ଓଡ଼ିଶା ଏକ ଶାନ୍ତିପ୍ରିୟ ରାଜ୍ୟ । ଏଠି ହିଂସାକୁ ପ୍ରଶୟ ଦିଆଯାଏନାହିଁ । ଓଡିଶାବାସୀ ଦାୟିତ୍ୱବାନ ଓ ସଚେତନ ଅଛନ୍ତି। ତେଣୁ ଆପଣଙ୍କ ନକରାତ୍ମକ ମନ୍ତବ୍ୟ ସମ୍ବେଦନହୀନ ମନ୍ତବ୍ୟକୁ ଆମ ଓଡ଼ିଶାବାସୀ କେବେ ଗ୍ରହଣ କରିବେ ନାହିଁ। ପ୍ରଥମେ ଦୋଷୀଙ୍କୁ ଦଣ୍ଡ ଦିଅନ୍ତୁ । ପ୍ରତିଶୋଧ ପରାୟଣ ହେବା ଠିକ୍ ନୁହେଁ । ଏଭଳି ମନ୍ତବ୍ୟ ବିପଦଜନକ ବୋଲି କହିଛନ୍ତି ମୁଖ୍ୟମନ୍ତ୍ରୀ।
ସେପଟେ ମମତା ବାନାର୍ଜୀଙ୍କ ମନ୍ତବ୍ୟକୁ ନେଇ ଆସାମ ମୁଖ୍ୟମନ୍ତ୍ରୀ କଡା ସମାଲୋଚନା କରିଛନ୍ତି । ସେ କହିଛନ୍ତି ଆସାମକୁ ମମତା ପଶ୍ଚିମବଂଗ ଭାବନ୍ତୁ ନାହିଁ । ଏଠି ହିଂସାକାରୀଙ୍କୁ ମାଫ ନାହିଁ । ଧମକ ଦେବାକୁ କିଏ ସାହସ ଦେଲା ବୋଲି ମମତାଙ୍କୁ ପଚାରିଛନ୍ତି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା। ମଣିପୁର ମୁଖ୍ୟମନ୍ତ୍ରୀ ମଧ୍ୟ ମମତାଙ୍କ କଥାକୁ ନେଇ ନାପସନ୍ଦ କରିଛନ୍ତି। ସୋସିଆଲ ମିଡିଆ ‘ଏକ୍ସ’ରେ କଡ଼ା ସମାଲୋଚନା କରିଛନ୍ତି ଦୁଇ ରାଜ୍ୟର ମୁଖ୍ୟମନ୍ତ୍ରୀ। ସେହିପରି ଉତ୍ତରପୂର୍ବାଞ୍ଚଳ ପ୍ରତି ମନ୍ତବ୍ୟ ପାଇଁ କ୍ଷମା ମାଗନ୍ତୁ ବୋଲି ଦିଦିଙ୍କୁ କହିଛନ୍ତି ମଣିପୁର ମୁଖ୍ୟମନ୍ତ୍ରୀ ଏନ୍ ବିରେନ ସିଂହ। ରାଜନେତା ହୋଇ ପବ୍ଲିକ ପ୍ଲାଟଫର୍ମରେ ହିଂସା କଥା କହିବା ନିନ୍ଦନୀୟ ବୋଲି ବୁଦ୍ଧିଜୀବୀମାନେ ସ୍ବର ଉଠାଇଛନ୍ତି ।
ମମତାଙ୍କ ଏପରି ଘୃଣାଭାବ ପ୍ରଚାରକୁ ଲୋକେ ପ୍ରଶୟ ଦେବେନି ବୋଲି ବିଜେପି ପକ୍ଷରୁ କୁହାଯାଇଛି । ଅଭୟାଙ୍କୁ ଦୁଷ୍କର୍ମ, ହତ୍ୟା ଘଟଣାକୁ ନେଇ ଆନ୍ଦୋଳନରେ କମ୍ପୁଛି କୋଲକାତା। ସାରା ରାଜ୍ୟରେ ବିକ୍ଷୋଭ ଓ ପ୍ରତିବାଦ ଜାରି ରହିଛି। ବିଭିନ୍ନ ସ୍ଥାନରେ ପୋଡାଜଳା ସାଙ୍ଗକୁ ହେଉଛି ଭଙ୍ଗାରୁଜା। ଟ୍ରେନିଂ ମହିଳା ଡାକ୍ତରଙ୍କୁ ଦୁଷ୍କର୍ମ ପରେ ହତ୍ୟା ମାମଲାକୁ ନେଇ ଛାତ୍ରସମାଜ ଏବଂ ବିଜେପି ମମତା ବାନାର୍ଜୀଙ୍କ ଇସ୍ତଫା ଦାବି କରୁଛନ୍ତି । ପଶ୍ଚିମବଂଗରେ ନିର୍ବାଚନ ପୂର୍ବରୁ ଏବଂ ପରେ ରାଜନୈତିକ ହିଂସାମାମଲା ବୃଦ୍ଧି ପାଇଛି । ବିଜେପି ଏବଂ ଟିମସି ମଧ୍ୟରେ କଡ଼ା ସଂଘର୍ଷ ହେଉଛି । ମମତା ବାନାର୍ଜୀ ଜାଣି ଶୁଣି ତାଙ୍କ ବିରୋଧୀଙ୍କ ସ୍ବର ଚପାଇବାକୁ ଉଦ୍ୟମ କରୁଥିବା ଅଭିଯୋଗ ହେଉଛି । ଆଉ ଏହାରି ଭିତରେ ପଶ୍ଚିମବଂଗରେ ମମତାଙ୍କ ଗାଦି ଟଳମଳ ହେବାରେ ଲାଗିଛି । ଆଗାମୀ ଦିନରେ ନିଜ ରାଜ୍ୟର ଲୋକମାନେ ଆଉ ମମତାଙ୍କୁ ପସନ୍ଦ କରୁନାହାଁନ୍ତି । ଗୁଣ୍ଡାମାନଙ୍କୁ ମମତା ପ୍ରଶୟ ଦେଉଥିବା ସାଧାରଣରେ ଚର୍ଚା ହେଉଛି । ଆଉ ଏହାରି ଭିତରେ ମହିଳା ଡାକ୍ତରଙ୍କୁ ଦୁଷ୍କର୍ମ ହତ୍ୟାମାମଲା କୁ ନେଇ ଜନସାଧାରଣ ଆନ୍ଦୋଳନକୁ ଓହ୍ଲାଇଛନ୍ତି । ଏହି ଘଟଣାକୁ ନେଇ ମମତା ଯେପରି ଧମକ ଦେଇଛନ୍ତି ତାହାର ଜବାବ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଣ ଦେଉଛନ୍ତି ତାହାକୁ ଅପେକ୍ଷା ।
