ରାଞ୍ଚି: ଝାରଖଣ୍ଡର ରାଜନୀତିରେ ପରିବର୍ତ୍ତନ ଆସିବାର ସଂଭାବନା ରହିଛି । ପୂର୍ବତନ ମୁଖ୍ୟମନ୍ତ୍ରୀ ତଥା ଜେଏମଏମର ବରିଷ୍ଠ ନେତା ଚମ୍ପାଇ ସୋରେନ ଜେଏମଏମ ଦଳ ସହ ସବୁ ସମ୍ପର୍କଚ୍ଛିନ୍ନ କରିଛନ୍ତି। ଆଜି ସେ ଜେଏମଏମ ବଦଳରେ ବିଜେପିରେ ସାମିଲ ହେବେ । ସେ ବିଜେପିରେ ମିଶିବାକୁ ଯାଉଥିବା ବେଳେ ଝାରଖଣ୍ଡ ପାଇଁ ସଂଘର୍ଷ ଜାରି ରଖିବେ ବୋଲି କହିଛନ୍ତି। ତାଙ୍କ ପାଇଁ ଲୋକଙ୍କ ସମସ୍ୟା ବଡ଼ ପ୍ରସଙ୍ଗ । ଆଉ ସେ ଲୋକଙ୍କ ପାଇଁ କାମ କରିବାକୁ ବିଜେପିରେ ସାମିଲ ହେଉଥିବା କହିଛନ୍ତି ।
ଚମ୍ପାଇ ସୋରେନ ତାଙ୍କ ବିବୃତିରେ ଯାହା କହିଛନ୍ତି ଏଥିରେ ଦଳରେ ତାଙ୍କ ସମ୍ମାନ ହାନି ହୋଇଥିବା ସ୍ପଷ୍ଟ କରିଛନ୍ତି । ତାଙ୍କୁ ଜେଏଏମ ଛାଡ଼ିବାକୁ ବାଧ୍ୟ କରାଯାଇଛି। ବର୍ତ୍ତମାନ ଜେଏମଏମ ତା’ର ଲକ୍ଷ୍ୟ ଓ ଆଭିମୁଖ୍ୟ ହରାଇ ସାରିଛି । ତେଣୁ ସେ ଦଳରେ ରହିବାକୁ ଠିକ୍ ଭାବିଲେ ନାହିଁ ବୋଲି ମଧ୍ୟ ଚମ୍ପାଇ ଅଭିଯୋଗ କରିଛନ୍ତି।
ଚମ୍ପାଇଙ୍କ କହିବା କଥା “ଜେଏମଏମ ମୋ ପରିବାର ଭଳି ଥିଲା। ମୁଁ ଦଳ ଛାଡ଼ିବି ବୋଲି କେବେ ହେଲେ ସ୍ୱପ୍ନରେ ମଧ୍ୟ ଭାବି ନଥିଲି। କିନ୍ତୁ ମୋତେ ଦଳରେ ଯେଭଳି ସମ୍ମାନ ମିଳୁଥିଲା ଏବେ ଆଉ ସେପରି ମିଳୁନାହିଁ । କାମ କରିବାକୁ ଦିଆଯାଉନାହିଁ । ଯାହା ମୋତେ କଷ୍ଟ ଦେଇଥିଲା। ତେଣୁ ମୁଁ ଦଳ ଛାଡୁଛି ।
ମୁଁ ଏପରି ଗୋଟିଏ କଠିନ ପଦକ୍ଷେପ ନେବାକୁ ବାଧ୍ୟ ହୋଇଛି। ଜେଏମଏମ କାର୍ଯ୍ୟଶୈଳୀ ଓ ନୀତିରେ ବିମୁଖ ହୋଇ ଦଳ ଛାଡ଼ିବାକୁ ନିଷ୍ପତ୍ତି ନେଇଛି। ଦୟା କରି ମୋ ଇସ୍ତଫାପତ୍ରକୁ ଗ୍ରହଣ କରି ନିଆଯାଉ।”
ସେ କହିଛନ୍ତି ସନ୍ଥାଲ ପ୍ରଗଣା ଅଞ୍ଚଳରେ ଆଦିବାସୀଙ୍କ ପରିଚୟର ସୁରକ୍ଷା ପାଇଁ ସେ ବିଜେପିରେ ମିଶୁଛନ୍ତି । ଆଦିବାସୀଙ୍କ ଉନ୍ନତି ପାଇଁ ବିଜେପି ଅନେକ କାର୍ଯ୍ୟ ହାତକୁ ନେଇଛି । ସେ ବିଜେପିରେ ସାମିଲ ହୋଇ ଏସବୁ କାର୍ଯ୍ୟକୁ ପୁଣି ଆଗକୁ ନେବେ । ଏହା ସହିତ ସେ ଏକ ବଡ଼ କଥା କହିଛନ୍ତି ଆଦିବାସୀମାନଙ୍କ ଜଙ୍ଗଲ, ଜମି ଉପରେ ବାଂଲାଦେଶ ଅନୁପ୍ରବେଶକାରୀମାନେ ଆଖି ପକାଇଛନ୍ତି । ଆଦିବାସୀମାନଙ୍କ ହକକୁ କେହି ଛଡ଼ାଇ ନେଇପାରିବେ ନାହିଁ ବୋଲି ସେ କହିଛନ୍ତି ।
ଏଠାରେ ସୂଚନାଯୋଗ୍ୟ ଦୁର୍ନୀତି ଅଭିଯୋଗରେ ହେମନ୍ତ ସୋରେନ ଜେଲ ଯିବା ପରେ ଝାଡ଼ଖଣ୍ଡର ମୁଖ୍ୟମନ୍ତ୍ରୀ ହୋଇଥିଲେ ଚମ୍ପାଇ ସୋରେନ। ସେ ସମୟରେ କୁହାଯାଉଥିଲା ଚମ୍ପାଇ ମୁଖ୍ୟମନ୍ତ୍ରୀ ଭାବେ ଗୋଟିଏ ଟର୍ମ ଶେଷ କରିବେ । କିନ୍ତୁ ହେମନ୍ତ ଜେଲରୁ ଜାମିନରେ ଆସିବା ପରେ ଚମ୍ପାଇଙ୍କୁ ହଟାଇ ପୁଣି ମୁଖ୍ୟମନ୍ତ୍ରୀ ହୋଇଥିଲେ । ଏହାପରେ ଜେଏମ୍ଏମ୍ରେ ବିବାଦ ଦେଖାଦେଇଥିଲା। ଝାରଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ତଥା ଜେଏମଏମର ବରିଷ୍ଠ ନେତା ଚମ୍ପାଇ ସୋରେନଙ୍କୁ ଦଳ ଗୁରୁତ୍ବ ଦେଇନଥିଲା । ଯାହା ଫଳରେ ଦଳର ନେତାମାନେ ମଧ୍ୟ ତାଙ୍କୁ ସମ୍ମାନ ଦେଇନଥିଲେ । ତାଙ୍କୁ କୋଣଠେସା କରି ରଖାଯାଇଥିଲା । ତେବେ ବିଜେପିରେ ଯୋଗ ଦେବା ପରେ ଆଗାମୀ ନିର୍ବାଚନରେ ବିଜେପିକୁ ଫାଇଦା ମିଳିପାରେ ବୋଲି କୁହାଯାଉଛି ।
