କୋଲକାତା ମୃତ ମହିଳା ଡାକ୍ତରଙ୍କ ପାଇଁ ନ୍ୟାୟ ଦାବି ଏବଂ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଇସ୍ତଫା ଦାବିରେ ଆଜି ୧୨ ଘଣ୍ଟିଆ ପଶ୍ଚିମବଙ୍ଗ ବନ୍ଦ ପାଳନ କରୁଛି ବିଜେପି। ରାଜ୍ୟରେ ଏନେଇ ବିଜେପି କର୍ମୀ ନେତାମାନଙ୍କ ଉପରେ ଆକ୍ରମଣ ହେଉଛି । ଗତକାଲି ଛାତ୍ର ଆନ୍ଦୋଳନବେଳେ ପୁଲିସ ମାତ୍ରାଧିକ ବଳ ପ୍ରୟୋଗ କରିଥିଲା । ଆଜି ବିଭିନ୍ନ ସ୍ଥାନରେ ବନ୍ଦ ପ୍ରଭାବ ଦେଖିବାକୁ ମିଳୁଥିବା ବେଳେ ଘଟୁଛି ହିଂସାକାଣ୍ଡ । ଟିଏମସି କର୍ମକର୍ତ୍ତାମାନେ ବିଜେପି ନେତାଙ୍କ ଉପରେ ଆକ୍ରମଣ କରୁଛନ୍ତି । ଏପରି ସ୍ଥିତିରେ ଭାଟପଡ଼ାରେ ଜଣେ ବିଜେପି ନେତାଙ୍କ ଗାଡ଼ି ଉପରକୁ ହୋଇଛି ଅତର୍କିତ ଗୁଳିମାଡ଼ ସହ ବୋମାମାଡ଼ ।
ପଶ୍ଚିମବଙ୍ଗ ଭାଟପଡ଼ାର ବିଜେପି ନେତା ପ୍ରିୟାଙ୍ଗୁ ପାଣ୍ଡେଙ୍କ କାର ଉପରକୁ କିଛି ଲୋକ ଗୁଳି ମାଡ଼ କରିଛନ୍ତି । ଏପରିକି ବୋମା ମାଡ଼ କରିଥିବା ପୋଲିସ ଦେଖିବାକୁ ପାଇଛି । ତାଙ୍କ ଡ୍ରାଇଭର କାର୍ ଚଳାଉଥିବା ବେଳେ ହଠାତ୍ କିଛି ଦୁର୍ବୃତ୍ତ କାର୍ ଉପରକୁ ୬ ରାଉଣ୍ଡ ଗୁଳି ଚଳାଇଥିଲେ। ଏଥିରେ ଡ୍ରାଇଭର ଜଣକ ଆହତ ହୋଇଥିବା ଜଣାଯାଇଛି। ତାଙ୍କୁ ତୁରନ୍ତ ମେଡିକାଲରେ ଭର୍ତ୍ତି କରାଯାଇଛି। ଏହି ଘଟଣାରେ ପୁଲିସ୍ ୩ ଜଣଙ୍କୁ ବାନ୍ଧିଛି।
ଗୁଳିମାଡ଼ ପରେ ଘଟଣାସ୍ଥଳରେ ଭାଟପଡ଼ା ବିଧାୟକ ପୱନ ସିଂ, ପୂର୍ବତନ ସାଂସଦ ଅର୍ଜୁନ ସିଂ ଏବଂ ଅନ୍ୟ ବିଜେପି ନେତା ପହଞ୍ଚିଛନ୍ତି। ବିଜେପି କାର୍ଯ୍ୟକର୍ତ୍ତାମାନଙ୍କୁ ଭୟ ଦେଖାଇବା ପାଇଁ ଏପରି କରାଯାଇଥିବା ସେମାନେ କହିଛନ୍ତି । ଏହି ଗୁଳିକାଣ୍ଡ ପଛରେ ଟିଏମ୍ସିର ହାତ ଥିବା ବିଜେପି ପକ୍ଷରୁ ଅଭିଯୋଗ ହୋଇଛି।
ଚଳିତମାସ ଆରମ୍ଭରେ କୋଲକାତାର ଆରଜି କର ମେଡିକାଲ କଲେଜ ଏବଂ ହସପିଟାଲରେ ୩୧ ବର୍ଷୀୟ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ପରେ ବିକ୍ଷୋଭକାରୀମାନେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଇସ୍ତଫା ଦାବି କରି ଆନ୍ଦୋଳନ ଆରମ୍ଭ କରିଛନ୍ତି।
ବିଜେପିର ପଶ୍ଚିମବଂଗ ରାଜ୍ୟ ସଭାପତି ତଥା କେନ୍ଦ୍ର ମନ୍ତ୍ରୀ ସୁକାନ୍ତ ମଜୁମଦାର କହିଛନ୍ତି ଯେ ମମତା ବାନାର୍ଜୀଙ୍କ “ଏକଛତ୍ରବାଦୀ ଶାସନ”ର ଅନ୍ତ ଘଟିବାକୁ ଯାଉଛି । ତ୍ରୁଣମୂଳ କଂଗ୍ରେସ (ଟିଏମ୍ସି) ସରକାର ଏହି ଘଟଣାରେ ଜନସାଧାରଣଙ୍କ ନ୍ୟାୟ ଦାବି ଉପରେ ଅବହେଳା କରିବା ମହଙ୍ଗା ପଡ଼ିବ ।
ସେହିପରି ଗତକାଲି ଛାତ୍ରମାନେ ପଦଯାତ୍ରା କରିଥିବା ବେଳେ ତାଙ୍କ ଉପରେ ବଳ ପ୍ରୟୋଗ କରିଥିବାରୁ କୋଲକାତା ପୁଲିସ୍କୁ ପଶ୍ଚିମବଙ୍ଗର ବିରୋଧୀ ଦଳର ନେତା ସୁଭେନ୍ଦୁ ଆଧିକାରୀ ନିନ୍ଦା କରିଛନ୍ତି। ଯେଉଁମାନଙ୍କ ନାମରେ ଏଫଆଇଆର ହୋଇଛି ତାହାକୁ ତୁରନ୍ତ ପ୍ରତ୍ୟାହାର କରିବାକୁ ସେ କହିଛନ୍ତି ।
ପ୍ରଦର୍ଶନକାରୀମାନେ ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବିରେ ନବାନ୍ନା ନିକଟରେ ପହଞ୍ଚିବାକୁ ଉଦ୍ୟମ କରୁଥିବା ବେଳେ ପୁଲିସ ଲାଠି ମାଡ଼, ଲୁହବୁହା ଗ୍ୟାସ୍ ଏବଂ ପାଣି ତୋପ ବ୍ୟବହାର କରିଥିଲା। ନବାନ୍ନ ବିରୋଧ ପ୍ରଦର୍ଶନ ସମୟରେ ଗିରଫ ହୋଇଥିବା ଲୋକଙ୍କୁ ଆଇନଗତ ସହାୟତା ଯୋଗାଇବା ପାଇଁ ବିଜେପି ଏକ ହେଲ୍ପଲାଇନ ମଧ୍ୟ ସ୍ଥାପନ କରିଛି। ତେବେ ଏହି ଆନ୍ଦୋଳନ ଆଗକୁ କେଉଁ ରୂପ ନେଉଛି ତାହା ଦେଖିବାକୁ ବାକି ରହିଲା ।
