ଭୁବନେଶ୍ୱର: ସିମ୍ ବକ୍ସ ମାମଲାରେ ପୋଲିସ ତଦନ୍ତ ଚାଲୁ ରହିଛି । ଆତଙ୍କବାଦୀ କାର୍ଯ୍ୟକଳାପରେ ଅଭିଯୁକ୍ତ ଲିପ୍ତ ରହିଛି କି ନାହିଁ ତାହା ହେଉଛି ବଡ଼ ପ୍ରଶ୍ନ । ଏପର୍ଯ୍ୟନ୍ତ ପୋଲିସ କିଛି ସ୍ପଷ୍ଟ କରିପାରିନାହିଁ । ଅଭିଯୁକ୍ତ ରାଜୁ ମଣ୍ଡଳକୁ କମିସନରେଟ୍ ପୋଲିସ ଝାରଖଣ୍ଡର ରାଞ୍ଚିକୁ ନେଉଥିବା ଜଣାଯାଇଛି। ଭୁବନେଶ୍ୱର, କଟକ ପରେ ଝାରଖଣ୍ଡରେ ସିମ୍ ବକ୍ସ ରହିଛି ବୋଲି ତଦନ୍ତରୁ ଜଣାପଡ଼ିବା ପରେ ପୁଲିସ ତାକୁ ରାଞ୍ଚି ନେଉଛି। ଏହି ମାମଲା ଏନଆଇଏ ଯାଂଚ କରିବାର ସଂଭାବନା ରହିଛି ।
ଏହି ମାମଲାର ମୁଖ୍ୟ ଅଭିଯୁକ୍ତ ତଥା ମାଷ୍ଟରମାଇଣ୍ଡ ଅସଦୁର ଜମାନକୁ ଗିରଫ କରିବା ପାଇଁ ଇଣ୍ଟରପୋଲର ସହାୟତା ନେଇଛି କମିସନରେଟ ପୁଲିସ। ଏବେ ଜମାନ କେଉଁଠି ଅଛି କଣ କରୁଛି ତାହା ମଧ୍ୟ ଜଣାପଡ଼ିନାହିଁ । ବାଂଲାଦେଶରେ ରହି ସେ ଭାରତରେ କଣ ପାଇଁ ଏସବୁ କରୁଥିଲା ତାହା ମଧ୍ୟ ସ୍ପଷ୍ଟ ହୋଇନାହିଁ । ଭୁବନେଶ୍ୱର, କଟକରୁ ସିମ୍ ବକ୍ସ ମିଳିବା ପରେ ୫ ଦିନିଆ ପୁଲିସ ରିମାଣ୍ଡରେ ରହିଛି ରାଜୁ ମଣ୍ଡଳ। କମିସନରେଟ ପୁଲିସର ସ୍ପେଶାଲ ସ୍କ୍ୱାର୍ଡର ୨ଟି ଟିମ୍ ରାଞ୍ଚି ଯାଉଛି। ତୃତୀୟ ସିମ୍ ବକ୍ସ ମିଳିବା ପରେ ଆହୁରି ଅଧିକ ତଥ୍ୟ ପୁଲିସକୁ ମିଳିବ। ଆତଙ୍କୀ ଲିଙ୍କ ତଦନ୍ତ ନେଇ ଜାତୀୟ ତଦନ୍ତକାରୀ ସଂସ୍ଥା ଏନଆଇଏ ମଧ୍ୟ ଆସି ଭୁବନେଶ୍ୱରରେ ପହଞ୍ଚିବ ବୋଲି ସୂଚନା ରହିଛି। ଭୁବନେଶ୍ୱର ଓ କଟକରୁ ମୋଟ ୧୨ ଟି ସିମ୍ ବକ୍ସ ଜବତ କରିସାରିଲାଣି ପୁଲିସ।
