ଓଡ଼ିଶାରେ ଆଳୁ ସଙ୍କଟ । ପଶ୍ଚିମବଂଗରେ ଆଳୁ ଫିଙ୍ଗା ଯାଉଛି । ଚାଷୀମାନେ ଧାରଣା ଦେଇଛନ୍ତି । କିନ୍ତୁ ଓଡ଼ିଶାରେ ଆଳୁ ମିଳୁନି । ଆଳୁ ସଂକଟ ରାଜନୈତିକ କାରଣରୁ ସମାଧାନ ହୋଇପାରୁନାହିଁ । ଏବେ ପଶ୍ଚିମବଙ୍ଗ ଗସ୍ତରେ ବାହାରିଛନ୍ତି ଜଗନ୍ନାଥଙ୍କ ବାଡଗ୍ରାହୀ ଜଗୁନୀ ମହାପାତ୍ର। ସେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ଆଲୋଚନା କରିବେ। ରାଗ ରୁଷା ଭୁଲି ଉଭୟ ସରକାର ଏହାର ସମାଧାନ କରିବା ଉଚିତ ବୋଲି ଜଗନ୍ନାଥଙ୍କ ମୁଖ୍ୟ ବାଡଗ୍ରାହୀ ଜଗୁନୀ ମହାପାତ୍ର କହିଛନ୍ତି । ଏପଟେ ଦିନକୁ ଦିନ ଆଳୁ ସମସ୍ୟା ଉତ୍କଟ ହେବାରେ ଲାଗିଥିବାରୁ ଦର ବଢ଼ି ବଢ଼ି ଚାଲିଛି । ଆଳୁ ଗତ କିଛି ଦିନ ଧରି ରାଜ୍ୟକୁ ଆମଦାନୀ ସ୍ୱାଭାବିକ ହୋଇପାରୁନି। ଆଳୁ ଏକ ନିତ୍ୟ ବ୍ୟବହାର୍ଯ୍ୟ ଖାଦ୍ୟ ସାମଗ୍ରୀ ହୋଇଥିବାରୁ ଗରିବଙ୍କଠାରୁ ନିମ୍ନ ମଧ୍ୟବିତ୍ତ ପର୍ଯ୍ୟନ୍ତ ଦରବୃଦ୍ଧିକୁ ନେଇ ସମସ୍ତେ ଚିନ୍ତିତ ଅଛନ୍ତି । ଭୁବନେଶ୍ବର ଭଳି କଟକ ଛତ୍ରବଜାର, ବ୍ରହ୍ମପୁର ପରିବା ମାର୍କେଟ, ବାଲେଶ୍ବର ପରିବା ବଜାର, ସୁନ୍ଦରଗଡ, ନବରଂଗପୁର, ଚୌଦ୍ବାରରେ ଗ୍ରାଉଣ୍ଡଜିରୋରେ ରିଆଲିଟୀ ଚେକ୍ କରିଛି କନକ ନ୍ୟୁଜ୍ ଟିମ୍। ସବୁଠି ଆଳୁ କିଲୋପିଛା ଦାମ ୪୫ ଟଙ୍କା ରହିଛି।
ବଜାରର ରିଆଲିଟୀ ଚେକ୍ କରିବା ପରେ ଗୋଟିଏ କଥା ସ୍ପଟ ହୋଇଛି, ଦର ବୃଦ୍ଧି କଲେ କାର୍ୟ୍ୟାନୁଷ୍ଠାନ ହେବ ବୋଲି ସିନା ମନ୍ତ୍ରୀ କହିଦେଲେ, ହେଲେ ଅଫିସର ସେ କଥାକୁ ଗୁରୁତ୍ବ ଦେଲେନି। କାଁ ଭାଁ ଚଢ଼ାଉ କରି ଚୁପ୍ ହୋଇ ବସି ପଡିଲେ। ଯାହାଫଳରେ କଳାବଜାରୀ କରୁଥିବା ବ୍ୟବସାୟୀ ନିଜ ହିସାବସରେ ବଜାରକୁ ଆଳୁ ଛାଡିବା ସହ ଆଳୁ ସଂକଟର ପରିସ୍ଥିତି ସୃଷ୍ଟି କଲେ। ଆଉ ଦର ବଢ଼ି ଚାଲିଛି। ସେପଟେ ଆଳୁ ସଂକଟକୁ ନେଇ ବିଭିନ୍ନ ସାମାଜିକ ସଂଗଠନ ତାତିଛନ୍ତି। ପଶ୍ଚିମବଙ୍ଗ ସରକାର ଓଡ଼ିଶାକୁ ଆଳୁ ଗାଡ଼ି ନ ଛାଡିବା ପ୍ରସଙ୍ଗରେ ଜିଲ୍ଲା ମଙ୍ଗୁଳି ଛକରେ ପଶ୍ଚିମବଙ୍ଗ ଯାଉଥିବା ଖାଦ୍ୟସାମଗ୍ରୀ ଗାଡ଼ି ଅଟକାଇଛନ୍ତି ବିଭିନ୍ନ ସାମାଜିକ ସଂଗଠନ। ପଶ୍ଚିମବଙ୍ଗ ପର୍ଯ୍ୟାପ୍ତ ଆଳୁ ନ ଛାଡ଼ିବା ପ୍ରତିବାଦରେ ଜୋରଦାର ବିକ୍ଷୋଭ କରିଛନ୍ତି। ପଡ଼ୋଶୀ ପଶ୍ଚିମବଙ୍ଗରୁ ସ୍ବାଭାବିକ ଭାବେ ଆଳୁ ନଆସିବା ଦ୍ବାରା ଓଡିଶାରେ ଲୋକେ ଅଭାବୀର ସମ୍ମୁଖୀନ ହୋଇଛନ୍ତି। ରାଜ୍ୟରେ ଆଳୁ ସଂକଟରୁ ଫାଇଦା ଉଠାଇ ବ୍ୟବସାୟୀମାନେ ମନ ଇଛା ବେପାର କରୁଥିବା ଦେଖାଦେଇଛି। ଆଳୁ ସଂକଟ ଦୂର କରିବା ପାଇଁ ରାଜ୍ୟ ସରକାର ଯେତେ ଯାହା ଉଦ୍ୟମ କଲେ ବି ସଫଳ ହେଉନାହାନ୍ତି। କିଛି ସ୍ଥାନରେ ଆଳୁ କିଲୋ ୫୦ରୁ ୬୦ ଟଙ୍କାରେ ବିକ୍ରି କରାଯାଉଛି।
