ଉନ୍ନତ ଜରୁରୀକାଳୀନ ଚିକିତ୍ସା ପାଇଁ ସରକାର ସମସ୍ତ ବ୍ୟବସ୍ଥା ଗ୍ରହଣ କରୁଛନ୍ତି । ଚିକିତ୍ସା ବିକାଶ ଲକ୍ଷ୍ୟରେ ଆଇସିଏମଆର ଏକ ଜାତୀୟ ସ୍ୱାସ୍ଥ୍ୟ ଅନୁସନ୍ଧାନ ପ୍ରାଥମିକତା ପ୍ରକଳ୍ପ ଆରମ୍ଭ କରିଛି। ସ୍ଵାସ୍ଥ୍ୟ ଭିତ୍ତିଭୂମିରେ ଉନ୍ନତି, ସ୍ୱାସ୍ଥ୍ୟ ସେବା ପ୍ରଦାନକାରୀଙ୍କ ଦକ୍ଷତା ବୃଦ୍ଧି, ସୂଚନା ପ୍ରଯୁକ୍ତିବିଦ୍ୟା ଏବଂ କୃତ୍ରିମ ବୁଦ୍ଧିମତ୍ତା (ଏଆଇ) ଯୁକ୍ତ ଉପକରଣ ଏବଂ ମ୍ୟାପିଂ ସୁବିଧା ଦ୍ୱାରା ଜରୁରୀକାଳୀନ ଚିକିତ୍ସା ବ୍ୟବସ୍ଥାର ଦୃଢ଼ୀକରଣ କରାଯିବାର ଲକ୍ଷ୍ୟ ରହିଛି। ଏଥିସହିତ ଆମ୍ବୁଲାନ୍ସ ସେବାରେ ଉନ୍ନତି, ଗୋଷ୍ଠୀର ଚାହିଦାକୁ ଦୃଷ୍ଟିରେ ରଖି ସେବା ପ୍ରଦାନ ଏବଂ ପ୍ରାଥମିକ ସ୍ତରର ସେବାପ୍ରଦାନକାରୀଙ୍କୁ ତାଲିମ ପ୍ରଦାନ ଆଦି ବ୍ୟବସ୍ଥା ରହିଛି। ହୃଦଘାତ, ମସ୍ତିଷ୍କାଘାତ, ସାପ କାମୁଡ଼ା, ବିଷପାନ, ଶ୍ୱାସକ୍ରୀୟାଜନିତ ଜରୁରୀକାଳୀନ ପରିସ୍ଥିତି ଏବଂ ନବଜାତକ ଓ ପ୍ରସବକାଳୀନ ଭଳି ସାତଟି ଗୁରୁତ୍ଵପୂର୍ଣ୍ଣ ଜରୁରୀକାଳୀନ ପରିସ୍ଥିତିକୁ ସମାଧାନ କରିବାରେ ଏହି ପ୍ରକଳ୍ପ ବେଶ ସହଯୋଗୀ ହେବା ନେଇ ଡ. ବିଶ୍ୱାସ ସୂଚନା ପ୍ରଦାନ କରିଛନ୍ତି।
ଏହି ପ୍ରକଳ୍ପ ମାଧ୍ୟମରେ ପୁରୀ ଜିଲ୍ଲା ସମେତ ଲୁଧିଆନା (ପଞ୍ଜାବ), ଭିଦିଶା (ମଧ୍ୟପ୍ରଦେଶ), ଭଦୋଦରା (ଗୁଜୁରାଟ) ଏବଂ ପଣ୍ଡିଚେରୀରେ ଜରୁରୀକାଳୀନ ଚିକିତ୍ସା ବ୍ୟବସ୍ଥା ପାଇଁ ଏକ ଉଚ୍ଚ-ଗୁଣାତ୍ମକ ରୋଗୀକୈନ୍ଦ୍ରିକ ଏକିକୃତ ମଡେଲ ପ୍ରତିଷ୍ଠା କରାଯିବ ବୋଲି ଏମ୍ସ ଭୁବନେଶ୍ୱର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ୱାସ ପ୍ରକାଶ କରିଛନ୍ତି।
ଆଇସିଏମଆର ଏବଂ ରାଜ୍ୟ ସରକାରଙ୍କ ସହଯୋଗରେ ଏମ୍ସ ଭୁବନେଶ୍ୱର ରାଜ୍ୟରେ ଏହି ପ୍ରକଳ୍ପକୁ ତ୍ୱରାନ୍ୱିତ କରୁଛି। ଏନେଇ ଏମ୍ସ ଭୁବନେଶ୍ୱରରେ ଏକ ଜାତୀୟସ୍ତରୀୟ ପରାମର୍ଶ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ସହଯୋଗୀତାମୂଳକ କାର୍ଯ୍ୟପନ୍ଥା ମାଧ୍ଯମରେ ଭାରତରେ ଜରୁରୀକାଳୀନ ଚିକିତ୍ସା ବ୍ୟବସ୍ଥାକୁ ଦୃଢ଼ କରିବା ରଣନୀତି ଶୀର୍ଷକ ପ୍ରସଙ୍ଗରେ ଆୟୋଜିତ ଉକ୍ତ ବୈଠକରେ ପ୍ରମୁଖ ଅଂଶୀଦାରମାନେ ଆଲୋଚନା କରିଥିଲେ। ରାଜ୍ୟ ସରକାରଙ୍କ ସହଯୋଗରେ ଏହି ମଡେଲର ବିକାଶ ତଥା କାର୍ଯ୍ୟକାରୀ କରିବା ପାଇଁ ଏମ୍ସ ଭୁବନେଶ୍ୱରର ଅତିରିକ୍ତ ପ୍ରଫେସର ଡ. ଅରବିନ୍ଦ କୁମାର ସିଂଙ୍କ ନେତୃତ୍ୱରେ ଏକ ଅନୁସନ୍ଧାନକାରୀ ଦଳ ଗଠନ କରାଯାଇଛି।
ଡ. ଆଶୁତୋଷ ବିଶ୍ୱାସ ଏହି ପ୍ରକଳ୍ପର ଟ୍ରେନିଂ ମାନୁଆଲର ଭିଜନ ଡକ୍ୟୁମେଣ୍ଟ ଉନ୍ମୋଚନ କରିଥିଲେ। ଜିଓ ଟ୍ୟାଗିଂ ସିଷ୍ଟମ, ଆଇଟି, ଏଚଆର, ଏବଂ ଏଚଏମଏସର ଏକୀକରଣ ଉପରେ ଗୁରୁତ୍ବ ଦେବା ସହିତ ପରିବହନ ବ୍ୟବସ୍ଥାରେ ଉନ୍ନତି, ଲାଇଫ୍ ସପୋର୍ଟ ସୁବିଧାଯୁକ୍ତ ଆମ୍ବୁଲାନ୍ସ, ତ୍ୱରିତ ଚିକିତ୍ସା ଏବଂ ଗୋଷ୍ଠୀରେ ମୌଳିକ ଜୀବନ ରକ୍ଷା ତାଲିମ ବାବଦରେ ମତ ରଖିଥିଲେ ଏମ୍ସ କାର୍ଯ୍ୟନିର୍ବାହୀ ନିର୍ଦ୍ଦେଶକ।
ସହଯୋଗିତା, ଉନ୍ନତ ଜ୍ଞାନକୌଶଳ ଏବଂ ବିସ୍ତୃତ ତାଲିମ ମାଧ୍ୟମରେ ଭାରତରେ ଜରୁରୀକାଳୀନ ସ୍ୱାସ୍ଥ୍ୟସେବାରେ ପରିବର୍ତ୍ତନ ଆଣିବା ଦିଗରେ ଏହି ପ୍ରକଳ୍ପ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଦିଗରେ କାର୍ଯ୍ୟ କରିବ।
