ଜନ୍ମଦିନରେ ବିରାଟଙ୍କ ଶତକ, ସଚିନଙ୍କ ୪୯ ଶତକର ସମକକ୍ଷ

ଓଡ଼ିଶା 365(ବ୍ୟୁରୋ): ନିଜର ଜନ୍ମଦିନରେ ଯାଦୁ ଦେଖାଇଛନ୍ତି କିଙ୍ଗ କୋହଲି । ଭାରତର କୋଟି କୋଟି କ୍ରିକେଟପ୍ରେମୀଙ୍କୁ ଦେଇଛନ୍ତି ସ୍ମରଣୀୟ ଶତକ ଉପହାର। ଏହାସହ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ୪୯ ଦିନିକିଆ ଶତକର ସମକକ୍ଷ ହୋଇଛନ୍ତି କୋହଲି । ବିରାଟଙ୍କ ଏହି ଶତକ ବଳରେ କୋଲକାତାର ଇଡେନ ଗାଡେନ୍ସରେ ଖେଳାଯାଉଥିବା ବିଶ୍ବକପର ଏକ ମ୍ୟାଚରେ ଦକ୍ଷିଣ ଆଫ୍ରିକା ଆଗରେ ୩୨୭ ରନର ବିଜୟ ଲକ୍ଷ୍ୟ ରଖିଛି ଭାରତ । ଭାରତ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ରୋହିତ ଶର୍ମା ୪୦ ରନ ଓ ଶୁଭମନ ଗିଲ୍ ୨୩ ରନ କରି ଆଉଟ ହେବା ପରେ କୋହଲି ଓ ଶ୍ରେୟସ ଆୟର ସ୍କୋରକୁ ଦ୍ରୁତ ଗତିରେ ଆଗେଇ ନେବାରେ ସହାୟକ ହୋଇଥିଲା। ଶ୍ରେୟସ ଆୟର ୭୭ ରନରେ ଆଉଟ ହୋଇଯାଇଥିଲେ। କେଏଲ ରାହୁଲ ମଧ୍ୟ କ୍ରିଜରେ ବେଶୀ ସମୟ ରହିପାରିନଥିଲେ । ମାତ୍ର ୮ ରନରେ ସେ ଆଉଟ ହୋଇଯାଇଥିଲେ । ତେବେ ବିରାଟ କୋହଲି ସୂର୍ଯ୍ୟକୁମାର ଯାଦବ ଓ ରବୀନ୍ଦ୍ର ଜାଦେଜାଙ୍କ ଦମଦାର ପ୍ରଦର୍ଶନ ବଳରେ ୫୦ ଓଭରରେ ୩୨୬ ରନ କରିପାରିଛି ଭାରତ ।