ଓଡ଼ିଶା 365 (ବ୍ୟୁରୋ): ୨୦୨୩ ନଭେମ୍ବର ୨ ଥିଲା ବଲିଉଡର କିଙ୍ଗ୍ ଖାନ୍ ଶାହରୁଖଙ୍କ ଜନ୍ମଦିନ । ୫୮ ବର୍ଷରେ ପାଦ ଥାପିଛନ୍ତି ଶାହରୁଖ । ସେ ତାଙ୍କ ଜୀବନକାଳ ମଧ୍ୟରେ ବଲିଉଡକୁ ଅନେକ ହିଟ୍ ଫିଲ୍ମ ଦେଇ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ବର୍ତ୍ତମାନ ସେ ସମସ୍ତଙ୍କ ହୃଦୟରେ ରାଜ୍ କରୁଛନ୍ତି । କେବଳ ଦେଶ ନୁହେଁ ବିଦେଶରେ ମଧ୍ୟ ତାଙ୍କର ଅନେକ ଫ୍ୟାନ ଫଲୋର୍ସ ରହିଛନ୍ତି । ନିଜର ଷ୍ଟାଇଲିସ୍ ଓ ରୋମାଣ୍ଟିକ ଅନ୍ଦାଜ ପାଇଁ ସେ ଚାରିଆଡ଼େ ପରିଚିତ ହୋଇଛନ୍ତି । ପ୍ରତିବର୍ଷ ଭଳି ଏବର୍ଷ ମଧ୍ୟ ଶାହାରୁଖ ଘର ମନ୍ନତ ଆଗରେ ଲାଗିଥିଲା ଫ୍ୟାନ୍ସଙ୍କ ଭିଡ଼। ଜନ୍ମଦିନରେ ତାଙ୍କର ଗୋଟିଏ ଝଲକ ଦେଖିବାକୁ ଫ୍ୟାନ୍ସମାନେ ଚାତକପରି ଚାହିଁରହିଥାଲେ । ହଜାର ହଜାର ଫ୍ୟାନ୍ସ ତାଙ୍କ ଘର ଆଗରେ ଜମା ହୋଇ ତାଙ୍କୁ ଜନ୍ମ ଦିନର ଶୁଭେଚ୍ଛା ଜଣାଇଥିଲେ । ଶାହାରୁଖ ମଧ୍ୟ ନିଜେ ଛାତ ଉପରକୁ ଆସି ହାତ ହଲାଇ ଫ୍ୟାନ୍ସମାନଙ୍କୁ କୃତଜ୍ଞତା ଜଣାଇଥିଲେ । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା ।
ଏହି ଭିଡିରେ ଅନେକ ଚୋର ବି ସାମିଲ ହୋଇଥିବା ଦେଖିବାକୁ ମିଳିଥିଲା । ଯେଉଁମାନେ କି ସୁଯୋଗ ଦେଖି ଶାହରୁଖଙ୍କ ଫ୍ୟାନ୍ସମାନଙ୍କ ଠାରୁ ମୋବାଇଲ ଓ ପର୍ସ ଚୋରି କରି ନେଇଥିଲେ। ଏନେଇ ଥାନାରେ ଅଭିଯୋଗ ହୋଇଥିଲା । ଅଭିଯୋଗ ମୁତାବକ, ଶାହରୁଖଙ୍କୁ ଜନ୍ମଦିନ ଶୁଭେଚ୍ଛା ଜଣାଇବାକୁ ଆସିଥିବା ଶହଶହ ଫ୍ୟାନ୍ସଙ୍କ ମଧ୍ୟରୁ ୩୪ଜଣଙ୍କ ମୋବାଇଲ ଚୋରି ହୋଇଯାଇଥିଲା। ପ୍ରିୟ ଷ୍ଟାରଙ୍କୁ ଜନ୍ମଦିନର ଶୁଭେଚ୍ଛା ଜଣାଇ ଖୁସିରେ ଘରକୁ ଫେରୁଥିବା ବେଳେ ଏଭଳି ଚୋରିର ଶିକାର ହୋଇ ନିରାଶ ହୋଇଯାଇଥିଲେ ଫ୍ୟାନ୍ସମାନେ ।
ସେପଟେ, ଫ୍ୟାନ୍ସମାନେ ଅଭିଯୋଗ କରିଛନ୍ତି ଯେ, ପୁଲିସର କଡ଼ା ସୁରକ୍ଷା ବ୍ୟବସ୍ଥା ଥିଲା। ଏହା ସତ୍ତ୍ବେ ବି ଚୋର କେମିତି ଫୋନ ଚୋରି କରି ନେଇଗଲା ଆମେ ଜାଣିବି ପାରିଲୁ ନାହିଁ। ସେଥିରେ ଶାହରୁଖଙ୍କ ଖୁବ ସୁନ୍ଦର ସୁନ୍ଦର ଫଟୋ ଆମେ ଉଠାଇଥିଲୁ। ଫୋନ ସହିତ ସେ ସ୍ମୃତି ବି ଚାଲିଗଲା। ତେଣୁ ଆମେ ଅନୁରୋଧ କରୁଛୁ ସିସିଟିଭି ଦେଖି ଚୋରକୁ କାବୁ କରି ଆମ ଫୋନକୁ ଜବତ କରନ୍ତୁ ।
