୫୮ ବର୍ଷରେ ପାଦ ଥାପିଲେ କିଙ୍ଗ୍ ଖାନ୍

ଓଡ଼ିଶା 365 (ବ୍ୟୁରୋ): ଆଜି କିଙ୍ଗଖାନଙ୍କ ଜନ୍ମଦିନ । ୫୮ ବର୍ଷରେ ପାଦ ଥାପିଛନ୍ତି ଶାହରୁଖ । ସେ ତାଙ୍କ ଜୀବନକାଳ ମଧ୍ୟରେ ବଲିଉଡକୁ ଅନେକ ହିଟ୍ ଫିଲ୍ମ ଦେଇ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ବର୍ତ୍ତମାନ ସେ ସମସ୍ତଙ୍କ ହୃଦୟରେ ରାଜ୍ କରୁଛନ୍ତି । କେବଳ ଦେଶ ନୁହେଁ ବିଦେଶରେ ମଧ୍ୟ ତାଙ୍କର ଅନେକ ଫ୍ୟାନ ଫଲୋର୍ସ ରହିଛନ୍ତି । ନିଜର ଷ୍ଟାଇଲିସ୍ ଓ ରୋମାଣ୍ଟିକ ଅନ୍ଦାଜ ପାଇଁ ସେ ଚାରିଆଡ଼େ ପରିଚିତ ହୋଇଛନ୍ତି । ପ୍ରତିବର୍ଷ ଭଳି ଏବର୍ଷ ମଧ୍ୟ ଶାହାରୁଖ ଘର ମନ୍ନତ ଆଗରେ ଲାଗିଛି ଫ୍ୟାନ୍ସଙ୍କ ଭିଡ଼। ଜନ୍ମଦିନରେ ତାଙ୍କର ଗୋଟିଏ ଝଲକ ଦେଖିବାକୁ ଫ୍ୟାନ୍ସ ଚାତକପରି ଚାହିଁରହିଥାନ୍ତି । ହଜାର ହଜାର ଫ୍ୟାନ୍ସ ତାଙ୍କ ଘର ଆଗରେ ଜମା ହୋଇ ତାଙ୍କୁ ଜନ୍ମ ଦିନର ଶୁଭେଚ୍ଛା ଜଣାଇଥିଲେ । ଶାହାରୁଖ ମଧ୍ୟ ନିଜେ ଛାତ ଉପରକୁ ଆସି ହାତ ହଲାଇ ଫ୍ୟାନ୍ସମାନଙ୍କୁ କୃତଜ୍ଞତା ଜଣାଇଥିଲେ ।

ଶାହରୁଖ ଖାନ୍ ୨ ନଭେମ୍ବର ୧୯୬୫ରେ ଦିଲ୍ଲୀରେ ଜନ୍ମଗ୍ରହଣ କରିଥିଲେ । ଚଳଚ୍ଚିତ୍ର ‘ଦିୱାନା’ ଜରିଆରେ ସେ ବଲିଉଡରେ ଏଣ୍ଟ୍ରି କରିଥିଲେ । ‘ଡର୍’, ‘ଅଞ୍ଜାମ’, ‘ବାଜିଗର’, ‘ରାଜୁ ବନ୍ ଗୟା ଜେଣ୍ଟଲ୍ ମ୍ୟାନ୍’, ‘କୁଛ୍ କୁଛ୍ ହୋତା ହୈ’, ‘ଦେବଦାସ’, ‘ଦିଲୱାଲେ ଦୁଲହନିୟା ଲେ ଜାୟେଙ୍ଗେ୍’, ‘ଚକ୍ ଦେ ଇଣ୍ତିଆ’ ଭଳି ସିନେମାରେ ସେ ନିଖୁଣ ଭାବେ ଅଭିନୟ କରି ସମସ୍ତଙ୍କ ହୃଦୟରେ ରାଜ କରୁଛନ୍ତି । ନିକଟରେ ‘ପଠାନ୍’ ଓ ‘ଯୱାନ’ ମଧ୍ୟ ଶାହରୁଖଙ୍କୁ ଏକ ନୂଆ ନରିଚୟ ଦେଇଛି । ଏହି ଫିଲ୍ମ ମାଧ୍ୟମରେ ସେ ସାରା ବିଶ୍ୱରେ ରେକର୍ଡ ଭାଙ୍ଗିଛନ୍ତି ।ଯାହାର କ୍ରେଜ୍ ଏବେ ବି ଳୋକମାନଙ୍କ ଭିତରେ ଦେଖିବାକୁ ମିଳୁଛି । ତେବେ ଆଜି ତାଙ୍କ ଜନ୍ମଦିନ ହୋଇଥିବାରୁ ସୋସିଆଲ ମିଡିଆ ଠାରୁ ଆରମ୍ଭ କରି ବଲିଉଡ, ଟଲିଉଡ୍ ଚାରିଆଡୁ ଶୁଭେଚ୍ଛାର ସୁଅ ଛୁଟିଛି ।