ଓଡ଼ିଶା 365 (ବ୍ୟୁରୋ): ଖୁବଶୀଘ୍ର ଦର୍ଶକମାନଙ୍କ ଅପେକ୍ଷାର ଅନ୍ତ ଗଟିବାକୁ ଯାଉଛି । ଦୀର୍ଘ ଦିନର ଅପେକ୍ଷା ପରେ ବଡ଼ ପରଦାକୁ ଆସିବାକୁ ଯାଉଛି ବଲିଉଡ ଭାଇଜାନ ସଲମାନ ଖାନ ଓ କ୍ୟାଟ୍ରିନା କୈଫଙ୍କ ଅଭିନିତ ଫିଲ୍ମ ‘ଟାଇଗର ୩’ । ଯାହାକୁ ଦର୍ଶକମାନେ ଚାତକ ପରି ଚାହିଁ ବସିଥିଲେ । ତେବେ ପ୍ରଶଂସକଙ୍କ ପାଇଁ ଏକ ଖୁସି ଖବର ଆସିଛି । ଫିଲ୍ମର ପ୍ରଥମ ଶୋ ବିଷୟରେ ସୂଚନା ପ୍ରକାଶ ପାଇଛି। ୧୨ ନଭେମ୍ବର ଅର୍ଥାତ୍ ଦିପାବଳୀ ଦିନ ରବିବାର ସକାଳ ୭ଟାରେ ଶୋ ’ଦେଖାଇବାକୁ ୟଶ ରାଜ ଫିଲ୍ମସ୍ ନିଷ୍ପତ୍ତି ନେଇଛି, ଏବଂ ଅଗ୍ରୀମ ବୁକିଂ ୫ ନଭେମ୍ବରରୁ ଆରମ୍ଭ ହେବାକୁ ଯାଉଛି ବୋଲି ସୂଚନା ମିଳିଛି ।
ସେପଟେ କିଛି ଦିନ ପୂର୍ବରୁ ‘ଟାଇଗର-୩’ ‘ର ଆକ୍ସନ୍ ପ୍ୟାକ୍ ଟ୍ରେଲର ଆସିବା ମାତ୍ରେ ସୋସିଆଲ ମିଡିଆରେ ଟ୍ରେଣ୍ଡ କରିବା ଆରମ୍ଭ କରିଛି। ଏହି ଫିଲ୍ମର ଟ୍ରେଲରରେ ସଲମାନ ଖାନ ଏବଂ କ୍ୟାଟ୍ରିନାଙ୍କ ଲୁକ ଦର୍ଶକମାନଙ୍କୁ ବେଶ୍ ଆକୃଷ୍ଟ କରୁଛି । ଟ୍ରେଲରଟି ଜଣେ ମହିଳାଙ୍କ ବ୍ୟାକ୍ଗ୍ରାଉଣ୍ଡ ସ୍ଵରରୁ ଆରମ୍ଭ ହୋଇଛି । ଯାହା ପରେ ସଲମାନ ଖାନଙ୍କ ଏଣ୍ଟ୍ରି ହୋଇଛି ଏକ ଦମ୍ଦାର ଷ୍ଟାଇଲ୍ରେ । ଏହାପରେ ଭାଇଜାନଙ୍କ କିଛି ଡାଏଲଗ ଓ ଆକ୍ସନ ରହିଛି । ପରେ କ୍ୟାଟ୍ରିନାଙ୍କ ଆକ୍ସନ ଲୁକ୍ ଦେଖିବାକୁ ମିଳିଛି । ଯାହା ଦେଖିଲେ ଲାଗୁଛି ଫିଲ୍ମରେ ଅନେକ ଆକ୍ସନ ଓ ସସ୍ପେନସ୍ ଭରି ରହିଛି ।
ସେପ୍ଟେମ୍ବର ୨୭ରେ ‘ଟାଇଗର-୩’ର ଟିଜର ମୁକ୍ତିଲାଭ କରିଥିଲା। ଏଥିରେ ସଲମାନଙ୍କ ଦମ୍ଦାର ଲୁକ୍ ଦର୍ଶକମାନଙ୍କ ହୃଦୟ ଜିତିଥିଲା ।ଏହି ଫିଲ୍ମରେ ସଲମାନ ଖାନଙ୍କ ସହ କ୍ୟାଟ୍ରିନା ଏବଂ ଇମ୍ରାନ ହାଶମୀଙ୍କୁ ମୁଖ୍ୟ ଭୂମିକାରେ ଦେଖିବାକୁ ମିଳିବ । ସେହିପରି ଏହି ଫିଲ୍ମରେ ଇମ୍ରାନଙ୍କୁ ଏକ ଭିଲେନ୍ ଭୂମିକାରେ ମଧ୍ୟ ଦେଖିବାକୁ ମିଳିବ। ମନୀଷ ଶର୍ମାଙ୍କ ନିର୍ଦ୍ଦେଶିତ ଏହି ଫିଲ୍ମ ଦର୍ଶକମାନଙ୍କୁ ବେଶ୍ ଆକୃଷ୍ଟ କରିବ ହୋଲି ପୁରା ଟିମ୍ ଆଶାବାଦୀ ଅଛନ୍ତି । ଏହି ଫିଲ୍ମଟି ଦୀପାବଳିରେ ହିନ୍ଦୀ, ତାମିଲ ଏବଂ ତେଲୁଗୁ ଭାଷାରେ ମୁକ୍ତିଲାଭ କରିବ ବୋଲି ସୂଚନା ରହିଛି ।
