ଓଡ଼ିଶା 365 (ବ୍ୟୁରୋ) : ପ୍ରଥମ ଦଳ ଭାବେ ବିଶ୍ଵକପ୍ ସେମିରୁ ବାଦ୍ ପଡ଼ିଛି ବାଂଲାଦେଶ। ଲଗାତର ୪ଟି ମ୍ୟାଚ୍ ହାରିବା ପରେ ଶେଷରେ ବାଂଲାଦେଶ ଠାରୁ ଜିତିଛି ପାକିସ୍ତାନ। ଚଳିତ ବିଶ୍ୱକପରେ ଏହା ପାକିସ୍ତାନର ତୃତୀୟ ବିଜୟ । ଏହାପୂର୍ବରୁ ଦଳ ୪ଟି ମ୍ୟାଚ ହାରିଥିଲା। କୋଲକାତାର ଇଡେନ ଗାର୍ଡେନ୍ସରେ ଖେଳା ଯାଇଥିବା ଏହି ମ୍ୟାଚ୍ରେ ପାକିସ୍ତାନ ୭ ୱିକେଟରେ ବାଜିମାତ କରିଛି। ଚଳିତ ବିଶ୍ୱକପରେ ଆଜି ପ୍ରଥମ ମ୍ୟାଚ୍ ଖେଳୁଥିବା ଫଖର ଜମାନ ଦମଦାର ୮୧, ଅବଦୁଲ୍ଲା ଶଫିକ ୬୮ ରନର ଇନିଂସ ଖେଳିଛନ୍ତି ।
୮୧ ରନର ଇନିଂସ ଲାଗି ଜମାନଙ୍କୁ ମ୍ୟାନ ଅଫ ଦି ମ୍ୟାଚ ପୁରସ୍କାର ମିଳିଛି। ବାଂଲାଦେଶ ଏ ପର୍ଯ୍ୟନ୍ତ ଖେଳିଥିବା ୭ଟି ମ୍ୟାଚ୍ରୁ ୬ଟିରେ ପରାସ୍ତ ହୋଇଛି। ଅନ୍ୟପଟେ ପାକିସ୍ତାନର ସେମି ଫାଇନାଲ୍ ଆଶା ଉଜ୍ଜୀବିତ ରହିଛି। ବାଂଲାଦେଶ ପଏଣ୍ଟ ଟେବୁଲ୍ର ନବମ ସ୍ଥାନରେ ରହିଛି । ବାଂଲାଦେଶ ପାକିସ୍ତାନ ବିପକ୍ଷ ମ୍ୟାଚ୍ ପୂର୍ବରୁ ଇଂଲଣ୍ଡ, ନ୍ୟୁଜିଲାଣ୍ଡ, ଭାରତ, ଦକ୍ଷିଣ ଆଫ୍ରିକା ଓ ନେଦରଲ୍ୟାଣ୍ଡ ନିକଟରୁ ପରାଜିତ ହୋଇଥିଲା। ନଭେମ୍ବର ୬ରେ ଶ୍ରୀଲଙ୍କା ବିପକ୍ଷରେ ଓ ନଭେମ୍ବର ୧୧ରେ ଅଷ୍ଟ୍ରେଲିଆ ବିପକ୍ଷରେ ଦଳ ୨ଟି ମ୍ୟାଚ୍ ଖେଳିବ ।
