ଓଡ଼ିଶା 365 (ବ୍ୟୁରୋ): ଆମ୍ ଆଦମୀ ପାର୍ଟି ଉପରେ ବର୍ତ୍ତମାନ ଇଡି କଡ଼ା ନଜର ରଖିଛି । ଦିଲ୍ଲୀ ମଦ ଦୁର୍ନୀତି ମାମଲାରେ ଇଡି ଜଣେ ପରେ ଜଣେ ନେତାଙ୍କୁ ଜେରା କରୁଛି । ଏହାରି ଭିତରେ ବର୍ତ୍ତମାନ ମଦ ଦୁର୍ନୀତି ମାମଲାରେ ମନ୍ତ୍ରୀ, ଉପ ମୁଖ୍ୟମନ୍ତ୍ରୀ ପରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କୁ ସମନ ଜାରି କରିଛି ପ୍ରବର୍ତନ ନିର୍ଦ୍ଦେଶାଳୟ । ନଭେମ୍ବର ୨ରେ କେଜରିୱାଲଙ୍କୁ ହାଜର ହେବାକୁ କୁହାଯାଇଛି । ଏହି ମାମଲାରେ ଏପ୍ରିଲରେ ସିବିଆଇ ଅରବିନ୍ଦ କେଜରିୱାଲଙ୍କୁ ପଚରାଉଚରା କରିଥିଲା । ଏହା ଆମ ଆଦମୀ ପାର୍ଟିକୁ ବଡ ଝଟକା ବୋଲି କୁହାଯାଉଛି ।
ମଦ ଦୁର୍ନୀତି ମାମଲାରେ ଆପ୍ ନେତା ମନୀଷ ସିସୋଦିଆଙ୍କୁ ଜାମିନ ଦେବାକୁ ସୁପ୍ରିମକୋର୍ଟ ମନାକରିଦେଇଥିଲେ । ଦିଲ୍ଲୀରେ ୩୩୮ କୋଟିର ମଦ ଦୁର୍ନୀତି ମାମଲାରେ ଆମ ଆଦମୀ ପାର୍ଟି ନେତା ସଂଜୟ ସିଂ ଓ ମନୀଷ ସିସୋଦିଆକୁ ଗିରଫ କରିସାରିଛି ସିବିଆଇ । କେଜରିୱାଲଙ୍କୁ ଇଡି ନୋଟିସ ନେଇ ଦିଲ୍ଲୀ ମନ୍ତ୍ରୀ ସୌରଭ ଭରଦ୍ୱାଜ ପ୍ରତିକ୍ରିୟା ରଖିଛନ୍ତି ।
ସେ କହିଛନ୍ତି, କେନ୍ଦ୍ର ସରକାର ଦିଲ୍ଲୀରେ ଆମ ଆଦମୀ ପାର୍ଟିକୁ ଶେଷ କରିଦେବାକୁ ଚାହୁଁଛନ୍ତି । ୨୦୨୦, ୧୭ ନଭେମ୍ବରରେ ଦିଲ୍ଲୀରେ ନୂଆ ଅବକାରୀ ନୀତି ଲାଗୁ କରାଯାଇଥିଲା । ଏଥିରେ ମଦ ମାଫିଆଙ୍କୁ ଅହେତୁକ ଅନୁକମ୍ପା ଦେଖାଇବା ପାଇଁ ଆଇନର ଉଲ୍ଲଙ୍ଘନ ହୋଇଥିବା ଅଭିଯୋଗ ହୋଇଥିଲା । ଦିଲ୍ଲୀ ମୁଖ୍ୟ ସଚିବଙ୍କ ଏକ ରିପୋର୍ଟ ଆଧାରରେ ୨୨ ଜୁଲାଇ ୨୦୨୨ରେ ତତକାଳୀନ ଉପରାଜ୍ୟପାଳ ମାମଲାର ସିବିଆଇ ତଦନ୍ତ ପାଇଁ ସୁପାରିଶ କରିଥିଲେ ।
