ମନୋଜ ମିଶ୍ରଙ୍କୁ ଅରିନ୍ଦମଙ୍କ  ଅନୁରୋଧ; ବହୁତ ହେଲା ଭାଈ ଆସନ୍ତୁ ସମାଧାନ କରିବା

ଓଡ଼ିଶା 365 (ବ୍ୟୁରୋ): ବହୁତ ହେଲା ଭାଈ, ଆଉ ସହି ହେଉନି । ଦୟାକରି ଏହାକୁ ଏଠି ଶେଷ କରନ୍ତୁ । ଯାହା ହୋଇଯାଇଛି ତାକୁ ଭୁଲି ଯାଆନ୍ତୁ । ଆମ ଘର କଥା ଆମେ ଦୁଇ ଭାଇ ବସି ସମାଧାନ କରିବା । ବ୍ୟକ୍ତିଗତ ବିବାଦ ଏବେ ରାଜନୀତି ରୂପ ଧରିଲାଣି ଯାହା ମୁଁ କେବେ ଭାବିନଥିଲି । ଏନେଇ ମୁଁ ବହୁତ ଦୁଃଖିତ । ଆପଣ ଆସନ୍ତୁ ନଚେତ୍ ମତେ ଡାକନ୍ତୁ । ଆମ ଭିତରେ ଯାହା ହେଇଛି ତାକୁ ଆଲୋଚନା ମାଧ୍ୟମରେ ସମାଧାନ କରିଦେବା ।ଏଭଳି କହି ସମାଧାନ କରିବାକୁ ମନୋଜଙ୍କୁ ସୋସିଆଲ ମିଡିଆରେ ଅନୁରୋଧ କଲେ ଅରିନ୍ଦମ ।

ସୂଚନା ଅନୁଯାୟୀ, ଏକ ବିବାଦୀୟ ଭିଡିଓରୁ ଓଲିଉଡ କଳିର ଆରମ୍ଭ ହୋଇଥିଲା। ଜିତୁ ମଙ୍ଗରାଜ ବନାମ ମନୋଜ ମିଶ୍ର। କୁଆଡ଼େ ଦୁଇଜଣଙ୍କ ମଧ୍ୟରେ ଅନେକ ବିବାଦ ରହିଛି। ଯାହାର ପ୍ରଭାବ ଅରିନ୍ଦମ୍ ଓ ଅନୁଭବଙ୍କ ଅଭିନୀତ ଫିଲ୍ମ ‘ରାମ୍’ ଉପରେ ପଡ଼ିଥିଲା। ଗୋଟିଏ ପକ୍ଷରେ ଅଭିଯୋଗ ହେଲା ମନୋଜ ମିଶ୍ରଙ୍କ ପ୍ରଶଂସକ କହି, ଜିତୁ ମଙ୍ଗରାଜଙ୍କ ଅଭିନୀତ ରାମକୁ ବ୍ୟାନ କରିବାକୁ ଭିଡିଓ ବୁଲୁଥିଲା । ଯାହା ଫଳରେ ସମ୍ବଲପୁରରେ ହଲରେ ରାମ୍ ଫିଲ୍ମକୁ ଚାଲିବାକୁ ଦିଆଯାଇନଥିଲା । ଆଉ ଏହି ବିବାଦ ଭିତରକୁ ଆସିଥିଲେ ପ୍ରଯୋଜକ ଟୁଟୁ ନାୟକ। କଟକ ଭୁବନେଶ୍ୱରର କିଛି ପ୍ରଯୋଜକ ଏବଂ ବିତରକ ଏକାଠି ହୋଇ ମନୋଜ ମିଶ୍ରଙ୍କୁ ଏଥିପାଇଁ ଦାୟୀ କରି ତାଙ୍କୁ ଓଡ଼ିଆ ସିନେମାରୁ ଦୁଇ ବର୍ଷ ବ୍ୟାନ୍ କରିଥିଲେ। ଏହାକୁ ନେଇ ଚିହିଁଙ୍କି ଉଠିଥିଲେ ମନୋଜ ମିଶ୍ର।