ଓଡ଼ିଶା 365 (ବ୍ୟୁରୋ) : ଛାତ୍ରୀ ଜଣଙ୍କୁ ଅସଦାଚରଣ ନୁହେଁ ବରଂ ନିଶା ଦେଇ କଟକ ସ୍ଥିତ ଏକ ଲଜକୁ ନେଇଯାଇ ସେଠାରେ ଗଣଦୁଷ୍କର୍ମ କରାଯାଇଥିଲା । ନାବାଳିକାଙ୍କୁ ତାଙ୍କ ବାନ୍ଧବୀ ନିଶା ଦେଇ କଲେଜରୁ ଅପହରଣ ଘଟଣା । ନାବାଳିକାଙ୍କୁ ଅପହରଣ ଓ ଗଣଦୁଷ୍କର୍ମ ଅଭିଯୋଗରେ ୩ ଅଭିଯୁକ୍ତଙ୍କୁ ପୋଲିସ ଗିରଫ କରିଛି । ତିନି ଅଭିଯୁକ୍ତ ହେଉଛନ୍ତି ଘଟଣାର ମାଷ୍ଟରମାଇଣ୍ଡ ଆଠଗଡ଼ର ସୂର୍ଯ୍ୟକାନ୍ତ ସାହୁ, କଟକ ଲାଲବାଗ ଅଞ୍ଚଳର ସତ୍ୟରଞ୍ଜନ ସାହୁ ଏବଂ କଟକ ସିଡିଏ ସ୍ଥିତ ଓୟୋ ହୋଟେଲ ମ୍ୟାନେଜର ରଞ୍ଜିତ ସ୍ବାଇଁ ।
ଅକ୍ଟୋବର ୧୭ ତାରିଖରେ କୋରୁଆ ସ୍ଥିତ ଏକ ସରକାରୀ କଲେଜର ଯୁକ୍ତ ୨ ଛାତ୍ରୀଙ୍କୁ କଲେଜ ଲେଡିଜ କମନରୁମରେ ତାଙ୍କ ବାନ୍ଧବୀ ପାନୀୟରେ ନିଶା ଦେଇ ଅଚେତ କରିଦେଇଥିଲେ । ପରେ ସେଠାରୁ ତାଙ୍କୁ ଏକ କାରରେ ବସାଇ ଅଭିଯୁକ୍ତ ମାନେ ଅପହରଣ କରିନେଇ କଟକ ଓୟୋ ହୋଟେଲରେ ଗଣଦୁଷ୍କର୍ମ କରି ପରେ କୋରୁଆ ଅଧିନ ଏକ ନାଳ ନିକଟରେ ଫୋପାଡ଼ି ଦେଇ ଚାଲିଯାଇଥିଲେ । ପରେ ଉକ୍ତ ଛାତ୍ରୀଙ୍କୁ ସ୍ଥାନୀୟ ଲୋକଙ୍କ ଦ୍ୱାରା ଉଦ୍ଧାର କରାଯାଇ ପାଟକୁରା ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଇଥିଲା । ଏହାପରେ ଚିକିତ୍ସିତ ହୋଇ ଘରକୁ ଫେରିବା ପରେ ବାପାମାଙ୍କ ପରାମର୍ଶ କ୍ରମେ ନ୍ୟାୟ ପାଇବା ଆଶାରେ କୁଦାନଗରୀ ଥାନାରେ ସେ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଆଧାର କରି ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ।
