ଓଡ଼ିଶା 365 (ବ୍ୟୁରୋ): ଭାରତରେ ଆପଲ୍ କମ୍ପାନୀ ତିଆରି କରୁଥିବା ଆଇଫୋନର ଚାହିଦା ଅନେକ ରହିଛି । ଏହାରି ଭିତରେ ଏହାକୁ ନେଇ ଏକ ବଡ଼ ଖବର ଆସିଛି । ଭାରତରେ ଏଣିକି ଟାଟା ଗ୍ରୁପ ନିର୍ମାଣ କରିବ ଆପଲ୍ ଆଇଫୋନ୍। ଏହି ଘୋଷଣା କରିଛନ୍ତି ଇଲେକ୍ଟ୍ରୋନିକ୍ସ ଏବଂ ପ୍ରଯୁକ୍ତିବିଦ୍ୟା ମନ୍ତ୍ରୀ ରାଜୀବ ଚନ୍ଦ୍ରଶେଖର। ଟାଟା ଗ୍ରୁପ୍ ସହିତ ୱିଷ୍ଟ୍ରନ୍ କାରଖାନା ଅଧିଗ୍ରହଣ ପାଇଁ ଚୁକ୍ତି ଅନୁମୋଦନ ମିଳିଛି, ଯାହା ପରେ ଟାଟା ଗ୍ରୁପ ପାଇଁ ଆଇଫୋନେ ନିର୍ମାଣ ରାସ୍ତା ପ୍ରଶସ୍ତ ହୋଇଛି। ଏହି ବିକାଶ ଆଗକୁ ଭାରତର ମାନୁଫାକଚରିଂ କ୍ଷେତ୍ରକୁ ଶକ୍ତି ଯୋଗାଇବ ଏବଂ ସମଗ୍ର ବିଶ୍ୱରେ ଚାଇନାର ନିର୍ମିତ ନୂତନ ଉପକରଣ ବିକ୍ରୟ ହ୍ରାସ କରିବାର ଆପଲ୍ ର ପୂର୍ବ ରଣନୀତିକୁ ସହଯୋଗ ମିଳିବ।
ୱିଷ୍ଟ୍ରନ୍ କାରଖାନା କର୍ଣାଟକର ସାଉଥଇଷ୍ଟରେ ରହିଛି। ରିପୋର୍ଟ ଅନୁଯାୟୀ ମାର୍ଚ୍ଚ ୨୦୨୪ ମଧ୍ୟରେ ଏହି କାରଖାନାରୁ ପ୍ରାୟ ୧.୮ ବିଲିୟନ ଡଲାର ମୂଲ୍ୟର ଆପଲ୍ ଆଇଫୋନ୍ ପ୍ରସ୍ତୁତ ହେବ। ଟାଟା ଏହି କାରଖାନାରେ ଆପଲ୍ ର ବିଶ୍ୱ ବଜାର ପାଇଁ ଆଇଫୋନ୍ ୧୫ ପ୍ରସ୍ତୁତ କରିବ। ଟାଟା ଅଧିଗ୍ରହଣ କରିଥିବା ୱିଷ୍ଟ୍ରନ୍ କାରଖାନାର ମୂଲ୍ୟ ୬୦୦ ମିଲିୟନ ଡଲାର ଅଟେ। ଏହି ଚୁକ୍ତି ପାଇଁ ଦୁଇ କମ୍ପାନୀ ମଧ୍ୟରେ ଗତ ଏକ ବର୍ଷ ହେବ ଆଲୋଚନା ଚାଲୁଥିଲା। ଏହାକୁ ନେଇ ଏବେ ସବୁଠି ଆଲୋଚନା ଚାଲିଛି ।
