ଓଡ଼ିଶା 365 (ବ୍ୟୁରୋ): ଭୁବନେଶ୍ୱର ଛାତି ଉପରେ ପୁଣି ଏକ ଅପହରଣ ଖବର ଆସିଛି । ତାହା ହେଉଛି ଭୁବନେଶ୍ୱର ଏସପ୍ଲାନେଡ ମଲ୍ ସାମ୍ନାରୁ । ମଲ୍ ସାମ୍ନାରୁ ଜଣେ ଯୁବକଙ୍କୁ ଅପହରଣ କରିନିଆଯାଇଛି । ଅପହୃତ ଆନନ୍ଦପୁର ବେଲବାହାଳିର ପ୍ରିୟବ୍ରତ ସାହୁ ବୋଲି ଜଣାପଡିଛି । କାରରେ ଆସି ୪ରୁ ୫ ଜଣ ଦୁର୍ବୃତ୍ତ ପ୍ରିୟବ୍ରତଙ୍କୁ ଉଠାଇନେଇଛନ୍ତି । ପ୍ରିୟବ୍ରତ ସାଙ୍ଗଙ୍କ ସହ ଏସପ୍ଲାନେଡ ମଲ ବୁଲିବାକୁ ଆସିଥିଲେ । ଏ ନେଇ ସହିଦନଗର ଥାନାରେ ଅଭିଯୋଗ ହୋଇଛି । ପୁଲିସ ତଦନ୍ତ ଆରମ୍ଭ କରିଛି । ସୂଚନା ଅନୁସାରେ, ଟଙ୍କା ପାଇଁ ଏଭଳି ଅପହରଣ ହୋଇଥିବା ଜଣାପଡିଛି । ଅପହୃତ ହୋଇଥିବା ପ୍ରିୟବ୍ରତ ୨୦ ଲକ୍ଷ ଟଙ୍କା ନେଇ ଫେରାଉ ନଥିବା କାରଣରୁ ଟଙ୍କା ଦେଇଥିବା ଲୋକ ଉଠାଇ ନେଇଥିବା ସୂଚନା ରହିଛି । ପୁଲିସ ଅଧିକ ତଦନ୍ତ କରୁଛି ।
ପ୍ରିୟବ୍ରତ ଓ ତାଙ୍କ ସାଙ୍ଗ ଲୋକନାଥ ସନ୍ଧ୍ୟାରେ ଏସପ୍ଲାନେଡ୍ ମଲ୍କୁ ଆସିଥିଲେ। ରସୁଲଗଡ଼ ଶିଳ୍ପାଞ୍ଚଳକୁ ଆସିଥିବା ମଲ୍ କଡ଼ ରାସ୍ତାରେ ପ୍ରିୟବ୍ରତ ଜଣେ ମହିଳାଙ୍କ ସାଙ୍ଗରେ କଥା ହେଉଥିବା ବେଳେ ତାଙ୍କ ସାଙ୍ଗ ଲୋକନାଥ ଛିଡ଼ା ମୋବାଇଲ ଫୋନରେ ଗପୁଥିଲେ। ସେହି ସମୟରେ ଏକ ଧଳା ରଙ୍ଗର କାର୍ ଦ୍ରୁତ ଗତିରେ ଆସି ପ୍ରିୟବ୍ରତଙ୍କ ପାଖରେ ଲାଗିଥିଲା। ତିନି ଜଣ ଯୁବକ ଓହ୍ଲାଇ ତାଙ୍କୁ ମାଡ଼ି ବସି କାରରେ ପୂରାଇ ଦେଇଥିଲେ। ଦ୍ରୁତ ଗତିରେ ମୁଖ୍ୟ ରାସ୍ତା ଆଡ଼କୁ ପଳାଇଥିଲେ। ପଛ ପଟୁ ଏକ କଳା ରଙ୍ଗର ପଲସର୍ ବାଇକରେ ଦୁଇ ଜଣ ଦୁର୍ବୃତ୍ତ କାରକୁ ସୁରକ୍ଷା ଦେବା ଭଳି ଦ୍ରୁତ ଗତିରେ ଯାଇଥିଲେ। ଲୋକନାଥ କିଛି ବାଟ ପିଛା କରିଥିଲେ ମଧ୍ୟ ସେମାନଙ୍କ ଟେର୍ ପାଇ ନ ଥିଲେ ବୋଲି ପୁଲିସ ଆଗରେ କହିଛନ୍ତି। ଏହାର ତଦନ୍ତ ବର୍ତ୍ତମାନ ଜାରି ରହିଛି । ତଦନ୍ତ ପରେ ଏହାର ସତ୍ୟାସତ୍ୟ ପଦାରେ ପଡ଼ିବ ।
