ଓଡ଼ିଶା 365 (ବ୍ୟୁରୋ): ଦିନ ଯେତିକି ଗଡ଼ୁଛି, ସେତେ ଭୟଙ୍କର ହେଉଛି ଇସ୍ରାଏଲ ଏବଂ ପାଲେଷ୍ଟାଇନ୍ ଯୁଦ୍ଧ । ଗାଜା ଉପରେ ଲଗାତର ଆକ୍ରମଣ ଜାରି ରଖିଛି ଇସ୍ରାଏଲ ସେନା । ଯୁଦ୍ଧର ଭୟାବହତା ଭିତରେ ମୃତ୍ୟୁର ହାହାକାର ଦେଖିବାକୁ ମିଳୁଛି । ଆନ୍ତର୍ଜାତୀୟ ଗଣମାଧ୍ୟମରୁ ମିଳିଥିବା ଖବର ଅନୁଯାୟୀ, ଇସ୍ରାଏଲ-ହମାସ୍ ଯୁଦ୍ଧରେ ମୋଟ୍ ମୃତ୍ୟୁ ସଂଖ୍ୟା ୪ ହଜାର ପାର କଲାଣି । ସ୍ଥିତି ଧୀରେ ଧୀରେ ଜଟିଳ ହେବାରେ ଲାଗିଲାଣି ।
ଉତ୍ତର ଗାଜାରେ ବଡ଼ ଧରଣର ଆକ୍ରମଣ ପାଇଁ ଇସ୍ରାଏଲର ସ୍ଥଳସେନା ପ୍ରସ୍ତୁତ ହୋଇଛି । ଯୁଦ୍ଧ ବ୍ୟାପକ ହେଉଥିବା ବେଳେ ଗାଜାରେ ମାନବ ସଙ୍କଟ ବଢିବାରେ ଲାଗିଛି । ଇସ୍ରାଏଲର ତାଗିଦ୍ ପରେ ଉତ୍ତର ଗାଜାରୁ ୧୦ ଲକ୍ଷ ଲୋକ ଘର ଛାଡିଛନ୍ତି । ଏମାନେ ଦକ୍ଷିଣ ଗାଜାରେ ଥିବା ଖାନ୍ ୟୁନିସ୍ ସହର ମୁହାଁ ହୋଇଛନ୍ତି । ହେଲେ ଖାଦ୍ୟ ଓ ପାଣି ବିନା ସେମାନଙ୍କ ଜୀବନ ଦୁର୍ବିସହ ହୋଇ ପଡ଼ିଛି ।
ଜାଫା କ୍ରସଙ୍ଗ ସୀମାରେ ହଜାର ହଜାର ଲୋକ ଅଟକ ରହିଛନ୍ତି । ଗାଜାକୁ ଲାଗିଥିବା ଏହି ଏକମାତ୍ର ସୀମା ରାସ୍ତା ବନ୍ଦ ଥିବାରୁ ଖାଦ୍ୟ ଓ ଅନ୍ୟ ରିଲିଫ୍ ସାମଗ୍ରୀ ପହଞ୍ଚି ପାରୁନାହାନ୍ତି । ବିଶ୍ୱ ସ୍ୱାସ୍ଥ୍ୟ ସଂଗଠନ ସୂଚନା ଅନୁସାରେ ୨୪ ଘଣ୍ଟା ମଧ୍ୟରେ ପାଣି, ବିଜୁଳି ଓ ଇନ୍ଧନ ଶେଷ ହୋଇଯିବ । ଯାହା ଦ୍ୱାରା ସାଂଘାତିକ ପରିସ୍ଥିତି ସୃଷ୍ଟି ହେବ । ଗାଜାରେ ଏପରି ଦୟନୀୟ ସ୍ଥିତିକୁ ଦେଖି ଜାତିସଂଘ ଓ ଅନ୍ୟ କେତେକ ରାଷ୍ଟ୍ର ଯୁଦ୍ଧବିରତି ପାଇଁ ଆହ୍ୱାନ ଦେଇଛନ୍ତି । ଏହାପରେ ଯୁଦ୍ଧ ଆହୁରି ଭୟଙ୍କର ହେବ ବୋଲି ଅନୁମାନ କରାଯାଉଛି ।
