ଓଡ଼ିଶା 365 (ବ୍ୟୁରୋ): ଋଣଭାର ସୁଝିନପାରି କୀଟନାଶକ ପିଇ ଜୀବନ ହାରିଲେ ଚାଷୀ। ଏଭଳି ଦୁଃଖଦ ଖବର ଆସିଛି ଯାଜପୁର ଜିଲ୍ଲା ଧର୍ମଶାଳା ଥାନା ଅଧୀନ ବାଜବାଟୀ ଗ୍ରାମରୁ। ଉକ୍ତ ଗ୍ରାମର ନିତ୍ୟାନନ୍ଦ ପରିଡା ବାଜବାଟୀ ମୌଜାରେ ଦୁଇ ଏକରରୁ ଉର୍ଦ୍ଧ୍ବ ଜମିରେ ଚାଷ କରୁଥିଲେ । ପାଣି ଅଭାବରୁ ଫସଲ ସମ୍ପୂର୍ଣ୍ଣ ରୂପେ ନଷ୍ଟ ହୋଇଯାଇଛି । ଋଣ କରି ଚାଷ କରୁଥିବା ନିତ୍ୟାନନ୍ଦ ଋଣ ଭାର କେଉଁଭଳି ସୁଝିବେ ସେ ନେଇ ଚାଷ ଜମିରେ କୀଟନାଶକ ପିଇ ଦେଇଥିଲେ । ଗୁରୁତର ଅବସ୍ଥାରେ ଚାଷୀଙ୍କ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରେ କଟକ ମେଡିକାଲକୁ ସ୍ଥାନାନ୍ତର କରାଯାଇଥିବା ବେଳେ ସେଠାରେ ତାଙ୍କର ମୃତ୍ୟୁ ହୋଇଛି ।
ପୂର୍ବରୁ ସେ ଜଳ ସମସ୍ୟା ନେଇ ପ୍ରଶାସନ ନିକଟରେ ଅଭିଯୋଗ କରିଥିଲେ ସୁଦ୍ଧା ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଇ ନଥିବା ପରିବାର ପକ୍ଷରୁ ଅଭିଯୋଗ ହୋଇଛି । ତେବେ ଜିଲ୍ଲାପାଳ ତଦନ୍ତ ପରେ ପଦକ୍ଷେପ ଗ୍ରହଣ କରିବେ ବୋଲି କହିଛନ୍ତି ।
