ଓଡ଼ିଶା 365 (ବ୍ୟୁରୋ): ଚର୍ଚ୍ଚାରେ ବଲିଉଡ କ୍ୟୁଇନ୍ ପରିଣୀତି ଚୋପ୍ରା ଓ ଆପ୍ ସାଂସଦ ରାଘବ ଚଢ଼ାଙ୍କ ଯୋଡି । ଗତ କିଛିଦିନ ତଳେ ବିବାହ ବନ୍ଧନରେ ବାନ୍ଧି ହୋଇଛନ୍ତି ରାଘବ-ପରୀ । ଏହି ଯୋଡିଙ୍କ ବିବାହ ଫଟୋ ସୋସିଆଲ ମିଡିଆରେ ବେଶ୍ ଭାଇରାଲ ହୋଇଥିଲା । ଦୁହେଁ ଉଦୟପୁରରେ ପଞ୍ଜାବୀ ରୀତିନୀତରେ ବିବାହ କରିଥିଲେ। ବଲିଉଡ ଏବଂ ରାଜନୀତିର ବହୁ ହାଇ-ପ୍ରୋଫାଇଲ୍ ବ୍ୟକ୍ତିତ୍ୱ ଏହି ବିବାହ ଉତ୍ସବରେ ଯୋଗ ଦେଇଥିଲେ। ବିବାହ ସମୟରେ ଉଭୟ କ୍ରିମ୍ ରଙ୍ଗର ପୋଷାକରେ ନଜର ଆସିଛନ୍ତି । ମନୀଷ ମଲହୋତ୍ରାଙ୍କ ବେଜ ରଙ୍ଗର ଲେହେଙ୍ଗାରେ ପରୀ ଚମତ୍କାର ଦେଖାଯାଉଥିବାବେଳେ, ତାଙ୍କ ପୋଷାକ ସହିତ ମେଳ ଖାଉଥିବା ସମାନ ସୁନ୍ଦର ଅଳଙ୍କାର ମଧ୍ୟ ପିନ୍ଧିଥିଲେ। ସେହିପରି ବର ରାଘବ ଚଢା ଏକ ସୂକ୍ଷ୍ମ, ଚମତ୍କାର ପିଙ୍କ ରଙ୍ଗର ପୋଷାକରେ ଖୁବ୍ ସୁନ୍ଦର ଦିଶୁଥିଲେ। ଯାହାର ଫଟୋ ସୋସିଆଲ ମିଡିଆରେ ବେଶ୍ ଭାଇରାଲ୍ ହୋଇଥିଲା ।
ସେପଟେ ବିବାହ ପରେ ପ୍ରଥମକରି ପରିଣୀତି ବିଦେଶ ଗସ୍ତରେ ଯାଇଛନ୍ତି । ହେଲେ ତାଙ୍କର ଏହି ଗସ୍ତ ସ୍ୱାମୀ ରାଘବଙ୍କ ସହ ନୁହେଁ ବରଂ ସେ ତାଙ୍କର ଏହି ଗସ୍ତକୁ ନିଜ ଗାର୍ଲ-ଗ୍ୟାଙ୍ଗ୍ ସହ ଉପଭୋଗ କରୁଛନ୍ତି। ଅଭିନେତ୍ରୀ ଯେଉଁ ଫଟୋ ସୋସିଆଲ୍ ମିଡିଆରେ ସେୟାର୍ କରିଛନ୍ତି, ସେଥିରେ ସେ ମାଳଦ୍ବୀପ ସମୁଦ୍ର କୂଳରେ ମଜା କରୁଥିବାର ଦେଖିବାକୁ ମିଳିଛି । ହେଲେ ଫଟୋରେ ସେ ନିଜର କିମ୍ବା ତାଙ୍କ ବନ୍ଧୁମାନଙ୍କ ଚେହେରା ଦେଖାଇ ନାହାନ୍ତି। ସେ ହାତରେ କଫି କପ୍ ଧରି ଫଟୋ ଉଠାଇଥିବା ବେଳେ ତାଙ୍କ ଚୁଡି ଦେଖି ଫଟୋରେ ଥିବା ହାତଟି ପରିଣୀତିଙ୍କର ବୋଲି ଚର୍ଚ୍ଚା ହେଉଛି ।
