ଓଡ଼ିଶା 365 (ବ୍ୟୁରୋ): ରିଲିଜ୍ ହୋଇଛି ବହୁ ପ୍ରତିକ୍ଷୀତ ଫିଲ୍ମ ‘ଡଟ୍ ପେନ୍’ । ୨୪ ଟି ସିନେମା ହଲରେ ଏହି ଚଳଚ୍ଚିତ୍ରଟି ମୁକ୍ତିଲାଭ କରିଛି । ଭୁବନେଶ୍ବରର କେଶରୀ ଟକିଜ୍ ଠାରେ ଏହାର ପ୍ରିମିଅର ଅନୁଷ୍ଠିତ ହୋଇଥିଲା। ଏହି ପ୍ରିମିଅର ଶୋ’ ହାଉସଫୁଲ୍ ଥିବାବେଳେ ଏଥିରେ ପ୍ରଯୋଜକ ଯୁଗଳ ଦେବତା, ସଚ୍ଚିକାନ୍ତ ଜେନା, ବିନି ପଟ୍ଟନାୟକ, ଶ୍ରୀଧର ମାର୍ଥା, ଅଜୟ ରାଉତରାଏ, ଟୁଟୁ ନାୟକ, ଅଭିନେତା ଜ୍ୟୋତିରଞ୍ଜନ ମହାନ୍ତି, ଶକ୍ତି ବରାଳ, ବୁଦ୍ଧାଦିତ୍ୟ ମହାନ୍ତି, ସମରେଶ, ବୁଲୁ, ରୋହନ, ଅଭିନେତ୍ରୀ ଦେବଯାନୀ, ଏଲିନା, ଦିବ୍ୟାଦିଶା, ପ୍ରୀତି ପ୍ରମୁଖ ଓଡ଼ିଆ ଫିଲ୍ମ ଜଗତର ପରିଚିତ ବ୍ୟକ୍ତିତ୍ବମାନେ ଏକାଠି ବସି ଏହି ଫିଲ୍ମଟିକୁ ଉପଭୋଗ କରିଥିଲେ ।
‘ଡଟ ପେନ୍’ ଏହା ଭାଇ, ଭଉଣୀ ଓ ଏକ ଡଟପେନ୍ ର କାହାଣୀକୁ ନେଇ ପ୍ରସ୍ତୁତ ହୋଇଛି। ଭାଇ ନିଜ ଭଉଣୀ ପାଇଁ ପ୍ରତିଶୋଧ ନେଉଛି। ହେଲେ କାହିଁକି ଓ ଡଟ୍ ପେନ୍ ସହ କ’ଣ ସମ୍ପର୍କ ଏହି ଦୁଇ ଜଣଙ୍କର? ଏଭଳି ଏକ ସସ୍ପେନ୍ସ ସହ ଜଣେ ସାଇକୋ କିଲର୍ କାହାଣୀକୁ ନେଇ ଫିଲ୍ମଟି ନିର୍ମାଣ ହୋଇଛି । ସୂଚନା ମୁତାବକ, ଢେଙ୍କାନାଳର ଏକ ସତ୍ୟ ଘଟଣାକୁ ନେଇ ଏହି ଫିଲ୍ମଟି ଆଧାରିତ ହୋଇଛି । ଏହାର ଅଧିକାଂଶ ଦୃଶ୍ୟ କାମାକ୍ଷାନଗରରେ ଶୁଟିଂ ହୋଇଛି।
ଏଥିରେ ମୁଖ୍ୟ ଚରିତ୍ରରେ ନଜର ଆସିବେ ଜ୍ୟୋତିରଞ୍ଜନ ଏବଂ ଜ୍ୟୋତିଙ୍କ ଭଉଣୀ ଚରିତ୍ରରେ ନଜର ଆସିଛନ୍ତି ଦିବ୍ୟାଦିଶା ମହାନ୍ତି। ସେହିପରି ଅନ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି ଅଙ୍କିତ କୁମାର। ଏମାନଙ୍କ ବ୍ୟତୀତ ଏହି ଚଳଚ୍ଚିତ୍ରରେ ଶକ୍ତି ବରାଳ, ସୁପ୍ରିୟା ନାୟକ, ଅର୍ପିତା ସାହୁ, ପ୍ରିୟମ୍ବଦା, ଅନନ୍ୟା ଦାସ ଓ ଲୋକପ୍ରିୟ ୟୁଟ୍ୟୁବର ରାଜୁ ଦାସ, ସନ୍ତୁଙ୍କ ପରି ଅନେକ କଳାକାରମାନଙ୍କୁ ମଧ୍ୟ ଏହି ଚଳଚ୍ଚିତ୍ରରେ ଦେଖିବାକୁ ମିଳିଛି । ଏହାସହ ଦୁଇ ନୂଆ ମୁହଁ ପ୍ରୀତି ବିଶ୍ବାଳ ଓ ରୋହନ ଗର୍ଗଙ୍କୁ ଏ ଫିଲ୍ମର ଅନ୍ୟତମ ଆକର୍ଷଣ ଭୂମିକାରେ ଦେଖିବାକୁ ମିଳିଛି । ଏହି କାହାଣୀଟି ଡ. ଦୀପକ କୁମାର ଲେଖିଥିବାବେଳେ, ପ୍ରଯୋଜନା, ନିର୍ଦ୍ଦେଶନା, ଚିତ୍ରନାଟ୍ୟ ଦାୟିତ୍ୱରେ ଅଛନ୍ତି ଅଶ୍ୱିନୀ ତ୍ରିପାଠୀ ।
