ଓଡ଼ିଶା 365 (ବ୍ୟୁରୋ): ଚର୍ଚ୍ଚାରେ ଲୋକପ୍ରିୟ ରିଆଲିଟି ଶୋ’ ବିଗ୍ ବସ୍ ୧୭ । ଏହା ଏମିତି ଏକ ଶୋ’ ଯାହା ଦର୍ଶକମାନଙ୍କୁ ନିଜ ଆଡକୁ ଆକର୍ଷିତ କରିଥାଏ । ସବୁଠୁ ବଡ କଥା ଏହି ଶୋ’ରେ ହୋଷ୍ଟିଂ କରୁଛନ୍ତି ବଲିଉଡର ଭାଇଜାନ ସଲମାନ ଖାନ । ଏହି ଶୋ ଅକ୍ଟୋବର ୧୪ରେ କଲର୍ସ ଟିଭିରେ ପ୍ରସାରଣ ଆରମ୍ଭ ହେବ। କିନ୍ତୁ ଶୋ’ ଆରମ୍ଭ ହେବା ପୂର୍ବରୁ ସମସ୍ତଙ୍କ ମନରେ ଗୋଟିଏ ପ୍ରଶ୍ନ ଉଙ୍କି ମାରୁଛି ଯେ, ଏହି ଶୋ’ ପାଇଁ କେତେ ଫି’ ନିଅନ୍ତି ଭାଇଜାନ?
ସୂଚନା ମୁତାବକ, ବିଗ ବସ ଶୋ’ର ଆୟୋଜନ ପାଇଁ ସଲମାନ ଖାନଙ୍କୁ ବିପୁଳ ପରିମାଣର ଅର୍ଥ ଦିଆଯାଉଛି। ସୁପରଷ୍ଟାର ପ୍ରତି ସପ୍ତାହରେ ୧୨ କୋଟି ଟଙ୍କା ଶୁଳ୍କ ଆଦାୟ କରୁଛନ୍ତି। ଶନିବାର ଏବଂ ରବିବାର ଦିନ ସଲମାନ ଖାନ ଏହି ଶୋ’ର ହୋଷ୍ଟିଂ କରନ୍ତି। ସେ ପ୍ରତି ଏପିସୋଡ ପାଇଁ ୬ କୋଟି ଟଙ୍କା ନେଇଥାନ୍ତି । ତେବେ ସଲମାନ ଖାନ ଟୋଟାଲ୍ ସିଜିନ୍ ପାଇଁ ୨୦୦ କୋଟି ଟଙ୍କା ରୋଜଗାର କରିଥାନ୍ତି । ଯାହା ତାଙ୍କର ଆଗାମୀ ଚଳଚ୍ଚିତ୍ର ଟାଇଗର ‘ଜିନ୍ଦା ହୈ’ର ବଜେଟ୍ ଠାରୁ ବି ଢ଼େର ଅଧିକ ।
