ସ୍ୱାଧିତାର ୭୬ ବର୍ଷ ପରେ ବି ଏମିତି ଅବସ୍ଥା: ଖଟିଆରେ ବୁହା ହେଉଛନ୍ତି ପ୍ରସୂତି

ଓଡ଼ିଶା 365 (ବ୍ୟୁରୋ): ସ୍ୱାଧିତାର ୭୬ ବର୍ଷ ପରେ ବି ରାଜ୍ୟରୁ ସୁଧୁରିନି ଦୟନୀୟ ସ୍ଥିତି। ଏବେ ବି ଖଟିଆରେ ବୁହାହେଉଛନ୍ତି ରୋଗୀ। ସରକାର ଗ୍ରାମାଞ୍ଚଳ ଗୁଡିକରେ ଉତ୍ତମ ରାସ୍ତାଘାଟର ସୁବିଧା ଲାଗି କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । କିନ୍ତୁ କେଉଁଠି ନା କେଉଁଠି ତାହା ଫେଲ ମାରିଥିବା ସ୍ଫଷ୍ଟ ହୋଇଛି । ସୁବର୍ଣ୍ଣପୁର ଜିଲ୍ଲା ବିରମହାରାଜପୁର ବ୍ଲକ ଫବସିପାଲି ଗାଁକୁ ଦେଖିଲେ ଯେକେହି ବି କହିବ ଏକଥା।  ଆଜି ବି ଏହି ଗାଁର ଲୋକେ ମୌଳିକ ସୁବିଧା ପାଇବା ତ ଦୂରର କଥା ଏଠାକୁ ଯିବାକୁ ଭଲ ରାସ୍ତା ଖଣ୍ଡିଏ ବି ନାହିଁ । ଗାଁକୁ ରାସ୍ତା ନଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ନା ବଜାର ଘାଟ ଯାଇପାରୁଛନ୍ତି ନା ପିଲାମାନେ ସ୍କୁଲକୁ ଯାଇପାରୁଛନ୍ତି । ଏପରିକି ଗାଁରେ କାହାରି ଦେହ ଅସୁସ୍ଥ ହେଲେ ଆମ୍ବୁଲାନ୍ସ ଟିଏ ବି ଆସିପାରୁନି । ଏଭଳି ଅସୁବିଧାର ଆଜି ସାମ୍ନା କରିଛନ୍ତି ଫବସିପାଲି ଗାଁର ଫିରୋଜ ମିର୍ଦ୍ଧାଙ୍କ ପତ୍ନୀ ଗୋଲାପି ମିର୍ଦ୍ଧା।

ପ୍ରସବ ବେଦନା ହେବାରୁ ପରିବାର ଲୋକେ ତାଙ୍କୁ ମେଡିକାଲକୁ ନେବାକୁ ଅମ୍ବୁଲାନ୍ସକୁ ଫୋନ୍ କରିଥିଲେ । ହେଲେ ସବୁଦିନିଆ ରାସ୍ତା ନଥିବାରୁ ଗାଁକୁ ଅମ୍ବୁଲାନ୍ସ ଯାଇ ପାରି ନଥିଲା l ଫଳରେ ପରିବାର ଲୋକ ବିଲ ହିଡ ଦେଇ ପ୍ରାୟ ଦୁଇ କିଲୋମିଟର ଏକ ଖଟିଆ ଯୋଗେ ପ୍ରସୂତି ମହିଳାଙ୍କୁ ଆଣୁଥିଲେ l ହେଲେ ଅଧା ବାଟରେ ମହିଳା ଜଣକ ପ୍ରସବ କରିଥିଲେ l ଗାଁକୁ ରାସ୍ତା ନଥିବାରୁ ଖରା ବର୍ଷା ଶିତ ସବୁଦିନ ବିଲ ହିଡ ଦେଇ ଯାତାୟତ କରନ୍ତି ଗ୍ରାମବାସୀ l