୧୦ ବର୍ଷରେ ବିଜ୍ଞାପନ ପାଇଁ ୨୪୨ କୋଟିରୁ ଅଧିକ ଟଙ୍କା ଖର୍ଚ୍ଚ କରିଛନ୍ତି ରାଜ୍ୟ ସରକାର

ଓଡ଼ିଶା 365 (ବ୍ୟୁରୋ): ବର୍ଷକୁ ବର୍ଷ ରାଜ୍ୟ ରାଜକୋଷରୁ ବିଜ୍ଞାପନ ବାବଦକୁ ପାଣିଭଳି ଟଙ୍କା ଖର୍ଚ୍ଚ କରିଚାଲିଛନ୍ତି ରାଜ୍ୟ ସରକାର। ଏମିତିକି ଗଲା  ୧୦ ବର୍ଷରେ ବିଜ୍ଞାପନ ପାଇଁ ୨୪୨ କୋଟିରୁ ଅଧିକ ଟଙ୍କା ଖର୍ଚ୍ଚ କରିଛନ୍ତି ରାଜ୍ୟ ସରକାର।  ମଙ୍ଗଳବାର ସୂଚନା ଓ ଲୋକସମ୍ପର୍କ ମନ୍ତ୍ରୀ ପ୍ରଦୀପ ଅମାତଙ୍କ ଉତ୍ତରରୁ ଏଭଳି ସାଂଘାତିକ ତଥ୍ୟ ସାମ୍ନାକୁ ଆସିଛି। ମନ୍ତ୍ରୀ  କହିଛନ୍ତି ଯେ, ଓଡ଼ିଶା ସରକାର ଗତ ୧୦ ବର୍ଷ ମଧ୍ୟରେ ନିଜର କଲ୍ୟାଣକାରୀ ଯୋଜନାର ବିଜ୍ଞାପନ ବାବଦରେ ୨୪୨ କୋଟିରୁ ଅଧିକ ଟଙ୍କା ଖର୍ଚ୍ଚ କରିଛନ୍ତି। ବିଧାନସଭାରେ ବିଧାୟକ ଶଙ୍କର ଓରାମ ଓ ନବଚରଣ ମାଝୀଙ୍କ ପ୍ରଶ୍ନର ଉତ୍ତରରେ ସୂଚନା ଓ ଲୋକସମ୍ପର୍କ ବିଭାଗ ୨୪୨ କୋଟି ୬୭,୬୪,୩୭୩ ଟଙ୍କା ବିଜ୍ଞାପନ ବାବଦରେ ଦେଇଥିବା ମନ୍ତ୍ରୀ କହିଛନ୍ତି । ଏହି ସମୟ ମଧ୍ୟରେ ସରକାରଙ୍କ ଦ୍ୱାରା ଆରମ୍ଭ କରାଯାଇଥିବା

ବିଭିନ୍ନ ଜନକଲ୍ୟାଣକାରୀ ଯୋଜନା ବିଷୟରେ ସଚେତନତା ବୃଦ୍ଧି କରିବା ପାଇଁ ବିଜ୍ଞାପନ ଦେବା ପାଇଁ ଗଣମାଧ୍ୟମର ବିଭିନ୍ନ ବର୍ଗକୁ ବିଜ୍ଞାପନ ଦିଆଯାଇଛି।  ସେଥିମଧ୍ୟରୁ ଖବରକାଗଜରେ ବିଜ୍ଞାପନ ପାଇଁ ୧୬୫.୦୪ କୋଟି ଟଙ୍କା, ବୈଦ୍ୟୁତିକ ଗଣମାଧ୍ୟମରେ ୪୦.୬୪ କୋଟି ଟଙ୍କା, ସରକାରଙ୍କ ଲୋକସମ୍ପର୍କ ପୁସ୍ତକ ‘ଆଇନା’ ଛପା ଓ ପ୍ରକାଶନ ପାଇଁ ୨୬.୬୪ କୋଟି ଟଙ୍କା ଖର୍ଚ୍ଚ ହୋଇଛି। ଯୋଜନାଗୁଡ଼ିକର ବାହ୍ୟ ବିଜ୍ଞାପନ ପାଇଁ ବିଭାଗ ପକ୍ଷରୁ ହୋର୍ଡିଂ ଲଗାଇବା ପାଇଁ ୩ କୋଟି ୨୫ ଲକ୍ଷ ଟଙ୍କା ଓ ଲୋକକଳା ପାଇଁ ୭ କୋଟି ୯ ଲକ୍ଷ ଟଙ୍କା ଖର୍ଚ୍ଚ ହୋଇଛି ବୋଲି ମନ୍ତ୍ରୀ କହିଛନ୍ତି। ଏହାବ୍ୟତୀତ ସରକାରଙ୍କ ବିଭିନ୍ନ ବିଭାଗ ନିଜସ୍ୱ ବଜେଟରୁ ସେମାନଙ୍କ ଯୋଜନାର ବିଜ୍ଞାପନ ପାଇଁ ଖର୍ଚ୍ଚ କରିଛନ୍ତି ବୋଲି ମନ୍ତ୍ରୀ ଶ୍ରୀ ଅମାତ୍ କହିଛନ୍ତି।