ଧାରଣାରତ ସରପଞ୍ଚ ଓ ସମିତିସଭ୍ୟଙ୍କୁ ଭେଟିଲା ବିଜେପି ପ୍ରତିନିଧିମଣ୍ଡଳୀ

ଓଡ଼ିଶା 365 (ବ୍ୟୁରୋ): ଧାରଣାରତ ସରପଞ୍ଚ ଓ ସମିତିସଭ୍ୟଙ୍କୁ ଆଜି ଭେଟିଛନ୍ତି ବିଜେପି ପ୍ରତିନିଧିମଣ୍ଡଳୀ। ପଞ୍ଚାୟତରାଜ ବ୍ୟବସ୍ଥାର ନୀତି ନିୟମକୁ ଜଳାଞ୍ଜଳି ଦେଇ ସରପଞ୍ଚ ଓ ସମିତିସଭ୍ୟଙ୍କ ସମ୍ବିଧାନ ପ୍ରଦତ କ୍ଷମତାକୁ ସଂକୁଚିତ କରାଯାଉଥିବା ବାରମ୍ବାର ଅଭିଯୋଗ ହେଉଛି। ଅଟଳ ବିହାରୀ ବାଜପେୟୀ ଯେତେବେଳେ ଦେଶର ପ୍ରଧାନମନ୍ତ୍ରୀ ଥିଲେ ସେତେବେଳେ ଗ୍ରାମସଭା ଓ ପଲ୍ଲିସଭାକୁ ଏକ ସାମ୍ବିଧାନିକ କ୍ଷମତା ଦିଆଯାଇଥିଲା । ନରେନ୍ଦ୍ର ମୋଦୀଙ୍କ ପ୍ରଧାନମନ୍ତ୍ରିତ୍ୱ ସମୟରେ ପଞ୍ଚାୟତକୁ ଅର୍ଥ କମିଶନ ଜରିଆରେ ସିଧାସଳଖ ୪୦ ଲକ୍ଷ ରୁ ୮୦ଲକ୍ଷ ପର୍ଯ୍ୟନ୍ତ ଅନୁଦାନ ଦେବାର ବ୍ୟବସ୍ଥା ଆରମ୍ଭ ହେଲା। କିନ୍ତୁ ଓଡ଼ିଶାରେ ଯେଉଁ ଭଳି ଭାବରେ ବାବୁତନ୍ତ୍ରକୁ ପ୍ରୋତ୍ସାହନ ଦେଇ ରାଜ୍ୟ ସରକାର ସରପଞ୍ଚ ଓ ସମିତି ସଭ୍ୟମାନଙ୍କ କ୍ଷମତାକୁ ନେଇ ଅଫିସରମାନଙ୍କ ହାତରେ ଦେଲେ ତାହା ପଞ୍ଚାୟତରାଜ ବ୍ୟବସ୍ଥାର ଯେଉଁ ମହତ୍ୱ ଉଦ୍ଦେଶ୍ୟ ଥିଲା ତାକୁ କୁଠାରଘାତ କରାଯାଇଛି। ଓଡ଼ିଶାରେ ପଲ୍ଲିସଭା ଓ ଗ୍ରାମସଭାକୁ ସରକାର ଗୁରୁତ୍ୱ ଦେଉନାହାଁନ୍ତି। ଏପରିକି ସରପଞ୍ଚ ଓ ସମିତିସଭ୍ୟକୁ ନ୍ୟାର୍ଯ୍ୟ ସମ୍ମାନ ଦେଉନାହାଁନ୍ତି। ୭୩ତମ ସମ୍ବିଧାନ ସଂଶୋଧନରେ ଯେଉଁ ଯେଉଁ କ୍ଷମତା ପଞ୍ଚାୟତରେ ରହିବା କଥା ତାହା ବିଡିଓ ଓ କଲେକ୍ଟରଙ୍କ ପାଖରେ ଅଛି। ପଂଚାୟତସ୍ତରରେ ନିର୍ବାଚିତ ଜନପ୍ରତିନିଧିଙ୍କ କ୍ଷମତାକୁ ଅଧିକାରୀମାନେ ହଡପ କରି ଉପଭୋଗ କରୁଛନ୍ତି । ଯାହାକୁ ଚଳିତ ବିଧାନସଭା ଅଧିବେଶନରେ ଭାରତୀୟ ଜନତା ପାର୍ଟିର ବିଧାୟକମାନେ ବିଧାନସଭାରେ ଉପସ୍ଥାପନା କରିବା ସହିତ ପଂଚାୟତରେ ନିର୍ବାଚିତ ଜନପ୍ରତିନିଧିମାନଙ୍କ ଦାବିକୁ ବଳ ଦେଇଛନ୍ତି।

ଆଜି ଲୋଏର ପିଏମ୍‌ଜିଠାରେ ଧାରଣା ସ୍ଥଳରେ ଧାରଣା ଦେଇଥିବା ସରପଂଚ ଓ ସମିତିସଭ୍ୟମାନଙ୍କ ସହ ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ ଓ ପୂର୍ବତନ ରାଜ୍ୟ ସଭାପତି ସମୀର ମହାନ୍ତିଙ୍କ ନେତୃତ୍ୱରେ ଯାଇଥିବା ପ୍ରତିନିଧି ଦଳ ଆଲୋଚନା କରି ସେମାନଙ୍କ ସମସ୍ତ ଦାବିକୁ ଶୁଣିଥିଲେ ଓ ତାହା ସମ୍ପୂର୍ଣ୍ଣ ଯଥାର୍ଥ ବୋଲି ହୃଦୟଙ୍ଗମ କରି ଏହାକୁ ପୂର୍ଣ୍ଣସମର୍ଥନ କରିଥିଲେ । ସରପଂଚ ଓ ସମିତିସଭ୍ୟମାନଙ୍କ ସମ୍ମାନଜନକ ଭତାରେ ବୃଦ୍ଧି, ପଂଚାୟତକୁ କେନ୍ଦ୍ର ଓ ରାଜ୍ୟ ସରକାର ଦେଉଥିବା ଅର୍ଥ ବିନିଯୋଗରେ ନିର୍ବାଚିତ ଜନପ୍ରତିନିଧିମାନଙ୍କ ପ୍ରତ୍ୟକ୍ଷ ଭୂମିକାକୁ ବାଧ୍ୟତାମୂଳକ କରିବା, ପଂଚାୟତରାଜ ବ୍ୟବସ୍ଥାରେ ୭୩ତମ ଅଧିନିୟମ ଅନୁସାରେ ଦିଆଯାଇଥିବା ସମସ୍ତ କ୍ଷମତା ପଂଚାୟତକୁ ହସ୍ତାନ୍ତର କରିବା, ଗ୍ରାମସଭା ଓ ପଲ୍ଲିସଭାକୁ ଗୁରୁତ୍ୱ ଦେବା, ସରପଂଚ ଓ ସମିତିସଭ୍ୟମାନଙ୍କୁ ପଂଚାୟତରେ ଜନକଲ୍ୟାଣମୂଳକ କାର୍ଯ୍ୟ କରିବା ପାଇଁ ପର୍ଯ୍ୟାପ୍ତ ପରିମାଣର ପାଣ୍ଠି ଯୋଗାଇ ଦେବା, ପ୍ରତି ପଂଚାୟତରେ କାର୍ଯ୍ୟନିର୍ବାହି ଅଧିକାରୀ ଓ ଜିଆରଏସ୍ ନିଯୁକ୍ତି କରିବା ଆଦି ସମସ୍ତ ପ୍ରସଙ୍ଗକୁ ଭାରତୀୟ ଜନତା ପାର୍ଟି ବିଧାନସଭାରେ ସରକାରଙ୍କ ପାଖରେ ଉପସ୍ଥାପନ କରିବ ଓ ଦଳୀୟ କାର୍ଯ୍ୟକ୍ରମରେ ମଧ୍ୟ ଏହି ଦାବିକୁ ସାମିଲ କରାଯିବ । ଏହି ପ୍ରତିନିଧି ମଣ୍ଡଳୀରେ ଥିଲେ ବିଧାୟକ ଲଳିଟେନ୍ଦୁ ବିଦ୍ୟାଧର ମହାପାତ୍ର, ମୁକେଶ ମହାଲିଙ୍ଗ, ନବଚରଣ ମାଝୀ, କୁସୁମ ଟେଟେ, ସୂର୍ଯ୍ୟବଂଶୀ ସୁରଜ, ନାଉରୀ ନାୟକ, ସନାତନ ବିଜୁଳୀ, ଭବାନୀ ଶଙ୍କର ଭୋଇ, ନିତ୍ୟାନନ୍ଦ ଗଣ୍ଡ, ଗଣେଶ ରାମ ଖୁଂଟିଆ, ରାଜ୍ୟ ଓବିସିମୋର୍ଚ୍ଚା ସଭାପତି ସୁରଥ ବିଶ୍ୱାଳ, ରାଜ୍ୟ ମୁଖପାତ୍ର ରମାରଞ୍ଜନ ବଳିୟାରସିଂହ, ରାଜେନ୍ଦ୍ର ପଣ୍ଡା, ଅନିଲ ବିଶ୍ୱାଳ ପ୍ରମୁଖ ।