ଓଡ଼ିଶା 365 (ବ୍ୟୁରୋ): ଚର୍ଚ୍ଚାରେ ବଲିଉଡ କିଙ୍ଗ ଶାହରୁଖ ଖାନ୍ । ରେକର୍ଡ ସୃଷ୍ଟି କରୁଛି ‘ଜୱାନ’ । ସବୁ ହିନ୍ଦୀ ସିନେମାକୁ ପଛରେ ପକାଇ ଇତିହାସ ରଚିଲା କିଙ୍ଗ୍ ଖାନଙ୍କ ଫିଲ୍ମ ‘ଜୱାନ’ । କେବଳ ଭାରତ ନୁହେଁ ଦେଶ ବିଦେଶରେ ବି ହଇଚଇ ସୃଷ୍ଟି କରୁଛି ‘ଜୱାନ’ । ବକ୍ସ ଅଫିସରେ ଧମାଲ୍ କରିବା ସହ ଲୋକଙ୍କ ମନ ଜିଣିବାରେ ଲାଗିପଡିଛି । ପ୍ରଥମ ଦିନରେ ୧୨୯. ୬ କୋଟି ଆୟ କରିବା ଦିନ ଠାରୁ ଏହି ଫିଲ୍ମଟି ପ୍ରତ୍ୟେକ ଦିନ ଗୋଟିଏ ପରେ ଗୋଟିଏ ରେକର୍ଡ ସୃଷ୍ଟି କରି ଚାଲିଛି। ସମସ୍ତ ବ୍ଲକବଷ୍ଟର ଫିଲ୍ମର ରେକର୍ଡ ବ୍ରେକ୍ କରି ଚାଲିଛି କିଙ୍ଗ୍ ଖାନଙ୍କ ଫିଲ୍ମ ‘ଜୱାନ’ । ଏହି ମୁଭିଟି ବର୍ତ୍ତମାନ ଓ୍ବାର୍ଲଡ ଓ୍ବାଇଡ ୧୦୦୦ କୋଟି ଟଙ୍କା କ୍ଲବରେ ଯୋଗଦେବା ପାଇଁ ଅତି ନିକଟତର ହୋଇଛି। ଏହି ଫିଲ୍ମ ଘରୋଇ ବକ୍ସ ଅଫିସରେ ୫୦୦ କୋଟିରୁ ଅଧିକ ଆୟ କରିଛି। ଏହାସହ ଶାହାରୁଖ ଖାଁ ବର୍ତ୍ତମାନ ତାଙ୍କ ନାମରେ ଏକ ନୂଆ ରେକର୍ଡ କରିଛନ୍ତି।ଶାହାରୁଖ ପ୍ରଥମ ବଲିଉଡ ତଥା ଦ୍ୱିତୀୟ ଭାରତୀୟ ଅଭିନେତା ହୋଇପାରିଛନ୍ତି ଯିଏକି ଗୋଟିଏ ବର୍ଷ ମଧ୍ୟରେ ଭାରତୀୟ ବକ୍ସ ଅଫିସରେ ୧୦୦୦ କୋଟି ଟଙ୍କା କଲେକ୍ସନ୍ କରିଛନ୍ତି। ଚଳିତ ବର୍ଷ ଶାହାରୁଖ ଖାଁଙ୍କ ଅଭିନୀତ ‘ପଠାନ’ ଏବଂ ‘ଜୱାନ’ ଫିଲ୍ମ ସିନେମା ହଲରେ ମୁକ୍ତିଲାଭ କରିଛି। ଉଭୟ ଫିଲ୍ମକୁ ଏକାଠି କରି ଅଭିନେତା ୧୦୦୦ କୋଟିରୁ ଅଧିକ ରୋଜଗାର କରିଛନ୍ତି ଏବଂ ଏହା କରିବାରେ ସେ ପ୍ରଥମ ବଲିଉଡ ଅଭିନେତା ହୋଇଯାଇଛନ୍ତି।
ଶାହାରୁଖଙ୍କ ଫିଲ୍ମ ‘ପଠାନ’ ବକ୍ସ ଅଫିସରେ ଅନେକ ରେକର୍ଡ ଭାଙ୍ଗିଛି। ତାଙ୍କର ଫିଲ୍ମ ‘ଜୱାନ’ ମଧ୍ୟ ଚମତ୍କାର ପ୍ରଦର୍ଶନ କରୁଛି। ଚଳିତ ବର୍ଷ ଜାନୟାରୀରେ ରିଲିଜ ହୋଇଥିବା ‘ପଠାନ’ର ମୋଟ କଲେକଶନ ୫୪୩ କୋଟି ହୋଇଥିବାବେଳେ ସେପ୍ଟେମ୍ବର ୭ରେ ମୁକ୍ତିଲାଭ କରିଥିବା ‘ଜୱାନ’ ମାତ୍ର ୧୫ ଦିନ ମଧ୍ୟରେ ୫୨୭.୩୮ କୋଟି ଟଙ୍କା ଆୟ କରିଛି। ଅର୍ଥାତ୍ ଗୋଟିଏ ବର୍ଷରେ ୧୦୦୦କୋଟିରୁ ଅଧିକ ଆୟ କରି ତାଙ୍କ ନାମରେ ଏକ ନୂଆ ରେକର୍ଡ ସୃଷ୍ଟି କରିଛନ୍ତି ଶାହରୁଖ । ଖବର ମୁତାବକ, ଘରୋଇ ବକ୍ସ ଅଫିସରେ ୧୦୦୦ କୋଟି ଟଙ୍କା କ୍ଲବରେ ଯୋଗ ଦେଇଥିବା ଶାହାରୁଖ ଖାଁ ଦ୍ୱିତୀୟ ଭାରତୀୟ ଅଭିନେତା ହୋଇଛନ୍ତି। ଏହା ପୂର୍ବରୁ ସାଉଥ ସୁପରଷ୍ଟାର ପ୍ରଭାସଙ୍କର ଏହି ରେକର୍ଡ ଥିଲା। ଅଭିନେତାଙ୍କ ମୁଭି ବାହୁବଳି ୨୦୧୭ରେ ରିଲିଜ ହୋଇଥିଲା, ଯାହା ଘରୋଇ ବକ୍ସ ଅଫିସରେ ୧୦୩୦.୪୨ କୋଟି ଟଙ୍କା କଲେକ୍ସନ୍ କରିଥିଲା । ବର୍ତ୍ତମାନ ଶାହରୁଖ ୧୦୦୦ କୋଟି କଲେକ୍ସନ୍ କରି ଇତିହାସ ସୃଷ୍ଟି କରିଛନ୍ତି ।
