ଓଡ଼ିଶା365(ବ୍ୟୁରୋ): ସୁଇଜରଲ୍ୟାଣ୍ଡରେ ଏଣିକି ସର୍ବସାଧାରଣ ସ୍ଥାନରେ ବୁର୍ଖା ପିନ୍ଧି ପାରିବେନି ମହିଳା କିମ୍ବା ଯୁବତୀ। ଏପରି କଲେ ସେମାନଙ୍କୁ ଦେବାକୁ ପଡ଼ିବ ଫାଇନ୍। ଏହି ବିଲ୍ ସୁଇଜରଲ୍ୟାଣ୍ଡର ନିମ୍ନ ସଦନରେ ପାରିତ ହୋଇଛି। ସୁଇଜରଲ୍ୟାଣ୍ଡରେ କମ୍ ସଂଖ୍ୟକ ମୁସଲିମ୍ ମହିଳା ଓ ଯୁବତୀ ଥିବା ବେଳେ ବୁର୍ଖା କଟକଣା ହଟାଇବା ନିମନ୍ତେ କିଛିବର୍ଷ ଧରି ସେମାନେ ଆଇନଗତ ଲଢ଼େଇ ଲଢୁଥିଲେ। ପୂର୍ବରୁ ଏହି ବିଲ୍ ସୁଇଜରଲ୍ୟାଣ୍ଡ ପାର୍ଲାମେଣ୍ଟର ଉପର ସଦନରେ ପାରିତ ହୋଇ ଯାଇଥିବା ବେଳେ ଏବେ ନିମ୍ନ ସଦନରେ ମିଳିଛି ଗ୍ରୀନ୍ ସିଗନାଲ।
ନିମ୍ନ ସଦନରେ ପାରିତ ହେବା ପରେ ଏହି ବିଲ୍ ଆଇନ୍ରେ ପରିଣତ ହୋଇଛି। ଫଳରେ ଏହାକୁ ଉଲ୍ଲଘଂନ କଲେ ଆର୍ଥିକ ଜରିମାନା ଦେବାକୁ ପଡ଼ିବ ବୋଲି ଜଣାଯାଇଛି। ଏପରିକି ଏହି ନିୟମ ଉଲ୍ଲଂଘନକାରୀଙ୍କୁ ୧୧୦୦ ଡଲାର ଫାଇନ୍ ଦେବାକୁ ପଡ଼ିବ। ଏହି ନିୟମ ଅନୁଯାୟୀ ଏଣିକି ସର୍ବସାଧାରଣ ସ୍ଥାନରେ ମହିଳା ଓ ଯୁବତୀମାନେ ନିଜ ନାକ, ମୁହଁ, ପାଟି ଆଦିକୁ କପଡ଼ାରେ ଆବୃତ୍ତ କରି ପାରିବେନି। ଏବେ ସୁଇଜରଲ୍ୟାଣ୍ଡରେ ହିଜାବ ବ୍ୟାନ୍ ହେବା ପରେ ତାହା ବେଲଜିୟମ, ଫ୍ରାନ୍ସ ଆଦି ଦେଶ ସହ ସାମିଲ ହେବ।
ସୁଇଜରଲାଣ୍ଡ ସରକାରଙ୍କ ଏପରି ନିଷ୍ପତ୍ତିକୁ ବହୁ ମୁସଲିମ ସଙ୍ଗଠନ ନାପସନ୍ଦ କରାଯାଇଛି। ଏନେଇ ‘ପର୍ପଲ ହେଡସ୍କାର୍ପ’ ନାମକ ମୁସଲିମ ଲେଡି ୱିଙ୍ଗ ପକ୍ଷରୁ କୁହାଯାଇଛି, ସୁଇଜରଲାଣ୍ଡରେ ବହୁ କମ୍ ସଂଖ୍ୟକ ମହିଳା ଓ ଯୁବତୀ ବୁର୍ଖା ବ୍ୟବହାର କରୁଛନ୍ତି। ଏପରି ସ୍ଥିତିରେ ସୁଇଜରଲାଣ୍ଡରେ ହିଜାବକୁ ବ୍ୟାନ୍ କରି ଦେଶରେ ମୁସଲମାନଙ୍କ ଭାବନାକୁ ଆଘାତ ପହଞ୍ଚା ଯାଇଛି।
