କେନ୍ଦ୍ର କ୍ୟାବିନେଟ୍ ବୈଠକ ଡାକିଲେ ପ୍ରଧାନମନ୍ତ୍ରୀ 

ଓଡ଼ିଶା 365 (ବ୍ୟୁରୋ) :  ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ସନ୍ଧ୍ୟାରେ  କେନ୍ଦ୍ର କ୍ୟାବିନେଟ୍ ବୈଠକ ଡକାଇଛନ୍ତି।   ସଂସଦର ଭବନରେ ହେବାକୁ ଥିବା ଏହି ବୈଠକରେ କେତେକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ଉପରେ କ୍ୟାବିନେଟ ମୋହର ବାଜିପାରେ ବୋଲି ଚର୍ଚ୍ଚା ହେଉଛି   । ସଂସଦର ସ୍ବତନ୍ତ୍ର ଅଧିବେଶନ ଚାଲିଥିବା ଦୃଷ୍ଟିରୁ ଏହି କ୍ୟାବିନେଟ୍ ବୈଠକ ଅନେକ ଗୁରୁତ୍ୱ ବହନ କରୁଛି । ଏହା ପୂର୍ବରୁ ସଂସଦର ସ୍ୱତନ୍ତ୍ର ଅଧିବେଶନର ପ୍ରଥମ ଦିନରେ ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଆଜିଠାରୁ ଆରମ୍ଭ ହେଉଥିବା ସଂସଦର ଅଧିବେଶନ ଛୋଟ କିନ୍ତୁ “ବହୁତ ବଡ”, “ମୂଲ୍ୟବାନ”  ।  ଅଧିବେଶନର ପ୍ରଥମ ଦିନରେ ସଂସଦ ଭବନ ପରିସରରେ ଗଣମାଧ୍ୟମକୁ ସମ୍ବୋଧିତ କରି ସେ କହିଛନ୍ତି ଯେ ଏହି ଅଧିବେଶନର ଅନ୍ୟତମ ବିଶେଷତ୍ୱ ହେଉଛି ୭୫ ବର୍ଷର ଯାତ୍ରା ଏବେ ଏକ ନୂତନ ସ୍ତରରୁ ଆରମ୍ଭ ହେଉଛି। ଚନ୍ଦ୍ରଯାନ-୩ର ସଫଳତା ଓ ଜି-୨୦ର ସଫଳ ଆୟୋଜନ ପରେ ଏହି ଅଧିବେଶନ ଆରମ୍ଭ ହେଉଥିବାରୁ ଏହାର ଗୁରୁତ୍ୱ ଆହୁରି ବଢ଼ୁଛି ବୋଲି କହିଛନ୍ତି ମୋଦି । ଜି -୨୦ରେ ଭାରତ ସର୍ବଦା ଗ୍ଲୋବାଲ ସାଉଥର ସ୍ୱର ହୋଇ ଗର୍ବିତ ରହିବ। ଗଣେଶ ଚତୁର୍ଥୀ ଅବସରରେ ମଙ୍ଗଳବାର ନୂତନ ସଂସଦ କାର୍ଯ୍ୟଆରମ୍ଭ କରୁଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏକ ନୂତନ ସ୍ଥାନକୁ ଯାତ୍ରାକୁ ଆଗକୁ ବଢ଼ାଇବା ସହିତ ନୂତନ ସଂକଳ୍ପ, ନୂତନ ଶକ୍ତି ଏବଂ ନୂତନ ଆତ୍ମବିଶ୍ୱାସ ସହିତ କାର୍ଯ୍ୟ କରିବାକୁ ପଡିବ ।