ଓଡ଼ିଶା365(ବ୍ୟୁରୋ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ସନ୍ଧ୍ୟା ସାଢ଼େ ୬ଟାରେ କେନ୍ଦ୍ର କ୍ୟାବିନେଟ୍ ବୈଠକ ଡକାଇଛନ୍ତି। ସଂସଦର ଆନେକ୍ସ ଭବନରେ ହେବାକୁ ଥିବା ଏହି ବୈଠକରେ ବହୁ ଗୁରୁତ୍ବପୂର୍ଣ୍ଣ ନିଷ୍ପତ୍ତି ଉପରେ କ୍ୟାବିନେଟ ମୋହର ବାଜିପାରେ। ସଂସଦର ସ୍ବତନ୍ତ୍ର ଅଧିବେଶନ ଚାଲିଥିବା ଦୃଷ୍ଟିରୁ ଏହି କ୍ୟାବିନେଟ୍ ବୈଠକକୁ ଅନେକ ମାତ୍ରାରେ ଗୁରୁତ୍ବ ଦିଆଯାଉଛି । ଏହା ପୂର୍ବରୁ ସଂସଦର ସ୍ୱତନ୍ତ୍ର ଅଧିବେଶନର ପ୍ରଥମ ଦିନରେ ପ୍ରଧାନମନ୍ତ୍ରୀ ମୋଦି କହିଥିଲେ, ଆଜିଠାରୁ ଆରମ୍ଭ ହେଉଥିବା ସଂସଦର ଅଧିବେଶନ ଛୋଟ କିନ୍ତୁ ବହୁତ ବଡ଼, ମୂଲ୍ୟବାନ ।
ଅଧିବେଶନର ପ୍ରଥମ ଦିନରେ ସଂସଦ ଭବନ ପରିସରରେ ଗଣମାଧ୍ୟମକୁ ସମ୍ବୋଧିତ କରି ମୋଦି କହିଛନ୍ତି, ଏହି ଅଧିବେଶନର ଅନ୍ୟତମ ବିଶେଷତ୍ୱ ହେଉଛି ୭୫ ବର୍ଷର ଯାତ୍ରା ଏବେ ଏକ ନୂତନ ସ୍ତରରୁ ଆରମ୍ଭ ହେଉଛି। ଚନ୍ଦ୍ରଯାନ-୩ର ସଫଳତା ଓ ଜି-୨୦ର ସଫଳ ଆୟୋଜନ ପରେ ଏହି ଅଧିବେଶନ ଆରମ୍ଭ ହେଉଥିବାରୁ ଏହାର ଗୁରୁତ୍ୱ ଆହୁରି ବଢ଼ୁଛି। ଜି-୨୦ରେ ଭାରତ ସର୍ବଦା ଗ୍ଲୋବାଲ ସାଉଥର ସ୍ୱର ହୋଇ ଗର୍ବିତ ରହିବ। ଗଣେଶ ଚତୁର୍ଥୀ ଅବସରରେ ମଙ୍ଗଳବାର ନୂତନ ସଂସଦ କାର୍ଯ୍ୟ ଆରମ୍ଭ କରୁଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏକ ନୂତନ ସ୍ଥାନକୁ ଯାତ୍ରାକୁ ଆଗକୁ ବଢ଼ାଇବା ସହିତ ନୂତନ ସଂକଳ୍ପ, ନୂତନ ଶକ୍ତି ଏବଂ ନୂତନ ଆତ୍ମବିଶ୍ୱାସ ସହିତ କାର୍ଯ୍ୟ କରିବାକୁ ପଡିବ ।
