ଓଡ଼ିଶା 365 (ବ୍ୟୁରୋ) : ହୋଟେଲରେ କରିପାରିନଥିଲେ ୧୧୫ ଟଙ୍କା ବିଲ ପେମେଣ୍ଟ । ଏଥିପାଇଁ ଘଟିଗଲା ଜଘନ୍ୟ ହତ୍ୟାକାଣ୍ଡ । ଭାଇ ସାଜିଲା ଭଗାରି । ହୋଟେଲରେ ଖାଦ୍ୟ ଖାଇ ୧୧୫ ଟଙ୍କା ପେମେଣ୍ଟ ନକରିବାରୁ ନାବାଳକଙ୍କ ଜୀବନ ନେଇଗଲେ ତିନି ଭାଇ । ଗଲାକାଟି ହତ୍ୟା କରିବା ପରେ ମୃତଦେହକୁ ଫୋପାଡି ଦେଲେ । ଏଭଳି ହତ୍ୟାକାଣ୍ଡ ଘଟିଛି ଉତ୍ତରପ୍ରଦେଶର ମହାରାଜଗଞ୍ଜରେ । ଏହି ଘଟଣାରେ ପୋଲିସ ୨ ଜଣଙ୍କୁ ଗିରଫ କରିଥିବା ବେଳେ ଜଣେ ନାବାଳକଙ୍କୁ ବାଳ ସୁଧାର ଗୃହକୁ ପଠାଇ ଦିଆଯାଇଛି । ମୃତକ ଜଣଙ୍କ ହେଉଛି ଚନ୍ଦନଲାଲ । ଗତ ଗୁରୁବାର ଏହି ଘଟଣା ଘଟଥିବା କୁହାଯାଉଛି । ରବିବାର ଦିନ ନାବାଳକଙ୍କ ମୃତଦେହ ଏକ କଦଳୀ ବଗିଚାରୁ ଉଦ୍ଧାର କରାଯାଇଥିଲା ।ଗୁରୁବାର ୪ଜଣ ସମ୍ପର୍କୀୟ ଭାଇ ମିସି ଏକ ହୋଟେଲକୁ ଖାଇବାକୁ ଯାଇଥିଲେ । ସେଠାରେ ଦୁଇ ପ୍ଲେଟ୍ ଅଣ୍ଡା ତରକାରୀ ଓ ରାଇସ୍ ଅର୍ଡର କରିଥିଲେ । ଅର୍ଡର ଆସିବା ପରେ ସମସ୍ତେ ମିଶିକି ଖାଇଥିଲେ । ଏହାପରେ ୧୧୫ ଟଙ୍କା ବିଲ୍ ହୋଇଥିବାରୁ କିଏ ପେମେଣ୍ଟ କରିବ ସେନେଇ ପରସ୍ପର ମଧ୍ୟରେ ଯୁକ୍ତିତର୍କ ହୋଇଥିଲା ।
ଚନ୍ଦନଲାଲଙ୍କୁ ଅନ୍ୟ ୩ ଜଣ ବିଲ୍ ପେମେଣ୍ଟ୍ କରିବାକୁ କହିଥିଲେ । କିନ୍ତୁ ସେ ନଦେବାରୁ ତାଙ୍କୁ ହତ୍ୟା କରିଥିଲେ ଅନ୍ୟ ୩ ସମ୍ପର୍କୀୟ ଭାଇ । ମୃତକଙ୍କ ପରିବାର ଲୋକେ ପୁଅର କୌଣସି ଖୋଜଖବର ନପାଇବାରୁ ଥାନାରେ ନିଖୋଜ ଅଭିଯୋଗ କରିଥିଲେ । ଗତ ରବିବାର ଅହିରୋଲି ଗ୍ରାମ ନିକଟସ୍ଥ ଏକ କଦଳୀ ବଗିଚାରୁ ଚନ୍ଦନଲାଲଙ୍କ ମୃତଦେହ ଉଦ୍ଧାର କରିଥିଲା ପୋଲିସ ।
ଏନେଇ ମହାରାଜଗଞ୍ଜ ପୋଲିସ ଅଧୀକ୍ଷକ କହିଛନ୍ତି ଯେ, ଥାନାରେ ମୃତ ନାବାଳକଙ୍କ ବାପା ଅଭିଯୋଗ କରିବା ପରେ ତଦନ୍ତ ଆରମ୍ଭ ହୋଇଥିଲା । ସ୍ଥାନୀୟ ବଜାରର ସିସିଟିଭି ଫୁଟେଜ୍ ଆଧାରରେ ଚନ୍ଦନଲାଲ ଶେଷ ଥର ପାଇଁ କେଉଁଠିକି ଯାଇଥିଲେ ତାହା ପୋଲିସ ଜାଣିବାକୁ ପାଇଥିଲା । ଘୁଗୁଲି ନାମକ ଏକ ସ୍ଥାନକୁ ଯିବା ପରେ ସେଠାରେ ମୃତକଙ୍କ ତିନି ସମ୍ପର୍କୀୟ ଭାଇ ସେହି ସ୍ଥାନରେ ଉପସ୍ଥିତ ଥିଲେ । ସେମାନଙ୍କୁ ପଚରାଉଚରା କରିବା ପରେ ଚନ୍ଦନଲାଲଙ୍କୁ ହତ୍ୟା କରିଥିବା ସ୍ବିକାର କରିଥିଲେ । ଗିରଫ ଅଭିଯୁକ୍ତ ହେଉଛନ୍ତି ସନ୍ନି କୁମାର, ଶ୍ୟାମ କୁମାର ଓ ଜଣେ ନାବାଳକ ରହିଛନ୍ତି ।
ସନ୍ନି କୁମାର ଓ ଶ୍ୟାମ କୁମାରଙ୍କୁ ଜେଲ୍ ପଠାଇ ଦିଆଯାଇଥିବା ବେଳେ ନାବାଳକଙ୍କୁ ବାଳ ସୁଧାର ଗୃହ ପଠାଇ ଦିଆଯାଇଛି । ଅଭିଯୁକ୍ତକୁ ପଚରାଉଚରା ସମୟରେ ଜଣାପଡ଼ିଛି ଯେ, ୪ ସମ୍ପର୍କୀୟ ଭାଇ ମିସି ଅନେକ ସମୟରେ ହୋଟେଲ ଖାଇବାକୁ ଯାଆନ୍ତି । ଅନେକ ସମୟରେ ସନ୍ନି ଓ ଶ୍ୟାମ ବିଲ ପେମେଣ୍ଟ୍ କରନ୍ତି, କିନ୍ତୁ ଚନ୍ଦନଲାଲ କେବେ ବି ବିଲ୍ ଦିଏ ନାହିଁ । ଯେତେବେଳେ ତାକୁ ବିଲ୍ ଭରିବାକୁ କୁହାଯାଏ ସେ ମନା କରେ । ସେହି ଦିନ ମଧ୍ୟ ବାହାନା ଦେଖାଇ ବିଲ୍ ପେମେଣ୍ଟ୍ କରିବାକୁ ମନା କରିବାକୁ ରାଗରେ ଜର୍ଜରିତ ହୋଇ ତିନି ଜଣ ମିଶି ଚନ୍ଦନଲାଲଙ୍କ ଗଳାକାଟି ହତ୍ୟା କରିଥିଲେ । ଏହାପରେ ମୃତଦେହକୁ ଫୋପାଡ଼ି ଦେଇଥିଲେ ବୋଲି ପୋଲିସ ସାମ୍ନାରେ କହିଛନ୍ତି ଅଭିଯୁକ୍ତ ।
