ଓଡ଼ିଶା 365 (ବ୍ୟୁରୋ): ୧୭ ଜଣ ବଲିଉଡ ଷ୍ଟାରଙ୍କ ଉପରେ ଇଡି ନଜର । ସୁଚନା ଅନୁଯାୟୀ, ଅନଲାଇନ ବେଟିଂ ପ୍ଲାଟଫର୍ମ ମହାଦେବ ବୁକ ଆପର ପ୍ରମୋଟର ସୌରଭ ଚନ୍ଦ୍ରକର ଚଳିତ ବର୍ଷ ଫେବୃଆରୀରେ ଦୁବାଇରେ ବିବାହ କରିଥିଲେ। ଏହି ବିବାହ ଉତ୍ସବରେ ଯୋଗ ଦେଇଥିଲେ ୧୭ ଜଣ ସେଲିବ୍ରିଟି । ଏହି ୧୭ ଜଣ ସେଲିବ୍ରିଟିଙ୍କ ଉପରେ ଏବେ ଇଡିର ନଜର ରହିଛି ।ସୂଚନା ଅନୁଯାୟୀ, ସୌରଭ ତାଙ୍କ ବିବାହ ପାଇଁ ୨୦୦କୋଟି ଟଙ୍କା ଖର୍ଚ୍ଚ କରିଥିଲେ। ଏହି ପରିମାଣର ଏକ ବଡ଼ ଅଂଶ ଦୁବାଇ ବିବାହରେ ଯୋଗ ଦେଇଥିବା ବଲିଉଡ ସେଲିବ୍ରିଟି ମାନଙ୍କୁ ଦିଆଯାଇଥିଲା। ବର୍ତ୍ତମାନ ତାଙ୍କୁ ପଚରାଉଚରା ପାଇଁ ଇଡି ଡକାଇବ ବୋଲି ସୂଚନା ମିଳିଛି । ଟାଇଗର ଶ୍ରଫ, ସନ୍ନି ଲିଓନ, ଗାୟକ ନେହା କକ୍କରଙ୍କ ସମେତ ବହୁ ଲୋକପ୍ରିୟ ବ୍ୟକ୍ତିଙ୍କ ନାମ ଇଡି ତାଲିକାରେ ସାମିଲ ରହିଛି ।
ରିପୋର୍ଟ ଅନୁଯାୟୀ ସୌରଭ ଚନ୍ଦ୍ରକର ଏବଂ ରବି ଅପପାଲ ଦୁହେଁ ଛତିଶଗଡର ବାସିନ୍ଦା । ଇଡି ସୂତ୍ର ଅନୁସାରେ, ଚନ୍ଦ୍ରକର ୧୮ ସେପ୍ଟେମ୍ବର ୨୦୨୨ ରେ ଦୁବାଇରେ ଆଉ ଏକ ପାର୍ଟିର ଆୟୋଜନ କରିଥିଲେ। ପାର୍ଟି ପାଇଁ ଏକ ୭ ତାରକା ହୋଟେଲ ବୁକ କରାଯାଇଥିଲା, ଯେଉଁଠାରେ ବଲିଉଡ ତାରକାମାନଙ୍କୁ ଯୋଗଦେବା ପାଇଁ ୪୦ କୋଟି ଟଙ୍କା ଦିଆଯାଇଥିଲା। ଫେବୃଆରୀରେ ବିବାହ ପାଇଁ ନାଗପୁରରୁ ଦୁବାଇକୁ ପରିବାର ସଦସ୍ୟଙ୍କୁ ନେବା ପାଇଁ ଘରୋଇ ଜେଟ ନିୟୋଜିତ କରାଯାଇଥିଲା। ବଲିଉଡ ସେଲିବ୍ରିଟି, ବିବାହ ଯୋଜନାକାରୀ, ନୃତ୍ୟଶିଳ୍ପୀ, ସାଜସଜ୍ଜା ସମସ୍ତେ ମୁମ୍ବାଇରୁ ଦୁବାଇ ଅଭିମୁଖେ ଯାତ୍ରା କରିଥିଲେ।
ବଲିଉଡ ସେଲିବ୍ରିଟିଙ୍କ ତାଲିକାରେ ଆଟିଫ ଅସଲମ, ରାହତ ଫତେହ ଅଲି ଖାନ, ଅଲି ଅସଗର, ବିଶାଲ ଦଡଲାନି, ଏଲି ଅବରାମ, ଭାରତ ସିଂ, ଭାଗାଶ୍ରୀ, କ୍ରିତି ଖରବନ୍ଦା, ନୁସରତ ଭାରୁଚା, କୃଷ୍ଣ ଅଭିଷେକ ଅଛନ୍ତି। ମହାଦେବ ଅନଲାଇନ ବେଟିଂର ତଦନ୍ତ ଗତ ବର୍ଷ ଡିସେମ୍ବରରେ ଆରମ୍ଭ ହୋଇଥିଲା। ବଲିଉଡ ସଂଯୋଗ ବର୍ତ୍ତମାନ ସାମ୍ନାକୁ ଆସିଛି। ଯେଉଁଥି ପାଇଁ ଇଡି ଏହି ୧୭ ଜଣ ସେଲିବ୍ରିଟିଙ୍କୁ ଜେରା କରିବ ବୋଲି ଚର୍ଚ୍ଚା ହେଉଛି ।
