ଓଡ଼ିଶା 365 (ବ୍ୟୁରୋ): ଚର୍ଚ୍ଚାରେ ବଲିଉଡର କିଙ୍ଗ ଶାହରୁଖ ଖାନ୍ । ରେକର୍ଡ ସୃଷ୍ଟି କରୁଛି ‘ଜୱାନ’ । ସବୁ ହିନ୍ଦୀ ସିନେମାକୁ ପଛରେ ପକାଇ ଇତିହାସ ରଚିଲା କିଙ୍ଗ୍ ଖାନଙ୍କ ଫିଲ୍ମ ‘ଜୱାନ’ । କେବଳ ଭାରତ ନୁହେଁ ଦେଶ ବିଦେଶରେ ବି ହଇଚଇ ସୃଷ୍ଟି କରୁଛି ‘ଜୱାନ’ । ବକ୍ସ ଅଫିସରେ ଧମାଲ୍ କରିବା ସହ ଲୋକଙ୍କ ମନ ଜିଣିବାରେ ଲାଗିପଡିଛି । ପ୍ରଥମ ଦିନରେ ୧୨୯. ୬ କୋଟି ଆୟ କରିବା ଦିନ ଠାରୁ ଏହି ଫିଲ୍ମଟି ପ୍ରତ୍ୟେକ ଦିନ ଗୋଟିଏ ପରେ ଗୋଟିଏ ରେକର୍ଡ ସୃଷ୍ଟି କରି ଚାଲିଛି। ସମସ୍ତ ବ୍ଲକବଷ୍ଟର ଫିଲ୍ମର ରେକର୍ଡ ବ୍ରେକ୍ କରି ଚାଲିଛି କିଙ୍ଗ୍ ଖାନଙ୍କ ଫିଲ୍ମ ‘ଜୱାନ’ । ଲୋକମାନେ ଅଟଲିଙ୍କ ଫିଲ୍ମରେ ବଲିଉଡର ସୁପରଷ୍ଟାର ଦୀପିକା ପାଦୁକୋନଙ୍କ କେମିଓକୁ ମଧ୍ୟ ବହୁତ ପସନ୍ଦ କରିଥିଲେ।
ଖବର ମୁତାବକ ଦୀପିକା ଏହି ଛୋଟ କେମିଓ ପାଇଁ ୧୫କୋଟି ଟଙ୍କା ପାରିଶ୍ରମିକ ନେଇଛନ୍ତି ଚର୍ଚ୍ଚା ହେଉଥିଲା । ହେଲେ ,ହି ଚର୍ଚ୍ଚାରେ ପୂର୍ଣ୍ଣଛେଦ ପକାଇଛନ୍ତି ଦୀପିକା । ନିକଟରେ ‘ଦି ଓ୍ବିକ୍’ କୁ ଦେଇଥିବା ଏକ ସାକ୍ଷାତକାରରେ ଦୀପିକା କହିଛନ୍ତି ଯେ “ମୁଁ ‘ଜୱାନ’ ରେ କେମିଓ କରିବା ପାଇଁ ଗୋଟିଏ ଟଙ୍କା ମଧ୍ୟ ନେଇ ନାହିଁ। ଏହାପୂର୍ବରୁ ମୁଁ ରଣବୀରଙ୍କ ଫିଲ୍ମ ‘୮୩’ ଏବଂ ରୋହିତ ସେଟ୍ଟୀଙ୍କ ‘ସର୍କସ’ ପାଇଁ କୌଣସି ପାରିଶ୍ରମିକ ନେଇ ନଥିଲି। ମୁଁ ‘୮୩’ର ଏକ ଅଂଶ ହେବାକୁ ଚାହୁଁଥିଲି, କାରଣ ମୁଁ ସେହି ମହିଳାମାନଙ୍କୁ ସମ୍ମାନ ଦେବାକୁ ଚାହୁଁଥିଲି, ଯେଉଁମାନେ ନିଜ ସ୍ୱାମୀଙ୍କୁ ସମର୍ଥନ କରିବା ପାଇଁ ନିଜ ଖୁସି ଭୁଲିଯାଇଥାନ୍ତି। ଏହା ବ୍ୟତୀତ ମୁଁ ଶାହାରୁଖ ଖାନ ଏବଂ ରୋହିତ ସେଟ୍ଟୀଙ୍କ ଚଳଚ୍ଚିତ୍ର ପାଇଁ ସର୍ବଦା ଉପସ୍ଥିତ ଥାଏ। ଦୁହିଁଙ୍କ ସହ ମୋର ଭଲ ସମ୍ପର୍କ ରହିଛି। ତେଣୁ କେମିଓ ପାଇଁ ମୁଁ ୧୫କୋଟି ଟଙ୍କା ପାରିଶ୍ରମିକ ନେବା ଖବର ମିଛ।” ଏଭଳି କଥା ଶୁଣି ଦୀପିକାଙ୍କ ଫ୍ୟାନ୍ସମାନେ ବହୁତ୍ ଖୁସି ହେବା ସହ ଦୀପିକାଙ୍କ ପ୍ରତି ତାଙ୍କର ଭଲପାଇବା ଆହୁରି ବଢ଼ିଯାଇଛି ।
ସେପଟେ ସେପ୍ଟେମ୍ବର ୭ରେ ମୁକ୍ତିଲାଭ କରିଥିଲା ଫିଲ୍ମ ‘ଜୱାନ’ । ପ୍ରଥମ ଦିନରେ ୭୫କୋଟି ଟଙ୍କା ସଂଗ୍ରହ କରିଥିଲା। ଦ୍ୱିତୀୟ ଦିନରେ ୫୩.୨୩କୋଟି ଟଙ୍କାର ବ୍ୟବସାୟ କରିଥିବାବେଳେ ,ତୃତୀୟ ଦିନରେ ୭୭.୮୩ କୋଟି, ଚତୁର୍ଥ ଦିନରେ ୮୦.୦୧ କୋଟି, ପଞ୍ଚମ ଦିନରେ ୩୨.୯୨ କୋଟି, ଷଷ୍ଠ ଦିନରେ ୨୬କୋଟି ଏବଂ ସପ୍ତମ ଦିନରେ ୨୩କୋଟି ଟଙ୍କା ଆୟ କରି ବଲିଉଡରେ ଇତିହାସ ରଚୁଛି ଶାହରୁଖଙ୍କ ଫିଲ୍ମ ‘ଜୱାନ’ ।
