ଓଡ଼ିଶା 365 (ବ୍ୟୁରୋ): ନୂଆ ଲୁକରେ ନଜର ଆସିଲେ କଙ୍ଗନା ରାଣାୱତ । ଯାହା ପ୍ରଶଂସକଙ୍କ ମନକୁ ଛୁଇଁଛି । ନିଜ ଅଭିନୟର ଯାଦୁରେ ଦର୍ଶକଙ୍କ ମନରେ ସ୍ୱତନ୍ତ୍ର ସ୍ଥାନ ବନାଇ ସାରିଛନ୍ତି କଙ୍ଗନା । ବର୍ତ୍ତମାନ ‘ଚନ୍ଦ୍ରମୁଖୀ-୨’କୁ ନେଇ ଚର୍ଚ୍ଚାରେ ଅଛନ୍ତି କଙ୍ଗନା । ନିକଟରେ ଅପ୍କମିଂ ହରର୍ କମେଡି ଫିଲ୍ମ ‘ଚନ୍ଦ୍ରମୁଖୀ-୨’ର ଟ୍ରେଲର ରବିବାର ଚେନ୍ନାଇରେ ରିଲିଜ୍ ହୋଇଛି । ଏଥିରେ କଙ୍ଗନାଙ୍କୁ ମହାରାଣୀ ଅବତାରରେ ଦେଖିବାକୁ ମିଳିଛି । କଙ୍ଗନା ଏକ ବଙ୍ଗାଳୀ ପୋଷାକରେ ମଥାରେ ଟିକା, ଗଳାରେ ରାଣୀ ହାର ଏବଂ କମରମଣି ପିନ୍ଧି ବେଶ୍ ସୁନ୍ଦର ଦେଖାଯିବା ସହ ତାଙ୍କ ଚରିତ୍ର ବେଶ୍ ଆକର୍ଷଣୀୟ ରହିଛି ।
ସୂଚନା ଅନୁଯାୟୀ, ବଡ଼ ଜଏଣ୍ଟ ଫ୍ୟାମିଲିରୁ ଟ୍ରେଲର ଆରମ୍ଭ ହେଉଛି । ଏକ ସମସ୍ୟାର ସମାଧାନ ପାଇଁ ସେମାନେ ଏକ ବଙ୍ଗଳାରେ ରହିବାକୁ ଆସୁଛନ୍ତି । ପରିବାର ଲୋକଙ୍କୁ ପୂର୍ବରୁ ଚେତାଇ ଦିଆଯାଉଛି ଯେ, ବଙ୍ଗଳାର ଦକ୍ଷିଣ ପଟକୁ ନ ଯିବା ପାଇଁ, କାରଣ ସେଠାରେ ଚନ୍ଦ୍ରମୁଖୀ ରହୁଛି । ଚନ୍ଦ୍ରମୁଖୀର କାହାଣୀରେ ୧୭ ବର୍ଷ ପରେ ଏକ ନୂଆ ମୋଡ଼ ଆସୁଛି । ଜଣେ ରାଜା ଏବଂ ଦରବାରରେ ନାଚୁଥିବା ନର୍ତ୍ତକୀ ଚନ୍ଦ୍ରମୁଖୀର ୨୦୦ ବର୍ଷ ପୁରୁଣା କାହାଣୀ ବର୍ତ୍ତମାନ ଯୋଡ଼ି ହୋଇ ସାମ୍ନାକୁ ଆସୁଛି ।
ଏହି ଫିଲ୍ମରେ କଙ୍ଗନାଙ୍କ ବ୍ୟତୀତ ରାଧିକା ଶରତ କୁମାର, ବାଦିବେଲୁ, ଲକ୍ଷ୍ମୀ ମେନନ, ମହିମା ନାମ୍ବିୟାର, ସୃଷ୍ଟି ଡାଙ୍ଗେ, ରବି ମାରିୟା, ସୁରେଶ ମେନନ, ମିଥୁନ ଶ୍ୟାମ, ରାଓ ରମେଶ ମଧ୍ୟ ପ୍ରମୁଖ ଭୂମିକାରେ ଅଛନ୍ତି । ସେପଟେ ଲାଇକା ପ୍ରଡକ୍ସନ ଏବଂ ସୁବାସ କରନଙ୍କ ଦ୍ୱାରା ନିର୍ମିତ ଏହି ଫିଲ୍ମ ଗଣେଶ ଚତୁର୍ଥୀ ଅବସରରେ ସେପ୍ଟେମ୍ବର ୧୫ରେ ତାମିଲ, ତେଲୁଗୁ, ହିନ୍ଦୀ, ମାଲାୟଲମ ଏବଂ କନ୍ନଡ଼ ଭାଷାରେ ମୁକ୍ତିଲାଭ କରିବ ବୋଲି ସୂଚନା ମିଳିଛି ।
