ଓଡ଼ିଶା 365 (ବ୍ୟୁରୋ): ଫିଲ୍ମ ‘ଆଶିକି-୩’ ଘୋଷଣା ହେବା ପରେ ଏହାର ନିର୍ମାତା ମୁଖ୍ୟ ନାୟିକା ଖୋଜିବାରେ ଲାଗିପଡ଼ିଥିଲେ । ହେଲେ ଶୁଣିବାକୁ ମିଳୁଛି ଯେ, ନାୟିକା ଖୋଜିବାରେ ସଫଳ ହୋଇଛନ୍ତି ନିର୍ମାତା । ସୂଚନାଅନୁସାରେ, ‘ଆଶିକି-୩’ର ଅଭିନେତା କାର୍ତ୍ତିକ ଆର୍ୟ୍ୟନଙ୍କ ଅପୋଜିଟ୍ରେ କିଏ ନାୟିକା ଅଭିନୟ କରିବେ ବୋଲି ଖୋଜାପଡ଼ିଥିଲା । ଏହାରି ମଧ୍ୟରେ କନ୍ନଡ଼ ଅଭିନେତ୍ରୀ ଆକାଂକ୍ଷା ଶର୍ମାଙ୍କ ନାଁ ସାମ୍ମନାକୁ ଆସିଛି । କାର୍ତ୍ତିକଙ୍କ ସହ ରୋମାନ୍ସ କରିବେ ଆକାଂକ୍ଷା ।
ଆକାଂକ୍ଷା ଜଣେ ମଡେଲ ଓ କନ୍ନଡ଼ ଫିଲ୍ମ ଅଭିନେତ୍ରୀ । ମଡେଲିଂରୁ ହିଁ ସେ କ୍ୟାରିଅର୍ ଆରମ୍ଭ କରିଥିଲେ ।୨୦୨୦ ମସିହାରେ ରିଲିଜ୍ ହୋଇଥିବା କନ୍ନଡ଼ ଫିଲ୍ମ ‘ତ୍ରିବିକ୍ରମ’ ଜରିଆରେ ସେ ସିନେ କ୍ୟାରିଅର ଆରମ୍ଭ କରିଥିଲେ । ବଲିଉଡ୍ ଅଭିନେତା ଟାଇଗର ଶ୍ରଫ୍ଙ୍କ ସହ ମ୍ୟୁଜିକ୍ ଭିଡିଓ ‘ଡିସ୍କୋ ୮୨’ରେ ମଧ୍ୟ କାମ କରିଥିଲେ । ଏହାସହ ମହେଶ ବାବୁ, ବରୁଣ ଧୱନ ଓ କର୍ଥୀଙ୍କ ଭଳି ଅଭିନେତାଙ୍କ ସହ ମଧ୍ୟ ବିଜ୍ଞାପନରେ ଆକାଂକ୍ଷାଙ୍କୁ ଦେଖିବାକୁ ମିଳେ ।
ସୂଚନା ଅନୁଯାୟୀ, ‘ଆଶିକି-୩’ ଫିଲ୍ମ ପାଇଁ ନିର୍ମାତା ନୂଆ ଚେହେରା ଖୋଜୁଛନ୍ତି ବୋଲି ଚର୍ଚ୍ଚା ହେଉଛି । ଆଶିକି ଫ୍ରାଞ୍ଚାଇଜିରେ ଆରମ୍ଭରୁ ନୂଆ ଚେହେରାଙ୍କୁ କାଷ୍ଟ୍ କରାଯାଇଛି। ଉଦାହରଣ ସରୂପ ରାହୁଲ ରୟ ଓ ଅନୁ ଅଗ୍ରୱାଲ , ଆଦିତ୍ୟ ରୟ କପୁର ଓ ଶ୍ରଦ୍ଧା କପୁରଙ୍କ ଭଳି ଯୋଡ଼ିକୁ ଦର୍ଶକ ଖୁବ୍ ପସନ୍ଦ କରିଥିଲେ । ତେବେ ଚର୍ଚ୍ଚା ହେଉଛି ଯେ, କାର୍ତ୍ତିକଙ୍କ ସହ ଆକାଂକ୍ଷାଙ୍କ କେମିଷ୍ଟ୍ରି ବହୁତ ଭଲ ହେବ ।
ଅନ୍ୟପଟେ ଅଭିନେତ୍ରୀ ଜେନିଫର ୱିଙ୍ଗେଟ୍, ସାରା ଅଲି ଖାନ୍, କ୍ୟାଟ୍ରିନା କୈଫ୍ ଓ ଦୀପିକାଙ୍କ ଭଳି ଅନେକ ଅଭିନେତ୍ରୀଙ୍କ ନାଁ ଫିଲ୍ମର ଲିଡ୍ ଲେଡି ପାଇଁ ସାମ୍ନାକୁ ଆସିଛି। ହେଲେ ଏପର୍ଯ୍ୟନ୍ତ କାହା ନାଁରେ ମୋହର ବାଜିନଥିବା ଚର୍ଚ୍ଚା ହେଉଛି । ସେପଟେ ଆକାଂକ୍ଷା ଏବାବଦରେ ଫିଲ୍ମମେକର୍ଙ୍କୁ ଭେଟି ଆଲୋଚନା କରିଛନ୍ତି। ହେଲେ ଫିଲ୍ମମେକର୍ ଅଦ୍ୟାବଧି ଏ ନେଇ ଔପଚାରିକ ଘୋଷଣା କରିନାହାନ୍ତି ବୋଲି ଶୁଣିବାକୁ ମିଳୁଛି ।
