ଓଡ଼ିଶା 365 (ବ୍ୟୁରୋ): ଚର୍ଚ୍ଚାରେ ଲୋକପ୍ରିୟ ଅଭିନେତା ଆର୍ ମାଧବନ । ଫିଲ୍ମ ଆଣ୍ଡ୍ ଟେଲିଭିଜନ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ଅଧ୍ୟକ୍ଷ ଓ ପରିଚାଳନା ପରିଷଦର ଚେୟାରମ୍ୟାନ୍ ଭାବରେ ନିଯୁକ୍ତ ହୋଇଛନ୍ତି ଆର୍ ମାଧବନ ।ସୂଚନା ଅନୁଯାୟୀ, ଗତ କିଛିି ଦିନ ତଳେ ଫିଲ୍ମ ‘ରକେଟ୍ରି ଦି ନାମ୍ବି ଇଫେକ୍ଟ’ କୁ ବେଷ୍ଟ ଫିଚର ଫିଲ୍ମ ବର୍ଗରେ ଜାତୀୟ ପୁରସ୍କାର ମିଳିଥିଲା। ଏଥିରେ ଅଭିନୟ କରିବା ସହିତ ନିର୍ଦ୍ଦେଶନା ଦେଇଥିଲେ ଆର୍ ମାଧବନ ।
ଅନ୍ୟପଟେ ଆର୍ ମାଧବନ ଏଫ୍ଟିଆଇଆଇର ଅଧ୍ୟକ୍ଷ ହେବା ପରେ ସୋସିଆଲ ମିଡିଆରେ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ବଧେଇ ଜଣାଇଛନ୍ତି । ସେ ଲେଖିଛନ୍ତି ଯେ, “ଆର୍ ମାଧବନ ଜୀ ଆପଣ ଏଫ୍ଟିଆଇଆଇର ଚେୟାରମ୍ୟାନ୍ ଓ ପରିଚାଳନା ପରିଷଦର ଚେୟାରମ୍ୟାନ୍ ଭାବରେ ନିଯୁକ୍ତ ହୋଇଥିବାରୁ ଆପଣଙ୍କୁ ହୃଦୟରୁ ବଧେଇ। ମୁଁ ନିଶ୍ଚିତ ଯେ ଆପଣଙ୍କର ବିଶାଳ ଅଭିଜ୍ଞତା ଏବଂ ଦୃଡ଼ ନିୟମ ସଂସ୍ଥାନକୁ ସମୃଦ୍ଧ କରିବ। ସକାରାତ୍ମକ ପରିବର୍ତ୍ତନ ଆଣିବା ସହ ଏହାକୁ ଉଚ୍ଚ ସ୍ତରକୁ ନେଇଯିବା ଆପଣଙ୍କ ପାଇଁ ମୋ ଶୁଭକାମନା।” ସେପଟେ , କେନ୍ଦ୍ରମନ୍ତ୍ରୀଙ୍କୁ ଧନ୍ୟବାଦ ଦେଇ ଆର୍ ମାଧବନ କହିଛନ୍ତି ଯେ, “ଆପଣ ମାନଙ୍କର ସମସ୍ତ ଆଶାକୁ ପୂରଣ କରିବା ପାଇଁ ମୁଁ ପ୍ରାଣପ୍ରଣେ ଚେଷ୍ଟା କରିବି ।”
