ଓଡ଼ିଶା 365 (ବ୍ୟୁରୋ) : ଚଳିତ ଏସିଆ କପ କ୍ରିକେଟ ଟୁର୍ଣ୍ଣାମେଣ୍ଟର ଦ୍ୱିତୀୟ ଲିଗ ମ୍ୟାଚ ଶ୍ରୀଲଙ୍କା ଓ ବାଂଲାଦେଶ ମଧ୍ୟରେ ଖେଳାଯାଇଥିଲା । ଏଥିରେ ବିଜୟ ହାସଲ କରିଛି ଶ୍ରୀଲଙ୍କା । ଉଭୟ ବୋଲିଂ ଓ ବ୍ୟାଟିରେ ପ୍ରଦର୍ଶନ ଭଲ କରି ବାଂଲାଦେଶକୁ ହରାଇଛି । ବାଂଲାଦେଶକୁ ୫ ୱିକେଟରେ ପରାସ୍ତ କରି ବିଜୟର ଖାତା ଖୋଲିଛି ଶ୍ରୀଲଙ୍କା । ଶ୍ରୀଲଙ୍କା ବୋଲର ମଥିଶା ପତିରଣା ଘାତକ ସାବ୍ୟସ୍ତ ହୋଇଥିଲେ । ୪ ୱିକେଟ ସଫଳତା ପାଇଥିବା ମଥିଶା ପ୍ଲେୟାର ଅଫ ଦି ମ୍ୟାଚ ମଧ୍ୟ ବିବେଚିତ ହୋଇଛନ୍ତି ।
ଟସ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ବାଂଲାଦେଶ, ଶ୍ରୀଲଙ୍କାର ଶୃଙ୍ଖଳିତ ବୋଲିଂ ଆଗରେ ତିଷ୍ଠି ପାରି ନଥିଲେ । କେବଳ ନଜମୁଲ ହୋସେନ ଶାନ୍ତୋଙ୍କୁ ଛାଡିଦେଲେ ଅନ୍ୟ କେହି ବ୍ୟାଟର ଘରୋଇ ଦଳର ବୋଲରଙ୍କ ସାମ୍ନା କରି ପାରିନଥିଲେ । ଯୁବ ବୋଲର ମଥିଶା ପତିରଣା ଓ ମହୀଶ ତୀକ୍ଷଣା ବାଂଲାଦେଶ ବ୍ୟାଟରଙ୍କୁ ଘାଇଲା କରିଥିଲେ । ଓପନର ତନଜିତ ହାସାନ ଖାତା ଖୋଲିପାରି ନଥିଲେ । ସେହିପରି ମହମ୍ମଦ ନଇମ ୧୬ ଓ ଅଧିନାୟକ ସାକିବ ଅଲ ହାସନ ୫ ରନ କରି ସଅଳ ପାଭିଲିୟନ ଫେରିଥିଲେ । ବାଂଲାଦେଶର ନିୟମିତ ବ୍ୟବଧାନରେ ୱିକେଟ ପତନ ହୋଇଥିଲା ।
