ବିନା ମୋବାଇଲ ନମ୍ବରରେ ଏକ୍ସରେ କରିହେବ ଅଡିଓ-ଭିଡିଓ କଲ୍

ଓଡ଼ିଶା365(ବ୍ୟୁରୋ): ପୁଣି ଏକ ଆକର୍ଷଣୀୟ ଫିଚର୍ ନେଇ ଘୋଷଣା କରିଛନ୍ତି ଏଲନ ମସ୍କ। ଏଣିକି ଏକ୍ସରେ ଅଡିଓ ଏବଂ ଭିଡିଓ କଲ୍ କରାଯାଇପାରିବ ବୋଲି ସେ ସୂଚନା ଦେଇଛନ୍ତି। ବିଶ୍ୱର ସବୁଠୁ ଲୋକପ୍ରିୟ ଏହି ମାଇକ୍ରୋବ୍ଲଗିଂ ଆପରେ ବ୍ୟବହାରକାରୀଙ୍କ କଲିଂ ସୁବିଧା ପାଇଁ ଏହି ଫିଚର୍ ଆସୁଛି। ଫୋନ୍ ନମ୍ବର ସେୟାର ନ କରି ବି କଲ୍ କରିପାରିବେ ବୋଲି ପ୍ଲାଟଫର୍ମ ଏକ ବ୍ଲଗ୍ ପୋଷ୍ଟ ଜରିଆରେ କହିଛି। ବ୍ଲଗ୍ ପୋଷ୍ଟରେ କୁହାଯାଇଛି, “ଏକ୍ସକୁ ଆସୁଥିବା ଭିଡିଓ ଏବଂ ଅଡିଓ କଲ୍ ଫିଚର୍ ଆଇଓଏସ୍, ଆଣ୍ଡ୍ରଏଡ୍, ମ୍ୟାକ୍ ଏବଂ ପିସିରେ ଉପଲବ୍ଧ ହେବ। ଏଥିପାଇଁ ଫୋନ୍ ନମ୍ବରର କୌଣସି ଆବଶ୍ୟକତା ପଡ଼ିବ ନାହିଁ।

ରିପୋର୍ଟ ଅନୁଯାୟୀ, ନୂତନ ଫିଚର୍ସ ଡାଇରେକ୍ଟ ମେସେଜ୍ ମେନୁ ମଧ୍ୟରେ ଉପଲବ୍ଧ ହେବ ଏବଂ ଭିଡିଓ କଲିଂ ଅପ୍ସନ୍ ଉପର ଡାହାଣ କୋଣରେ ରହିବ। ନୂତନ ଡିଏମ୍ ମେନୁର ଡିଜାଇନ୍ ଅନ୍ୟ ପ୍ଲାଟଫର୍ମଗୁଡିକ ସହିତ ସମାନ ହେବ, ଯେପରିକି ଫେସବୁକ୍ ମେସେଞ୍ଜର ଏବଂ ହ୍ୱାଟ୍ସଆପରେ ଥାଏ, ଠିକ୍ ସେହିପରି। କିଛିଦିନ ତଳେ ଏକ ଗଣମାଧ୍ୟମକୁ ପ୍ରତିକ୍ରିୟା ଦେଇ ସିଇଓ ଲିଣ୍ଡା ୟାକାରିନୋ କହିଥିଲେ, ଏପରି ଫିଚର୍ ପ୍ଲାଟଫର୍ମର ଯୋଗାଯୋଗ ବ୍ୟବସ୍ଥାକୁ ବୃଦ୍ଧି କରିବା ସହ ବ୍ୟବହାରକାରୀଙ୍କୁ ପରସ୍ପର ସହ ଯୋଡିହେବା ପାଇଁ ଅଧିକ ସୁଯୋଗ ପ୍ରଦାନ କରିବ। ୨୦୨୨ରେ ୪୪ ବିଲିୟନ ଡଲାରରେ ଟ୍ୱିଟରକୁ ନିଜ ଅଧିନକୁ ନେବା ପରେ ପ୍ଲାଟଫର୍ମରେ ଅନେକ ପରିବର୍ତ୍ତନ ଆଣିଛନ୍ତି ମସ୍କ। କମ୍ପାନୀର ଲୋଗୋ, ନାମ ପରିବର୍ତ୍ତନ କରିବା ସହ ଅନେକ ନୂଆ ଫିଚର୍ସ ସେ ଲଞ୍ଚ୍ କରିଛନ୍ତି। ବର୍ତ୍ତମାନ ଟ୍ୱିଟରରେ ବଡ ଧରଣର ସାଇବର୍ କ୍ରାଇମ୍ ନେଇ ଅନ୍ତର୍ଜାତୀୟ ଅନୁସନ୍ଧାନ ସଂସ୍ଥା ରିପୋର୍ଟ କରିବା ପରେ ୟୁଜର୍ସଙ୍କ ଗୋପନୀୟତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ଆଉ ଠିକ୍ ଏହି ସମୟ ମଧ୍ୟରେ ଏକ୍ସରେ ଅଡିଓ-ଭିଡିଓ କଲ୍ ୟୁଜରଙ୍କୁ କେତେ ସୁରକ୍ଷା ଯୋଗାଇବ ତାହାକୁ ନେଇ ନାନା ପ୍ରଶ୍ନ ଉଠିଛି ।