ଓଡ଼ିଶା365(ବ୍ୟୁରୋ): ଭାରତ ନିର୍ବାଚନ କମିଶନଙ୍କ ପାଇଁ ଭୋଟର ସଚେତନତା ସୃଷ୍ଟି କରିବାକୁ ‘ଭାରତରତ୍ନ’ ସଚିନ୍ ତେନ୍ଦୁଲକରଙ୍କୁ ବଛା ଯାଇଛି। ମୁଖ୍ୟ ନିର୍ବାଚନ କମିଶନର ରାଜୀବ କୁମାର, ନିର୍ବାଚନ କମିଶନର ଅନୁପ ଚନ୍ଦ୍ର ପାଣ୍ଡେ ଏବଂ ଅରୁଣ ଗୋଏଲଙ୍କ ଉପସ୍ଥିତିରେ ନୂଆଦିଲ୍ଲୀର ଆକାଶବାଣୀ ରଙ୍ଗ ଭବନରେ ଆୟୋଜିତ କାର୍ଯ୍ୟକ୍ରମରେ ସଚିନ ୩ ବର୍ଷ ପାଇଁ ଏହି ଚୁକ୍ତି ସ୍ୱାକ୍ଷର କରିଛନ୍ତି । ଆଗାମୀ ନିର୍ବାଚନରେ ସଚିନ ଅଧିକରୁ ଅଧିକ ମତଦାନ ପାଇଁ ଭୋଟରଙ୍କୁ ସଚେତନ କରିବେ। ସଚିନ କହିଛନ୍ତି ‘ରାଷ୍ଟ୍ର ନିର୍ମାଣରେ ଯୁବକଙ୍କର ପ୍ରମୁଖ ଭୂମିକା ରହିଛି। କ୍ରିକେଟ୍ ମ୍ୟାଚ୍ ସମୟରେ ଟିମ୍ ଇଣ୍ଡିଆ ପାଇଁ ଏକ ସ୍ୱରରେ ‘ଇଣ୍ଡିଆ..ଇଣ୍ଡିଆ’ ଜୟକାରରେ ଅନେକ ହୃଦୟ ସ୍ପନ୍ଦିତ ହୋଇଥାଏ। ଏପରି କରିବା ସରଳ କିନ୍ତୁ ସବୁଠାରୁ ଶକ୍ତିଶାଳୀ ଉପାୟ ହେଉଛି ସର୍ବଦା ନିଜର ମତାମତ ଭୋଟ ମାଧ୍ୟମରେ ପ୍ରଦାନ କରିବା।
ମୁଖ୍ୟ ନିର୍ବାଚନ କମିଶନର ରାଜୀବ କୁମାର କହିଛନ୍ତି, ‘କେବଳ ଭାରତ ନୁହେଁ ସାରା ବିଶ୍ୱରେ ସଚିନ ତେନ୍ଦୁଲକରଙ୍କ ସ୍ୱତନ୍ତ୍ର ପରିଚୟ ରହିଛି। ତାଙ୍କର ଉତ୍କୃଷ୍ଟ କ୍ୟାରିୟର ହେଉଛି ଉତ୍କର୍ଷତା, ଦଳଗତ କାର୍ଯ୍ୟ ଏବଂ ସଫଳତାର ନିରନ୍ତର ଅନୁସରଣ ପାଇଁ ତାଙ୍କର ପ୍ରତିବଦ୍ଧତାର ପ୍ରମାଣ। ଭାରତ ନିର୍ବାଚନ କମିଶନଙ୍କ ସହ ସହଯୋଗ କରିବା ଏବଂ ମତଦାତାଙ୍କୁ ଆକର୍ଷିତ କରିବା ପାଇଁ ଏକ ଆଦର୍ଶ ବିକଳ୍ପ ଭାବରେ ସେ ସୃଷ୍ଟି ହୋଇଛନ୍ତି । ସେ ଅଧିକରୁ ଅଧିକ ଭୋଟରଙ୍କୁ ଭୋଟ୍ ଦେବା ପାଇଁ ଉତ୍ସାହିତ କରିବେ ।
ଟେଲିଭିଜନ ଏବଂ ସୋସିଆଲ ମିଡିଆରେ ସଚିନ ବିଭିନ୍ନ ସଚେତନତା ଧର୍ମୀ କାର୍ଯ୍ୟକ୍ରମରେ ଯୋଡ଼ି ହେବେ । କାର୍ଯ୍ୟକ୍ରମରେ ନ୍ୟାସନାଲ ସ୍କୁଲ ଅଫ୍ ଡ୍ରାମାର ଛାତ୍ରଛାତ୍ରୀ ଭୋଟ ଦେବାର ଗୁରୁତ୍ୱ ଉପରେ ଏକ ନାଟକ ପରିବେଷଣ କରିଥିଲେ । ଭାରତୀୟ ନିର୍ବାଚନ କମିଶନ ବିଭିନ୍ନ କ୍ଷେତ୍ରରେ ସଫଳତା ହାସଲ କରିଥିବା ବ୍ୟକ୍ତି ବିଶେଷଙ୍କୁ ଗଣତନ୍ତ୍ର ଉତ୍ସବରେ ଅଂଶୀଦାର ହେବାକୁ ଭୋଟରଙ୍କୁ ଉତ୍ସାହିତ କରିବା ପାଇଁ ସେମାନଙ୍କୁ ‘ଜାତୀୟ ଆଇକନ’ ଭାବେ ନିଯୁକ୍ତ କରିଥାନ୍ତି । ଗତ ବର୍ଷ ଅଭିନେତା ପଙ୍କଜ ତ୍ରିପାଠୀ ଏବଂ ୨୦୧୯ ଲୋକସଭା ନିର୍ବାଚନ ସମୟରେ ଏମ୍ଏସ୍ ଧୋନି, ଆମିର ଖାନ ଏବଂ ମେରୀ କମ୍ଙ୍କୁ ‘ଜାତୀୟ ଆଇକନ୍’ କରାଯାଇଥିଲା ।
