ଓଡ଼ିଶା 365:(ବ୍ୟୁରୋ) ଆମେରିକାରେ ରାଷ୍ଟ୍ରପତି ନିର୍ବାଚନ ପାଇଁ ଆରମ୍ଭ ହୋଇଛି ପ୍ରସ୍ତୁତି । ଏହାରି ଭିତରେ ଆମେରିକା ରାଷ୍ଟ୍ରପତି ନିର୍ବାଚନ ଦୌଡ଼ରେ ଥିବା ଜଣେ ଭାରତୀୟ ବଂଶୋଦ୍ଭବ ପ୍ରାର୍ଥୀ ବିବେକ ରାମାସ୍ବାମୀଙ୍କୁ ଟେସ୍ଲା ଓ ଏକ୍ସ ମାଲିକ ଏଲନ ମସ୍କ ପ୍ରଶଂସା କରିଛନ୍ତି। ରିପବ୍ଲିକାନ୍ ନେତା ରାମାସ୍ବାମୀଙ୍କ ଏକ ଟେଲିଭିଜନ ସାକ୍ଷାତକାର ଉପରେ ପ୍ରତିକ୍ରିୟା ରଖି ମସ୍କ ତାଙ୍କୁ ଆମେରିକା ରାଷ୍ଟ୍ରପତି ପଦ ପାଇଁ ଜଣେ ଯୋଗ୍ୟ ପ୍ରାର୍ଥୀ ବୋଲି କହିଛନ୍ତି। ରାମାସ୍ବାମୀଙ୍କ ପ୍ରାର୍ଥିତ୍ବକୁ ମସ୍କ ଉତ୍ସାହଜନକ ଏବଂ ରାଷ୍ଟ୍ର ହିତ ପାଇଁ ଶୁଭଙ୍କର ବୋଲି କହିଛନ୍ତି। ମସ୍କଙ୍କ ଏଭଳି ପ୍ରଶଂସା ରାଷ୍ଟ୍ରପତି ନିର୍ବାଚନକୁ ନେଇ ଉଷ୍ଣତା ବଢ଼ାଇ ଦେଇଛି। ୩୭ ବର୍ଷୀୟ ରାମାସ୍ବାମୀ ହେଉଛନ୍ତି ଆମେରିକାରେ ସବୁଠାରୁ କନିଷ୍ଠ ରିପବ୍ଲିକାନ ରାଷ୍ଟ୍ରପତି ପ୍ରାର୍ଥୀ। ରାମାସ୍ବାମୀ ଏକ ସାକ୍ଷାତକାରରେ କହିଥିଲେ ଯେ ଚୀନ୍ ଆମେରିକାର ପ୍ରମୁଖ ବ୍ୟବସାୟୀଙ୍କୁ କଣ୍ଢେଈ ଭାବେ ବ୍ୟବହାର କରି ନିଜ ଲକ୍ଷ୍ୟସ୍ଥଳରେ ପହଞ୍ଚିବା ପାଇଁ ଚାହୁଛି।
ଆମେରିକା ରାଷ୍ଟ୍ରପତି ନିର୍ବାଚନ: ଭାରତୀୟ ବଂଶୋଦ୍ଭବ ପ୍ରାର୍ଥୀଙ୍କୁ ଏଲନ ମସ୍କଙ୍କ ପ୍ରଶଂସା
