ନ୍ୟୁଜ୍ 365(ବ୍ୟୁରୋ):ଅତ୍ୟାଚାର ସୀମା ଲଙ୍ଘୁଥିଲା, ଅସହ୍ୟ ହେଉଥିଲା ନିର୍ଯାତନା। ଭାରତ ମାଆ ଓଠରେ ହସ ଫୁଠାଇବା ପାଇଁ ସେ ନିଗାଡ଼ି ଦେଇଥିଲେ ରକ୍ତ। ଶେଷରେ ଫର ଫର ହୋଇ ଉଡିଥିଲା ତ୍ରିରଙ୍ଗା। ସ୍ଵାଧୀନତାର ରଙ୍ଗ ଲାଗିଥିଲା ସଭିଙ୍କ ଦେହରେ। ଦିଲ୍ଲୀ ଚଲୋ,ମୋତେ ରକ୍ତ ଦିଅ, ମୁଁ ତୁମକୁ ସ୍ଵାଧୀନତା ଦେବି,ପରାଧିନତାର ଶୃଙ୍ଖଳକୁ ଭାଙ୍ଗି ସ୍ଵାଧୀନତାର ସୂର୍ଯ୍ୟୋଦୟ ଦେଖାଇବି, ତାଙ୍କର ଆହ୍ଵାନରେ ପିରିଙ୍ଗି ବିରୋଧରେ ଏକଜୁଟ ହୋଇଥିଲେ ବହୁ ଭାରତୀୟ । ଆଜାଦ ହିନ୍ଦ ଫୌଜ ଦେଶକୁ ଦେଖାଇଥିଲା ବାଟ। ଇଟାର ଜବାବ ଇଟାରେ ନୁହେଁ ପଥରରେ ଦେବାକୁ କହୁଥିଲେ ସେ । ତାଙ୍କ ନାଁ ଶୁଣିଲେ ଛନକା ପସୁଥିଲା ଇଂରେଜଙ୍କ ଛାତିରେ । ଅନେକ ଥର ବେଶ ବଦଳାଇ ପିରିଙ୍ଗି ସେନାକୁ ଚକମା ଦେଇଛନ୍ତି ସେ । ସେ ଥିଲେ ଦେଶଭକ୍ତ, ସ୍ଵାଧୀନତା ସଂଗ୍ରାମୀ, ଓଡ଼ିଶା ମାର ବୀରପୁତ୍ର ସଂଗ୍ରାମୀ ନେତାଜୀ ସୁଭାଷ ଚନ୍ଦ୍ର ବୋଷ । ସାରା ବିଶ୍ବରେ ନେତାଜୀ ନାଁରେ ସେ ଜଣାଶୁଣା।
୧୮୯୭ ମସିହା ଜାନୁଆରୀ ୨୩ ତାରିଖରେ ଓଡ଼ିଶାର କଟକରେ ଜନ୍ମଗ୍ରହଣ କରିଥିଲେ ସୁଭାଷ । ଜାନକୀନାଥ ବୋଷଙ୍କର ପୁତ୍ର ଭାବରେ ସୁଭାଷ ସମଗ୍ର ବିଶ୍ଵର ବିସ୍ମୟ ବିଦ୍ରୋହୀ ସଂଗ୍ରାମୀ ନେତା ଭାବରେ ପରିଚିତ । ୧୯୦୮ମସିହା ଅଗଷ୍ଟ ମାସ ୧୧ ତାରିଖ ଦିନ ଖୁଦୀରାମଙ୍କୁ ଇଂରେଜ ସରକାରଙ୍କ ଦ୍ୱାରା ଫାସି ଦିଆଯାଇଥିଲା । ସୁଭାଷଙ୍କ ଉପରେ ଏହାର ପ୍ରଭାବ ପଡ଼ିଲା । ୧୯୧୧ ମସିହା ଅଗଷ୍ଟରେ ରେଭେନ୍ସା କଲେଜିଏଟ ସ୍କୁଲ ଛାତ୍ରାବାସରେ ଚୁଲି ଜଳି ନଥିଲା । ସମସ୍ତେ ଉପବାସ ରହି ଖୁଦିରାମଙ୍କର ସ୍ମୃତିସଭା ପାଳନ କରିଥିଲେ। ୧୯୨୧ରେ ଆଇସିଏସର ତାଲିମ ନେଉଥିବା ବେଳେ ଭାରତରେ ଜାଲିଆନାୱାଲାବାଗ ହତ୍ୟାକାଣ୍ଡ ଘଟିଥିଲା । ସେ ଅଧାରୁ ତାଲିମ ଛାଡ଼ି ଭାରତ ଫେରି ଆସିଥିଲେ । ଦେଶବନ୍ଧୁ ଚିତ୍ତରଞ୍ଜନ ଦାସଙ୍କ ସମ୍ପର୍କରେ ଆସିବା ପରେ ସେ ଭାରତୀୟ ଜାତୀୟ କଂଗ୍ରେସରେ ଯୋଗଦେଇ ୧୯୨୩ରେ ବଙ୍ଗଳା ପ୍ରାଦେଶିକ କଂଗ୍ରେସ କମିଟିର ସମ୍ପାଦକ ହୋଇଥିଲେ ।
୧୯୩୦ରେ ଆଇନ ଅମାନ୍ୟ ଆନ୍ଦୋଳନ ବେଳେ ସୁଭାଷଙ୍କୁ ଗିରଫ କରି ଜେଲରେ ରଖାଯାଇଥିଲା। ତଥାପି ସ୍ବାଧିନତା ହାସଲ ପାଇଁ ସେ ଜାରି ରଖିଥିଲେ ସଂଗ୍ରାମ। ୧୯୩୯ରେ ସେ ଫରୱାର୍ଡ଼ ବ୍ଳକ ନାମକ ଏକ ନୂତନ ଦଳ ଗଠନ କରିଥିଲେ । ସଶସ୍ତ୍ର ଆନ୍ଦୋଳନ ଦ୍ଵାରା ହିଁ ଭାରତକୁ ବ୍ରିଟିଶ ସାମ୍ରାଜ୍ୟବାଦରୁ ମୁକ୍ତ କରିହେବ ବୋଲି ସେ ବିଶ୍ଵାସ କରୁଥିଲେ । ସୁଭାଷଙ୍କର ଏହି ଉଗ୍ରନୀତି ବ୍ରିଟିଶ ସରକାରଙ୍କ ନିଦ ହଜାଇଦେଇଥିଲା। ଭାରତର ସ୍ଵାଧୀନତା ପାଇଁ ଭାରତ ବାହାରେ ରହି ଯୁଦ୍ଧ କରିବା ପାଇଁ ୧୯୪୧ ଜାନୁଆରୀ ୧୭ ତାରିଖରେ ସେ ଭାରତର ସୀମା ଅତିକ୍ରମ କରି ବର୍ଲିନଠାରେ ପହଞ୍ଚିଥିଲେ । ଜର୍ମାନୀର ନାଜି ଶାସକ ହିଟଲରଙ୍କ ସହ ସାକ୍ଷାତ କରି ଭାରତର ସ୍ଵାଧୀନତା ହାସଲ ସମ୍ପର୍କରେ ତାଙ୍କୁ ସାହାଯ୍ୟ କରିବାକୁ ଅନୁରୋଧ କରିଥିଲେ। ବର୍ଲିନଠାରେ ଏକ ମୁକ୍ତ ଭାରତ କେନ୍ଦ୍ର ଉନ୍ମୋଚନ କଲେ ଓ ଜର୍ମାନୀ ମାଟିରେ ଫ୍ରି ଇଣ୍ଡିଆ ଆର୍ମି ଗଠନ କରିଥିଲେ। ବର୍ଲିନରୁ ଆଜାଦ ହିନ୍ଦ ରେଡ଼ିଓ ମାଧ୍ୟମରେ ଭାରତବାସୀଙ୍କୁ ସଂଗ୍ରାମ ପାଇଁ ଆହ୍ଵାନ ଦେଇଥିଲେ ।
ଦ୍ଵିତୀୟ ବିଶ୍ଵଯୁଦ୍ଧ ସମୟରେ ଜାପାନରେ ରାସ ବିହାରୀ ବୋଷ ନାମକ ଜଣେ ଭାରତୀୟ ଜାପାନ, ବର୍ମା ପ୍ରଭୃତି ସ୍ଥାନରେ ପ୍ରବାସୀ ଭାରତୀୟ ଓ ଯୁଦ୍ଧ ବନ୍ଦୀମାନଙ୍କୁ ଏକତ୍ରିତ କରି ଭାରତୀୟ ସ୍ଵାଧୀନତା ଲିଗ ଗଠନ କଲେ । ସୁଭାଷ ସିଙ୍ଗାପୁରରେ ଆଜାଦ ହିନ୍ଦ ଫୌଜର ଦାୟିତ୍ଵ ଗ୍ରହଣ କଲେ ଏବଂ ୧୯୪୩ ମସିହା ଅକ୍ଟୋବର ୨୧ତାରିଖ ଦିନ ସେଠାରେ ଏକ ଅସ୍ଥାୟୀ ସ୍ଵାଧୀନ ସରକାର ମଧ୍ୟ ଗଠନ କରିଥିଲେ । ସେହିଠାରୁ ସେ ଆହ୍ଵାନ ଦେଇଥିଲେ ଦିଲ୍ଲୀ ଚଲୋ । ଏହା ସହ ଆରମ୍ଭ ହୋଇଥିଲା ଆଜାଦ ହିନ୍ଦ ଫୌଜର ଅଭିଯାନ । ୧୯୪୪ ମାର୍ଚ୍ଚ ୧୮ ତାରିଖରେ ଆଜାଦ ହିନ୍ଦ ଫୌଜ ବର୍ମା ସୀମା ଅତିକ୍ରମ କରି ଭାରତୀୟ ମାଟିରେ ପାଦ ଥାପିଥିଲା ଓ ମଣିପୁରର ଇମ୍ଫାଲ ଯାଏଁ ଏହି ଅଭିଯାନ ଅଗ୍ରସର ହୋଇଥିଲା । ଆଜାଦ ହିନ୍ଦ ଫୌଜ ଦୃଢ଼ ପଦକ୍ଷେପ ବ୍ରିଟିଶ ବାହିନୀର ନିଦ ହଜାଇଦେଇଥିଲା। ୧୯୪୫ ଅଗଷ୍ଟ ୧୮ ତାଙ୍କ ମୃତ୍ୟୁ ଆଜି ବି ରହିଛି ରହସ୍ୟ ଘେରରେ,ମୃତ୍ୟୁ ଉପରୁ ଏଯାଏ ଉଠିନି ପରଦା,ଜାପାନର ରାଜଧାନୀ ଟୋକିଓ ଅଭିମୁଖେ ଉଡାଜାହାଜରେ ଯାଉଥିବା ସମୟରେ ଲାଗିଥିଲା ନିଆଁ,ମାତ୍ର ସେ ବେଠୁ ଏଯାଏ ମିଳିପାରିନି ତାଙ୍କ ସନ୍ଧାନ । କିନ୍ତୁ ତାଙ୍କ ବୀରତ୍ବକୁ ସବୁଦିନ ପାଇଁ ମନେ ରଖିବ ଏମାଟି।
