ନ୍ୟୁଜ୍ ୩୬୫ (ବ୍ୟୁରୋ): ଏସୀୟ ଚାମ୍ପିଅନ୍ସ ଟ୍ରଫି ହକିରୁ ବିଦା ହେଲା ପାକିସ୍ତାନ । ପାକିସ୍ତାନକୁ ଲାଗିଛି ବଡ଼ ଝଟ୍କା । ବିଦାୟ ରାସ୍ତା ଦେଖାଇ ପାକିସ୍ତାନ ହାତରୁ ସବୁଦିନ ପାଇଁ ଏସୀୟ ଚାମ୍ପିଅନ୍ସ ଟ୍ରଫି ଛଡାଇ ଆଣିଛି ଭାରତ । ବୁଧବାର ଖେଳାଯାଇଥିବା ଶେଷ ଲିଗ୍ ମ୍ୟାଚରେ ପୂର୍ବରୁ ସେମିଫାଇନାଲ୍ ସ୍ଥାନ ନିଶ୍ଚିତ କରିଥିବା ଭାରତ ଘରୋଇ ପରିବେଶର ଫାଇଦା ଉଠାଇଛି । ୪-୦ ଗୋଲରେ ପାକିସ୍ତାନକୁ ମାତ୍ ଦେଇଛି । ଏହି ବିଜୟ ସହ ଭାରତ ଲିଗ୍ ପର୍ୟ୍ୟାୟରେ ଅପରାଜେୟ ରହିବା ସହ ଟେବୁଲର ଶୀର୍ଷ ସ୍ଥାନ ଦଖଲ କରିଛି ।
ସୂଚନାଅନୁଯାୟୀ, ଆସନ୍ତାକାଲି ଶୁକ୍ରବାର ସେମିଫାଇନାଲରେ ଭାରତ ଟେବୁଲର ଚତୁର୍ଥ ସ୍ଥାନରେ ଥିବା ଜାପାନକୁ ଭେଟିବ । ସେପଟେ ସେମିଫାଇନାଲରେ ମୁହାଁମୁହିଁ ହେବେ ମାଲେସିଆ ଓ କୋରିଆ । ଜାପାନ, କୋରିଆ ଓ ପାକିସ୍ତାନ ସମାନ ୫ ପଏଣ୍ଟ ଲେଖାଏଁ ପାଇଥିଲେ ମଧ୍ୟ ଗୋଲ୍ ବ୍ୟବଧାନରେ ପାକିସ୍ତାନ ପଛରେ ପଡ଼ି ସେମିଫାଇନାଲ୍ ଦୌଡ଼ରୁ ବାଦ୍ ପଡ଼ିଥିଲା । ଏବେ ପଞ୍ଚମ ସ୍ତାନ ହାସଲ କରିବା ଲକ୍ଷ୍ୟରେ ଚୀନ୍ ସହ ଲଢ଼ିବ ପାକିସ୍ତାନ ।
