ନ୍ୟୁଜ 365 (ବ୍ୟୁରୋ): ଉତ୍ତରପ୍ରଦେଶର ଏଟା ଜିଲ୍ଲାରେ ମର୍ମନ୍ତୁଦ ସଡକ ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ଘଟିଛି । ଭାରସାମ୍ୟ ହରାଇ ଏକ କାର୍ କେନାଲକୁ ଖସି ପଡିବାରୁ ଗୋଟିଏ ପରିବାରର ୫ ଜଣଙ୍କ ମୃତ୍ୟୁ ହୋଇଛି । ପୁଲିସ ଘଟଣା ସ୍ଥଲରେ ପହଂଚି ତଦନ୍ତ ଆରମ୍ଭ କରିବା ସହ ମୃତଦେହ ଉଦ୍ଧାର କରିଛି । ସୂଚନାନୁଯାୟୀ, କାସଗଞ୍ଜ ଜିଲାର ଗଞ୍ଜଣ୍ଡୱାରା ଥାନା ଅନ୍ତର୍ଗତ ଏକ ଗାଁର ବାସିନ୍ଦା ଜଣେ ମହିଳାଙ୍କ ଚିକିତ୍ସା ପାଇଁ କାର ଯୋଗେ ଯାଉଥିଲେ। ସେହି ସମୟରେ ପୋଲ ଉପରେ ଯିବା ସମୟରେ ଦ୍ରୁତ ଗତିରେ ଥିବା ହେତୁ କାର୍ଟି ଅନିୟନ୍ତ୍ରିତ ହୋଇ କେନାଲ ମଧ୍ୟକୁ ଖସି ପଡିଥିଲା। ଖବର ପାଇବା ମାତ୍ରେ ପୁଲିସ ଓ ଉଦ୍ଧାରକାରୀ ଦଳ ଘଟଣା ସ୍ଥଲରେ ପହଂଚି କାରରେ ଫସିଥିବା ସଭିଁଙ୍କୁ ବାହାର କରିଥିଲେ। ସେଠାରୁ ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ମାତ୍ର ଡାକ୍ତର ସଭିଁଙ୍କୁ ମୃତ ଘୋଷଣା କରିଥିଲେ। ପୁଲିସ ଘଟଣାର ତଦନ୍ତ ଜାରି ରଖିଛି ।
