ଭାରତରେ ୯ ହଜାର କୋଟି ଟଙ୍କାର ଟିକସ ଫାଙ୍କିଛନ୍ତି ଚାଇନା ଫୋନ କମ୍ପାନି

ନ୍ୟୁଜ 365 (ବ୍ୟୁରୋ): ଭାରତ ସରକାରଙ୍କ ୯ ହଜାର କୋଟି ଟଙ୍କାର ଟିକସ ଫାଙ୍କିଛି ଚୀନ । ଚାଇନା ମୋବାଇଲ ଫୋନ ନିର୍ମାଣକାରୀ କମ୍ପାନୀଗୁଡିକ କଷ୍ଟମ ଡ୍ୟୁଟି ଏବଂ ଜିଏସ୍ଟି ଆକାରରେ ଭାରତ ସରକାରଙ୍କୁ ୯,୦୦୦ କୋଟି ଟଙ୍କା ଟିକସ ଦେଇ ନାହାନ୍ତିି। କମ୍ପାନୀ ଠାରୁ କେବଳ ୧,୬୨୯ କୋଟି ଟଙ୍କା ଆଦାୟ ହୋଇଛି ବୋଲି ସଂସଦରେ ଲିଖିତ ଉତ୍ତର ରଖିଛନ୍ତି ବୈଦ୍ୟୁତିକ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ରାଜୀବ ଚନ୍ଦ୍ରଶେଖର । ଚାଇନାର ମୋବାଇଲ କମ୍ପାନୀ ପକ୍ଷରୁ ଭାରତରେ ପୁଞ୍ଜି ବିନିଯୋଗ, ନିଯୁକ୍ତି ଏବଂ ଟିକସ ସହ ଜଡିତ ପ୍ରଶ୍ନର ଲିଖିତ ଉତ୍ତର ରଖି ରାଜୀବ ଚନ୍ଦ୍ରଶେଖର କହିଛନ୍ତି ଯେ, ଓପୋ କମ୍ପାନୀ ସର୍ବାଧିକ ୫,୦୮୬ କୋଟି ଟିକସ ପୈଠ କରିନାହିଁ। ଏଥିରେ ୪,୪୦୩ କୋଟି କଷ୍ଟମ ଡ୍ୟୁଟି ଏବଂ ୬୮୩ କୋଟି ଜିଏସ୍ଟି ଅନ୍ତର୍ଭୁକ୍ତ। ଭିଭୋ କମ୍ପାନୀ ୨,୯୨୩.୨୫ କୋଟି ଏବଂ ସାଓମି ୮୫୧.୧୪ କୋଟି ଟଙ୍କା ଟିକସ ଦେଇ ନାହାନ୍ତି। ୨୦୧୭-୧୮ରୁ ବର୍ତ୍ତମାନ ପର୍ଯ୍ୟନ୍ତ ହୋଇଥିବା ପରିସଂଖ୍ୟାନ ଆଧାରରେ ଏହି ସୂଚନା ଦେଇଛନ୍ତି ମନ୍ତ୍ରୀ ରାଜୀବ ଚନ୍ଦ୍ରଶେଖର ।