‘ପଠାନ୍’ର ସଫଳତା ପରେ ‘ଯବାନ’ ସାଜି ପୁଣି ଏକ ଧମାକା କରିବାକୁ ପ୍ରସ୍ତୁତ ବଲିଉଡ଼ ଅଭିନେତା ଶାହରୁଖ୍ ଖାନ୍। ଗୁରୁବାର କିଙ୍ଗ୍ ଖାନ୍ ଟ୍ବିଟରରେ ସେସନ୍ #AskSRK ରଖିଥିଲେ। ଏଥିରେ ୟୁଜରମାନେ ସାମିଲ ହୋଇ ତାଙ୍କୁ ଫିଲ୍ମ ସମ୍ପର୍କିତ ଅନେକ ପ୍ରଶ୍ନ ପଚାରିଥିଲେ ଏବଂ ଶାହରୁଖ୍ ଗୋଟି ଗୋଟି କରି ସମସ୍ତଙ୍କୁ ଉତ୍ତର ଦେଇଥିଲେ। ଏହାର ତୁରନ୍ତ ପରେ ସେ ‘ଯବାନ’ର ଏକ ନୂଆ ପୋଷ୍ଟର ରିଲିଜ୍ କରିଛନ୍ତି, ଯେଉଁଥିରେ ତାଙ୍କ ନୂଆ ରୂପ ଦେଖିବାକୁ ମିଳିଛି।
ପୂର୍ବରୁ ପ୍ରିଭ୍ୟୁରେ ଦର୍ଶକ ଶାହରୁଖଙ୍କ ଲଣ୍ଡା ରୂପର ଝଲକ୍ ଦେଖି ଫିଲ୍ମକୁ ନେଇ ତାଙ୍କ ଉତ୍କଣ୍ଠା ଦୁଇଗୁଣା ହୋଇଥିଲା। ଏବେ ସେ ସେହି ରୂପର ନୂଆ ପୋଷ୍ଟର ଶେୟାର କରି ଦର୍ଶକଙ୍କୁ ଆହୁରି ବ୍ୟଗ୍ର କରିଦେଇଛନ୍ତି। ପୋଷ୍ଟରେ ଶାହରୁଖଙ୍କ ଲଣ୍ଡା ମୁଣ୍ଡ ସହ ଆଖିରେ କଳା ଚଷମା ଓ ହାତରେ ବନ୍ଧୁକ ଧରିଥିବା ଦେଖିବାକୁ ମିଳିଛି। ପୋଷ୍ଟରକୁ ହିନ୍ଦୀ, ଇଂରାଜୀ, ତାମିଲ ଓ ତେଲୁଗୁ ୪ଟି ଭାଷାରେ ରିଲିଜ୍ କରାଯାଇଛି।
