ଦରକାର ନାହିଁ ତୁର୍କୀ ସେଓ, ଆମେ କିଣିବୁ କାଶ୍ମୀର ସେଓ..ପାକିସ୍ତାନ ସହ ମିଶି ଭାରତ ସହ ଯେମିତି ଲାଗିଛି ତୁର୍କୀ ସେମିତି ତାକୁ ପାନେ ଦେବୁ । ଆଉ କିଣିବିକା ବନ୍ଦ କରି ତୁର୍କୀର ଆର୍ଥିକ ସ୍ଥିତିକୁ ଦୋହଲାଇ ଦେବୁ । ପାକିସ୍ତାନ ପରି ପାନେ ପାଇବ ତୁର୍କୀ । ମହଙ୍ଗା ପଡିବ ପାକିସ୍ତାନ ପ୍ରୀତି । କିଛି ଏମିତି ଢଙ୍ଗରେ କହି ତୁର୍କୀ ସାମଗ୍ରୀ ଉପରେ କଟକଣା ଲଗାଇଛନ୍ତି ଭାରତୀୟ ବ୍ୟବସାୟୀ । ଭାରତ ବିରୋଧରେ ପାକିସ୍ତାନକୁ ୪୦୦ ଡ୍ରୋନ ତୁର୍କୀ ଦେଇଥିବା କଥା ସ୍ପଷ୍ଟ ହେବା ପରେ ଏବେ ରାତି ପାଚି ନାଲି ହୋଇଛନ୍ତି ଭାରତୀୟ । ବ୍ୟବସାୟ କ୍ଷେତ୍ରରେ ତୁର୍କୀକୁ ପାନେ ଦେବାକୁ ଆଗେଇ ଆସି ଆକ୍ସନ ନେବା ଆରମ୍ଭ କରିଛନ୍ତି ।
ଦେଶର ବିଭିନ୍ନ ସ୍ଥାନରେ ତୁର୍କୀ ସାମଗ୍ରୀ ସହ ତୁର୍କୀ ଫଳ ଉପରେ କଟକଣା ଲଗାଇଛନ୍ତି ବ୍ୟବସାୟୀ ସଙ୍ଘ । ତେବେ ତୁର୍କୀ ସେଓ ଏବଂ ତୁର୍କୀ ଫଳକୁ ବ୍ୟାନ୍ କରିବା ପରେ ଏବେ କାଶ୍ମୀର ସେଓର ବଢିଛି ଚାହିଦା । କାଶ୍ମୀର ସେଓ କିଣିବାକୁ ଲୋକେ ପସନ୍ଦ କରୁଛନ୍ତି । ତୁର୍କୀ ସେଓ ନକିଣି ଲୋକେ କାଶ୍ମୀର ସେଓ କିଣୁଥିବା ଦେଖିବାକୁ ମିଳିଛି ।
ରାଜସ୍ଥାନ ଆଜମେରର ଫଳ ବ୍ୟବସାୟୀ ଅର୍ଜୁନ କହିଛନ୍ତି ଆମେ ତୁର୍କୀରୁ ଆସୁଥିବା ସେଓ ଏବଂ କ୍ୟୁଇକୁ ବ୍ୟାନ୍ କରିଛୁ । ଆଗାମୀ ଦିନରେ ତୁର୍କୀରୁ ଆସୁଥିବା ସବୁ ଫଳ ଉପରେ ରୋକ୍ ଲଗାଇବୁ । ବଜାରକୁ ପ୍ରବେଶ କରିବାକୁ ଦେବୁନି । ପାକିସ୍ତାନ ସହ ମିଶି ତୁର୍କୀ ଯେମିତି ଭାରତ ବିରୋଧରେ ଲାଗିଛି ତାକୁ ଆମେ ପାନେ ଦେବୁ ବୋଲି ସେ କହିଛନ୍ତି ।
ସେପଟେ ଗତକାଲି ଓଡ଼ିଶାର ଭଦ୍ରକ ସମେତ ଦେଶର ବିଭିନ୍ନ ସ୍ଥାନରେ ତୁର୍କୀ ଫଳ ଉପରେ ରୋକ ଲଗାଇବାର ଚିତ୍ର ଆସିଥିବା ବେଳେ ଦିଲ୍ଲୀରେ ଗତକାଲି ତୁର୍କୀ ଦୂତାବାସ ଅଭିମୁଖେ ଯାତ୍ରା କକି ବିରୋଧ ପ୍ରଦର୍ଶନ କରାଯାଇଛି । ସ୍ବଦେଶୀ ଜାଗରଣ ମଞ୍ଚ ପକ୍ଷରୁ ଏହି ପ୍ରତିବାଦ କରାଯାଇଥିବା ବେଳେ ତୁର୍କୀ ପତାକାକୁ ଚିରା ଯାଇଛି ।
