ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଗୁରୁବାର ଜମ୍ମୁ କାଶ୍ମୀରର ବାଦାମୀ ବାଗ୍ କ୍ୟାଣ୍ଟନମେଣ୍ଟ୍କୁ ଗସ୍ତ ଅବସରରେ ପାକିସ୍ତାନର ପରମାଣୁ ଅସ୍ତ୍ରଭଣ୍ଡାରକୁ ନେଇ ଏକ ଗୁରୁତ୍ବପୂର୍ଣ୍ଣ ଟିପ୍ପଣୀ ଦେଇଛନ୍ତି। ରାଜନାଥ କହିଛନ୍ତି, ଆଜି ମୁଁ ଶ୍ରୀନଗର ମାଟିରୁ ଏହି ପ୍ରଶ୍ନ ଉଠାଇବାକୁ ଚାହୁଛି ଯେ ଏକ ଦାୟିତ୍ବହୀନ ଏବଂ ବିଶ୍ବାସଘାତକ ରାଷ୍ଟ୍ର ହାତରେ ପରମାଣୁ ଅସ୍ତ୍ର ରହିବା ସୁରକ୍ଷିତ କି ? ତେବେ ପାକିସ୍ତାନର ପରମାଣୁ ଅସ୍ତ୍ର ଆଇଏଇଏ (ଅନ୍ତର୍ଜାତୀୟ ପରମାଣୁ ଶକ୍ତି ସଂସ୍ଥାନ) ନିରୀକ୍ଷଣରେ ରହିବା ଉଚିତ ବୋଲି ରାଜନାଥ କହିଛନ୍ତି। ଯବାନଙ୍କୁ ଉଦ୍ବୋଧନ ଦେଇ ରାଜନାଥ କହିଛନ୍ତି, ପାକିସ୍ତାନ ଦ୍ବାରା ବାରମ୍ବାର ଦାୟିତ୍ବହୀନ ପରମାଣୁ ଧମକ ଦିଆଯିବା ଘଟଣାର ବୈଶ୍ବିକ ଯାଞ୍ଚ ହେବା ଉଚିତ। ପାକିସ୍ତାନ ପାଖରେ ଥିବା ପରମାଣୁ ଅସ୍ତ୍ରର ଅନ୍ତର୍ଜାତୀୟ ଅନୁଧ୍ୟାନ ହେବା ଉଚିତ।
ସମଗ୍ର ବିଶ୍ବ ଜାଣିଛି ଯେ ଆମ ସେନାର ଲକ୍ଷ୍ୟ ସ୍ଥିର ଏବଂ ସେମାନେ ଯେତେବେଳେ ଟାର୍ଗେଟ୍ରେ ଆକ୍ରମଣ କରନ୍ତି ସେମାନେ ଶତ୍ରୁଙ୍କୁ ଧ୍ବଂସର ହିସାବ କରିବାପାଇଁ ଛାଡ଼ି ଦିଅନ୍ତି। ଆତଙ୍କବାଦ ବିରୋଧରେ ଭାରତର ପ୍ରତିଜ୍ଞା କେତେ ସୁଦୃଢ଼ ତାହା ଆମ କାର୍ଯ୍ୟରେ ପ୍ରତିଫଳିତ ହୋଇଛି। ପାକିସ୍ତାନ ଆଣବିକ ବ୍ଲାକମେଲ୍ କରୁଥିଲେ ମଧ୍ୟ ଭାରତ ଏହାକୁ ଖାତିର ନକରି ପାକ୍ ଆକ୍ରମଣର ଜବାବ ଦେଇଥିଲା। ପାକିସ୍ତାନ କିଭଳି ଦାୟିତ୍ବହୀନ ଏବଂ ବେପରୁଆ ଭାବେ ଭାରତକୁ ଧମକ ଦେଇଥିଲା ତାହା ମଧ୍ୟ ସମଗ୍ର ବିଶ୍ବ ଦେଖିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ନିକଟରେ କହିଥିଲେ ଯେ ଆମ ସେନା ପରମାଣୁ ବ୍ଲାକ୍ମେଲ୍କୁ ପ୍ରତିହତ କରିବା ସହ ଶତ୍ରୁକୁ ନିପାତ କରିବା ପାଇଁ ବଦ୍ଧପରିକର ।
ଉଲ୍ଲେଖଯୋଗ୍ୟ, ଭାରତ ଓ ପାକିସ୍ତାନ ଏକ ଅସ୍ତ୍ରବିରତି ଚୁକ୍ତିରେ ପହଞ୍ଚିବାର ୫ ଦିନ ପରେ ରାଜନାଥ ସିଂହ ଶ୍ରୀନଗରରେ ପହଞ୍ଚିଥିଲେ। ସେନାମୁଖ୍ୟ ଜେନେରାଲ ଉପେନ୍ଦ୍ର ଦ୍ବିବେଦୀଙ୍କ ସହ ରାଜନାଥ ଆଜି ଆଗୁଆ ପୋଷ୍ଟ୍ ଅଂଚଳ ବୁଲି ଦେଖିଥିଲେ। ଅପରେସନ୍ ସିନ୍ଦୂର ସମୟରେ ନିୟନ୍ତ୍ରଣ ରେଖା ନିକଟରେ ସୈନିକଙ୍କ ବୀରତ୍ବକୂ ରାଜନାଥ ପ୍ରଶଂସା କରିଛନ୍ତି। ସେ ପୁଣିଥରେ ସ୍ପଷ୍ଟ କରି କହିଛନ୍ତି ଯେ ଆତଙ୍କବାଦ ଏବଂ ପିଓକେ ବ୍ୟତୀତ ପାକିସ୍ତାନ ସହ ଅନ୍ୟ କୌଣସି କଥାବାର୍ତ୍ତା ହେବନାହିଁ। ଭାରତୀୟ ଇତିହାସରେ ସବୁଠାରୁ ବଡ଼ ଧରଣର ଆତଙ୍କବାଦ ନିରୋଧ ଅପରେସନ୍ ‘ଅପରେସନ୍ ସିନ୍ଦୂର’କୁ ରାଜନାଥ ପ୍ରଶଂସା କରିଛନ୍ତି।
