ବାଂଲାଦେଶରେ ହିନ୍ଦୁ ନେତାଙ୍କୁ ହତ୍ୟାର ଦୃଢ଼ ନିନ୍ଦା କଲା ଭାରତ । ପ୍ରଥମେ ଚକ୍ରାନ୍ତ କରି ଅପହରଣ ପରେ ବାଂଲାଦେଶରେ ବିଶିଷ୍ଟ ହିନ୍ଦୁ ସମାଜ ନେତା ଭବେଶ ଚନ୍ଦ୍ର ରାୟଙ୍କୁ ନିର୍ମମ ହତ୍ୟା କରାଯାଇଛି । ମହମ୍ମଦ ୟୁନୁସଙ୍କ ନେତୃତ୍ଵାଧୀନ ଅନ୍ତରୀଣ ସରକାରର ହିନ୍ଦୁଙ୍କ ଉପରେ ଅତ୍ୟାଚାରକୁ ବ୍ୟବସ୍ଥାଗତ ଅତ୍ୟାଚାରର ଢାଞ୍ଚା କହି ତୀବ୍ର ସମାଲୋଚନା କରିଛନ୍ତି ବୈଦେଶିକ ମନ୍ତ୍ରାଳୟ ମୁଖପାତ୍ର ରଣଧୀର ଜୟସ୍ବାଲ ।
ବର୍ଷ ପରେ ବର୍ଷ, ବାଂଲାଦେଶର ଅନେକ ଅଞ୍ଚଳରୁ ହିନ୍ଦୁ ମନ୍ଦିର ଉପରେ ଆକ୍ରମଣ, ଜମି ଦଖଲ, ବଳପୂର୍ବକ ଧର୍ମାନ୍ତର, ଓ ଦଳିତ ସମ୍ପ୍ରଦାୟ ଉପରେ ହିଂସାର ଘଟଣା ରିପୋର୍ଟ ହୋଇଛି। ଏହି ହତ୍ୟା ଏମିତି ଏକ ସମୟରେ ଘଟିଛି ଯେତେବେଳେ ବାଂଲାଦେଶ ଆଗାମୀ ନିର୍ବାଚନ ପାଇଁ ପ୍ରସ୍ତୁତି ନେଉଛି। ବିଶ୍ଳେଷକମାନେ ଆଶଙ୍କା କରୁଛନ୍ତି ଯେ ଏହି ଘଟଣା ରାଜନୈତିକ ଭାବେ ଦେଶକୁ କ୍ଷତି ଦିଗକୁ ନେଇଯାଇପାରେ। ଭାରତ ସହିତ ଆନ୍ତର୍ଜାତୀୟ ସମୁଦାୟ ବାଂଲାଦେଶ ସରକାରକୁ ଗଣତାନ୍ତ୍ରିକ ଓ ଧର୍ମନିରପେକ୍ଷ ମୂଲ୍ୟବୋଧ ଅନୁସରଣ କରିବାକୁ ଅନୁରୋଧ କରିଛି।
ଏହାପୂର୍ବରୁ ସଂଖ୍ୟାଲଘୁଙ୍କ ହତ୍ୟା ଘଟଣାରେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇନଥିବାରୁ ଦୃଢ଼ ନିନ୍ଦା କରିଛନ୍ତି ଜୟସ୍ବାଲ । ମୃତକ ୫୮ ବର୍ଷୀୟ ଭବେଶ ବାଂଲାଦେଶରେ ହିନ୍ଦୁ ସଂଗଠନ ଚଳାଉଥିଲେ । ଗୁରୁବାର ଅପରାହ୍ନରେ ୪ ଜଣ ଯୁବକ ତାଙ୍କୁ ଅପହରଣ କରିନେଇଥିଲେ । ସନ୍ଧ୍ୟାରେ ଗୁରୁତର ଅବସ୍ଥାରେ ତାଙ୍କ ଚେତାଶୂନ୍ୟ ଶରୀରକୁ ତାଙ୍କ ଘର ଆଗରେ ଫିଙ୍ଗିଦେଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ପରିବାର ଲୋକେ ତାଙ୍କୁ ନିକଟ ଡାକ୍ତରଖାନାକୁ ନେଇଥିଲେ। କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
